સુરેન્દ્રનગરમાં હાઇવે પર ચોરી કરતી કંજર ગેંગ ઝડપાઇ

સુરેન્દ્રનગર જિલ્લામાં મિલકત સંબંધી ગુનાઓ અટકાવવા અને વણઉકેલાયેલા ગુનાઓનો ભેદ ઉકેલવા પોલીસે હાથ ધરેલી કામગીરીમાં આંતરરાજ્ય કંજર ગેંગના ત્રણ સભ્યો ઝડપાયા છે. આરોપીઓ હાઇવે પર આવેલી હોટલોના પાર્કિંગમાં પાર્ક કરેલી કારના કાચ તોડી રોકડની ચોરી તેમજ હોટલ પર રોકાયેલી ટ્રાવેલ્સ અને લક્ઝરી બસોમાંથી મુસાફરોની બેગ ચોરી કરતા હોવાનું પોલીસ તપાસમાં સામે આવ્યું છે. પોલીસે લીંબડી-જાખણ ગામના પાટિયા પાસેથી ત્રણેયને ઝડપી પાડ્યા હતા.

પોલીસ તપાસમાં આરોપીઓનો ચોરી કરવાનો અલગ પ્રકારનો મોડસ ઓપરેન્ડી સામે આવ્યો છે. આરોપીઓ હાઇવે પર આવેલી હોટલોના પાર્કિંગમાં રેકી કરતા હતા. ત્યારબાદ કોઈ વ્યક્તિ હાજર ન હોય તેવી કારના કાચ તોડીને અંદરથી રોકડ અને કિંમતી વસ્તુઓની ચોરી કરતા હતા. આ ઉપરાંત ટ્રક, ટ્રાવેલ્સ અને લક્ઝરી બસો હોટલ પર રિફ્રેશમેન્ટ માટે ઊભી રહે ત્યારે મુસાફરો નીચે ઉતરે તે સમયનો લાભ લઈ બસમાંથી બેગ અને અન્ય સામાન ચોરી લેતા હતા.

આરોપીઓ ચોરી કર્યા બાદ પોલીસની પકડથી બચવા માટે પોતાની કારની નંબર પ્લેટ બદલી નાખતા હતા. મધ્યપ્રદેશના ધારથી ગુજરાતમાં પ્રવેશતી વખતે તેઓ મોબાઇલ ફોન સ્વિચ ઓફ કરી દેતા હતા, જેથી ટેક્નિકલ સર્વેલન્સના આધારે તેમની હિલચાલ અને ગુનાનો ભેદ ઉકેલવો મુશ્કેલ બને.

પોલીસ પૂછપરછ દરમિયાન આરોપીઓએ સુરેન્દ્રનગર ઉપરાંત અમદાવાદ, વડોદરા, કરજણ અને ચીખલીના હાઇવે પર ચોરીના અનેક ગુનાઓ કર્યા હોવાની કબૂલાત કરી હોવાનું સામે આવ્યું છે. જેમાં લીંબડી-બગોદરા હાઇવેની હોટલના પાર્કિંગમાંથી કારનો કાચ તોડી રૂૂ.2 લાખની ચોરી, શિવશોભા હોટલ ખાતે સરકારી બસમાંથી રૂૂ.2 લાખની ચોરી અને અમદાવાદ-રાજકોટ હાઇવે પર ગેલોપ્સ હોટલના પાર્કિંગમાં આઈ-20 કારનો કાચ તોડી રૂૂ.3 લાખની ચોરીનો સમાવેશ થાય છે.

આરોપીઓએ લીંબડીની એચએફએમ હોટલ, અમદાવાદ-વડોદરા હાઇવેની હોટલ અને બગોદરા ટોલનાકાથી અમદાવાદ વચ્ચેની હોટલમાં લક્ઝરી બસમાંથી રોકડની ચોરી કરી હોવાનું જણાવ્યું છે. દર્શન હોટલના પાર્કિંગમાં ઉભેલી લક્ઝરી બસમાંથી પણ રૂૂ.10થી 12 હજારની ચોરી કરી હોવાનું પોલીસ તપાસમાં સામે આવ્યું છે. ઉપરાંત કરજણ અને ચીખલી હાઇવે પર ટ્રકમાંથી રોકડ તથા મોબાઇલ ફોનની ચોરી કરી હોવાની પણ કબૂલાત કરવામાં આવી છે. પોલીસે આરોપીઓ પાસેથી રૂૂ.5 લાખની કિંમતની વેન્યુ કાર, ચાર મોબાઇલ ફોનની કિંમત રૂૂ.60,500, રૂૂ.29,500 રોકડ, બે નંબર પ્લેટ, કટર, ડિસમીસ, આઠ આઈડી કાર્ડ અને છ સિમકાર્ડ સહિત કુલ રૂૂ.5.90 લાખનો મુદ્દામાલ કબજે કર્યો છે. ઝડપાયેલા આરોપીઓની ઓળખ મધ્યપ્રદેશના ધાર જિલ્લાના મનાવર અને ધરમપુરી વિસ્તારના અરબાજખાન મુલતાની, અલ્લારખા શાહ અને સદામ ગફુરખાન તરીકે થઈ છે.