લૂંટના ઇરાદાની આશંકા, ફૂડ માર્ટ અને ગેસ સ્ટેશન ચલાવતા હતા
અમેરિકાના સાઉથ કેરોલાઈના યુનિયન કાઉન્ટીમાં એક ચોંકાવનારી ઘટના સામે આવી છે, જ્યાં ગુજરાતી મહિલા કિરણ પટેલની ગોળી મારીને હત્યા કરવામાં આવી છે. 49 વર્ષીય કિરણ પટેલ ડીડીથસ ફુડ માર્ટ નામના ગેસ સ્ટેશન અને સ્ટોરનું સંચાલન કરતી હતી. આ હુમલો 16 સપ્ટેમ્બરની રાત્રે થયો, જ્યારે તેઓ સ્ટોરમાં એકલા હતા. પોલીસ અનુસાર, આ લૂંટના ઈરાદાથી કરવામાં આવેલો હુમલો જણાય છે, જેમાં હુમલાકર્તા કિરણને પૈસા આપતા પહેલાં જ ગોળી મારી દીધી હતી.
યુનિયન પબ્લિક સેફ્ટી વિભાગને 16 સપ્ટેમ્બરની રાત્રે સાઉથ પિંક્ની સ્ટ્રીટ પર આવેલા ડીડીથસ ફુડ માર્ટ પાસે ગોળીબારના સમાચાર મળ્યા હતા. પોલીસ પહોંચી ત્યારે સ્ટોરના પાર્કિંગ લોટમાં કિરણ પટેલની ગોળી મારીને હત્યા કરાયેલો મૃતદેહ મળ્યો હતો. કોરોનરના કાર્યાલયે તેમને 49 વર્ષીય કિરણ પટેલ તરીકે ઓળખ કરી છે. ઘટનાસ્થળ પર સ્ટોરના આગળના બારીમાંથી ગોળીઓ લાગ્યાના નિશાન અને શેલ કેસિંગ્સ મળ્યા છે.
પોલીસ તપાસમાં જાણવા મળ્યું છે કે હુમલાકર્તા લૂંટ કરવા આવ્યા હતા, પરંતુ કિરણ પટેલ તેમને પૈસા આપતા પહેલાં જ તેઓએ ગોળીબાર શરૂૂ કરી દીધો. આ ઘટના ત્યારે બની જ્યારે કિરણ સ્ટોરમાં એકલા હતા, જેના કારણે તેમને કોઈ મદદ મળી નહીં. આ હત્યા યુનિયન કાઉન્ટીમાં 24 કલાકમાં બીજી હત્યા છે, જેના કારણે સ્થાનિક લોકોમાં ભયનું વાતાવરણ ફેલાયું છે. સ્થાનિક રહેવાસીઓએ આ હિંસા વિરુધ્ધ દુ:ખ વ્યક્ત કર્યું છે અને કહ્યું છે કે આવી હિંસા અમેરિકામાં વધી રહી છે, પરંતુ જ્યારે તે આપણા વિસ્તારમાં પહોંચે છે ત્યારે વધુ દુ:ખદાયક બને છે.
યુનિયન પબ્લિક સેફ્ટી વિભાગ અને કાઉન્ટી કોરોનરનું કાર્યાલય તપાસ કરી રહ્યા છે. હજુ સુધી કોઈ આરોપી પકડાયો નથી, પરંતુ પોલીસે વીડિયો ફૂટેજ અને અન્ય પુરાવા એકત્ર કર્યા છે. આ ઘટના અન્ય એક હત્યા સાથે જોડાયેલી છે કે કેમ તેની તપાસ પણ ચાલુ છે. કિરણ પટેલ ગુજરાતી મહિલા હોવાથી અમેરિકામાં વસતા ગુજરાતી સમુદાયમાં આ ઘટનાથી શોકની લહેર ફરી છે. તેઓએ તેમના પરિવાર પ્રત્યે સહાનુભૂતિ વ્યક્ત કરી છે અને પોલીસને ત્વરિત કાર્યવાહીની અપીલ કરી છે.
