મુખ્યમંત્રી ભૂપેન્દ્ર પટેલે ભાવનગરમાં મહારાજા કૃષ્ણકુમારસિંહજી યુનિવર્સિટી ખાતે યોજાયેલા ‘યુવા સંવાદ’ કાર્યક્રમમાં વિવિધ શૈક્ષણિક સંસ્થાઓના વિદ્યાર્થીઓ સાથે મુક્તમને સંવાદ સાધ્યો હતો. વિદ્યાર્થીઓએ તેમને વિકસિત ભારત-2047, રોજગાર, શિક્ષણ, કૃષિ, આરોગ્ય, રમતગમત, મહિલા સશક્તિકરણ, સાયબર ક્રાઇમ, નશામુક્તિ અને ઇન્ફ્રાસ્ટ્રક્ચર સહિતના વિષયો અંગે પ્રશ્નો પૂછ્યા હતા. મુખ્યમંત્રીએ વિદ્યાર્થીઓના પ્રશ્નોને ધ્યાનપૂર્વક સાંભળી સરળ, શહજ અને માર્ગદર્શક જવાબો આપ્યા હતા.
વડાપ્રધાન નરેન્દ્રભાઈ મોદીની જનસેવા સાધનાના 23 વર્ષ પુર્ણ થવા અવસરે યોજાઈ રહેલા સેવા સંકલ્પ અભિયાન અંતર્ગત આ યુવા સંવાદનું આયોજન કરવામાં આવ્યું હતું. મુખ્યમંત્રીએ વિકસિત ભારત-2047ના સંકલ્પમાં યુવાનોની સક્રિય સહભાગીતાનું આહવાન કર્યુ હતું. તેમણે કહ્યું કે, વિકસિત ભારત માત્ર મોટા શહેરોના વિકાસથી નહીં, પરંતુ ગામડાં અને છેવાડાના માનવી સુધી વિકાસની તકો અને સરકારી યોજનાઓનો લાભ પહોંચે ત્યારે સાકાર થશે.
યુવાનોએ પોતે યોજનાઓનો લાભ લેવા સાથે પોતાની આસપાસના જરૂૂરિયાતમંદ લોકો અને મિત્રોને પણ યોજનાઓનો લાભ અપાવવામાં સહયોગી બનવું જોઈએ. આજ વિકસિત ભારત-વિકસિત ગુજરાતની સાચી દિશા છે. ધોલેરા એસઆઈઆરમાં ઊભી થનારી રોજગારીની તકો અંગે મુખ્યમંત્રીએ જણાવ્યું કે આવનારી ઇન્ડસ્ટ્રીઝની જરૂૂરિયાત મુજબ ટેકનિકલ કૌશલ્ય વિકસાવવું જરૂૂરી છે. સેમિક્ધડક્ટર સહિતની ઇન્ડસ્ટ્રીઝ માટે સરકાર કંપનીઓના સહયોગથી સ્કિલ ડેવલપમેન્ટ તાલીમ અને ક્લાસિસનું આયોજન કરે છે. યુવાનોએ આવી તકોનો લાભ લઈ પોતાની રોજગારક્ષમતા વધારવી જોઈએ.
શારીરિક અને માનસિક સ્વાસ્થ્ય અંગેના પ્રશ્નના જવાબમાં મુખ્યમંત્રીએ જણાવ્યું કે અન્યો સાથે હરીફાઈ કે સરખામણીથી દૂર રહીને દરેક વ્યક્તિએ પોતાની ક્ષમતા અને પરિસ્થિતિ પ્રમાણે આગળ વધવું જોઈએ. સફળતા ન મળે તો ફરી પ્રયાસ કરવો જોઈએ. યોગ અને સકારાત્મક વિચારસરણી મન અને શરીરને સ્વસ્થ રાખવામાં મદદરૂૂપ થાય છે તેમ પણ તેમણે જણાવ્યું હતું.
કૃષિને રોજગારીનું માધ્યમ બનાવવા અંગે મુખ્યમંત્રીએ જણાવ્યું કે આધુનિક ખેતી પદ્ધતિ, યોગ્ય બિયારણ, ટેક્નોલોજી અને આધુનિક સાધનો અંગેનું જ્ઞાન મેળવીને યુવાનો પોતાની સાથે સમગ્ર ગામની ખેતીમાં પણ સુધારો લાવી શકે છે. માત્ર પુસ્તકીયા જ્ઞાન પૂરતું મર્યાદિત ન રહેતાં મોડેલ ફાર્મની મુલાકાત લઈ પ્રેક્ટિકલ જ્ઞાન મેળવવા અને ખેત પેદાશોમાં વેલ્યુ એડિશન કરવાનો પણ તેમણે અનુરોધ કર્યો હતો. સાયબર ક્રાઇમ અંગેના સવાલ અંગે તેમણે વિદ્યાર્થીઓમાં સાયબર સુરક્ષા અને ઓનલાઇન ફ્રોડ અંગે જાગૃતિ વધારવા સરકારના પ્રયાસોનો ઉલ્લેખ કર્યો હતો.
મુખ્યમંત્રીએ જણાવ્યું કે અન્ય ભાષાઓનું જ્ઞાન જરૂૂરી છે, પરંતુ માતૃભાષા બોલવામાં કે તેનો ઉપયોગ કરવામાં કોઈ સંકોચ ન હોવો જોઈએ. માતૃભાષા પ્રત્યે ગૌરવ જળવાઈ રહે તે જરૂૂરી છે. આ તકે કેન્દ્રીય રાજ્ય મંત્રી નીમુબેન બાંભણિયા, કૃષિ મંત્રી જીતુભાઈ વાઘાણી, ભાવનગરના પ્રભારી અને ઊર્જા રાજ્ય મંત્રી કૌશિકભાઈ વેકરીયા, મહારાજા કૃષ્ણકુમાર સિંહજી ભાવનગર યુનિવર્સિટીના વાઇસ ચાન્સેલર ડો. ભરતભાઈ રામાનુજ સહિતના આગેવાનો ઉપસ્થિત રહ્યા હતા.