મોરબીનાના લાલબાગ સરકારી કચેરી પાસે એક ઘટાદાર વૃક્ષને કોઈ પણ જાતની મંજૂરી વિના તોડી પાડવામાં આવતા પર્યાવરણ પ્રેમીઓમાં રોષ જોવા મળી રહ્યો છે. આ સમગ્ર ઘટનાનો વીડિયો સોશિયલ મીડિયા પર વાયરલ થતા તંત્રની કામગીરી સામે પણ સવાલો ઉભા થયા છે.
ઘટનાની વિગતો મુજબ, લાલબાગ વિસ્તારમાં એક શખ્સ દ્વારા જાહેરમાં વૃક્ષ તોડી પાડવામાં આવ્યું હતું. આ જોઈને એક જાગૃત નાગરિકે ત્યાં પહોંચી વૃક્ષ કાપનાર વ્યક્તિની પૂછપરછ કરી હતી. જ્યારે નાગરિકે પૂછ્યું કે આ વૃક્ષ કેમ કાપી રહ્યા છો?, ત્યારે વૃક્ષ કાપનાર શખ્સે અજીબોગરીબ જવાબ આપતા જણાવ્યું કે, તેને કોઈ વ્યક્તિએ આ વૃક્ષ કાપવાનું કહ્યું હતું. જાગૃત નાગરિકે જ્યારે વધુ તપાસ કરી કે શું તે વ્યક્તિ કોઈ સરકારી અધિકારી હતી કે અન્ય કોઈ, ત્યારે વૃક્ષ કાપનાર શખ્સ તેની ઓળખ આપી શક્યો ન હતો અને પોતે પણ તે વ્યક્તિને ઓળખતો ન હોવાનું રટણ કર્યું હતું. અજાણ્યા શખ્સના ઈશારે સરકારી જગ્યા પાસેનું વૃક્ષ કાપી નાખવાની આ ઘટનાએ અનેક તર્ક-વિતર્ક સર્જ્યા છે.
હાલ આ વીડિયો સોશિયલ મીડિયામાં ખૂબ વાયરલ થઈ રહ્યો છે. આશ્ચર્યની વાત એ છે કે સરકારી કચેરીની બિલકુલ નજીક જ આ પ્રકારે ગેરકાયદેસર રીતે વૃક્ષનું છેદન થઈ ગયું અને તંત્રને તેની જાણ સુધ્ધાં ન થઈ! સરકારી કચેરીની નાકની નીચે જ જો આ રીતે વૃક્ષો કપાતા હોય, તો શું તંત્ર ઘોર નિંદ્રામાં છે? જવાબદાર અધિકારીઓ આ બાબતે તપાસ કરી યોગ્ય પગલાં ભરે તેવી માંગ ઉઠી છે.
