રાજકોટ ગ્રાહક કમિશનના પ્રમુખને હોદ્દા પર ચાલુ રાખવા હાઇકોર્ટનો આદેશ

મુદત વધારાની અરજી પર તા.30 સુધીમાં નિર્ણય લેવા અને બિનજરૂરી મુકદમાબાજી ટાળવા સરકારને ટકોર ગ્રાહક તકરાર નિવારણ પ્રક્રિયાની કામગીરી અવિરતપણે ચાલુ રહે તે હેતુથી એક…

મુદત વધારાની અરજી પર તા.30 સુધીમાં નિર્ણય લેવા અને બિનજરૂરી મુકદમાબાજી ટાળવા સરકારને ટકોર

ગ્રાહક તકરાર નિવારણ પ્રક્રિયાની કામગીરી અવિરતપણે ચાલુ રહે તે હેતુથી એક મહત્વપૂર્ણ વચગાળાની રાહત આપતા ગુજરાત હાઈકોર્ટે રાજકોટ (મુખ્ય) જિલ્લા ગ્રાહક તકરાર નિવારણ કમિશનના પ્રમુખ પંકજકુમાર રાવલને તેમની 15 નવેમ્બરના રોજ પૂર્ણ થયેલી મુદત બાદ પણ હોદ્દા પર ચાલુ રહેવાની મંજૂરી આપી છે. મુદત વધારા માટેની તેમની પડતર અરજી પર રાજ્ય સરકાર અંતિમ નિર્ણય ન લે ત્યાં સુધી હાઈકોર્ટનો આ આદેશ અમલમાં રહેશે.

વહીવટી નિષ્ક્રિયતા સામે ન્યાયિક હસ્તક્ષેપની માંગ સાથે પંકજકુમાર રાવલે હાઈકોર્ટના દ્વાર ખટખટાવ્યા બાદ આ મામલો જસ્ટિસ મૌલિક જે. શેલતની ખંડપીઠ સમક્ષ સુનાવણી માટે આવ્યો હતો. કોર્ટ સમક્ષ કરવામાં આવેલી રજૂઆત મુજબ, રાવલે પોતાની મુદતમાં વધારો કરવા માટે રાજ્ય સત્તાવાળાઓને ગત 22 જુલાઈના રોજ જ લેખિત રજૂઆત કરી હતી. જોકે, આશરે ચાર મહિનાનો સમય વીતી જવા છતાં અને 15 નવેમ્બરની નિવૃત્તિ તારીખ નજીક આવી ગઈ હોવા છતાં સરકાર તરફથી તેમની અરજી પર કોઈ પ્રતિભાવ આપવામાં આવ્યો ન હતો કે કોઈ નિર્ણય લેવાયો ન હતો.

સુનાવણી દરમિયાન રાવલના વકીલે દલીલ કરી હતી કે રાજ્ય સરકારે અગાઉ ગુજરાતના વિવિધ ગ્રાહક કમિશનોમાં સમાન હોદ્દો ધરાવતા અન્ય પ્રમુખો અને સભ્યોને મુદત વધારો આપ્યો છે. આ ઉપરાંત, વકીલે સુપ્રીમ કોર્ટના એક સ્થાપિત ચુકાદાનો પણ હવાલો આપ્યો હતો, જેમાં સ્પષ્ટ નિર્દેશ આપવામાં આવ્યો છે કે નવા હોદ્દેદારોની ભરતી પ્રક્રિયા પૂર્ણ ન થાય ત્યાં સુધી ગ્રાહક કમિશનના વર્તમાન હોદ્દેદારોએ પોતાની ફરજ બજાવવાનું ચાલુ રાખવું જોઈએ, જેથી જગ્યાઓ ખાલી પડવાને કારણે ગ્રાહકોને ન્યાય મળવામાં વિલંબ ન થાય.
રાજ્ય સરકાર તરફથી હાજર રહેલા વકીલે હાઈકોર્ટને જણાવ્યું હતું કે રાવલની રજૂઆતને અભરાઈ પર ચઢાવી દેવામાં આવી નથી, પરંતુ અન્ન, નાગરિક પુરવઠા અને ગ્રાહક બાબતોના વિભાગના વરિષ્ઠ અધિકારીઓ દ્વારા તે અંગે સક્રિય વિચારણા ચાલી રહી છે. સરકારે કોર્ટને ખાતરી આપી હતી કે વહીવટી સમીક્ષા પ્રગતિમાં છે અને મુદત વધારાની વિનંતી પર ટૂંક સમયમાં અંતિમ નિર્ણય લેવામાં આવશે.

બંને પક્ષોની રજૂઆતોને ધ્યાનમાં લેતા જસ્ટિસ શેલતે વચગાળાનો આદેશ પસાર કરીને રાજ્ય સરકાર ઔપચારિક નિર્ણય ન લે ત્યાં સુધી રાવલને રાજકોટ (મુખ્ય) કમિશનના પ્રમુખ તરીકે ચાલુ રહેવાની મંજૂરી આપી હતી. આ રાહત આપતી વખતે કોર્ટે રાજ્યભરના ગ્રાહક ફોરમને અસર કરતા વહીવટી વિલંબ તરફ ધ્યાન દોરતા ટિપ્પણી કરી હતી કે બિનજરૂૂરી કાયદાકીય લડાઈ ટાળવા માટે જિલ્લા અને રાજ્ય ગ્રાહક કમિશનમાં ફરજ બજાવતા સમાન હોદ્દાના પ્રમુખો અને સભ્યોની મુદત અંગે સરકાર નિર્ણય લે તે હવે “સમયની માંગ” છે. સુનાવણીના અંતે હાઈકોર્ટે રાજ્ય સત્તાવાળાઓને પ્રક્રિયા ઝડપી બનાવવા અને રાવલની મુદત વધારાની અરજી પર શક્ય હોય તો 30 નવેમ્બર સુધીમાં નિર્ણય લેવા અનુરોધ કર્યો છે. સરકારના નિર્ણય અને આદેશના પાલનની સમીક્ષા કરવા માટે કોર્ટે આ કેસની વધુ સુનાવણી આગામી 1 ડિસેમ્બરના રોજ મુકરર કરી છે.

Leave a Reply

Your email address will not be published. Required fields are marked *