દુબઈ કેપિટલ્સે 2025 ઇન્ટરનેશનલ લીગ T20 (ILT 2025)નો ખિતાબ જીત્યો. ટાઇટલ મેચમાં, દુબઈ કેપિટલ્સે ડેઝર્ટ વાઇપર્સને 4 વિકેટથી હરાવ્યું અને ચાર બોલ બાકી રહેતા મેચ જીતી લીધી. આ રોમાંચક જીતમાં દુબઈ કેપિટલ્સના બેટ્સમેન રોવમેન પોવેલની શાનદાર ઇનિંગ્સે મહત્વપૂર્ણ ભૂમિકા ભજવી હતી.પોવેલે 38 બોલમાં 7 ચોગ્ગા અને 3 છગ્ગા સહિત 63 રન બનાવ્યા અને અંતિમ ઓવરમાં ટીમને વિજય અપાવ્યો.
ILT 2025 દુબઈ કેપિટલ્સે પ્રથમ બોલિંગ કરવાનો નિર્ણય લીધો, ત્યારબાદ ડેઝર્ટ વાઇપર્સે 20 ઓવરમાં 189/5 રન બનાવ્યા. ડેઝર્ટ વાઇપર્સ માટે મેક્સ હોલ્ડને સૌથી મોટી ઇનિંગ રમી, જેમાં તેણે 51 બોલમાં 12 ચોગ્ગાની મદદથી 76 રન બનાવ્યા. દુબઈ કેપિટલ્સ તરફથી ઓબેદ મેકકોયે 2 વિકેટ લીધી.
રન ચેઝમાં દુબઈ કેપિટલ્સનો પ્રારંભ સારો રહ્યો ન હતો કારણ કે ટીમે 31 રનના સ્કોર પર પહેલી ત્રણ વિકેટ ગુમાવી દીધી હતી. પરંતુ આ પછી રોવમેન પોવેલ અને શાઈ હોપે જવાબદારી લીધી. શાઈ હોપે 39 બોલમાં 43 રન બનાવ્યા. આ શાનદાર બેટિંગ બાદ દુબઈ કેપિટલ્સે 19.2 ઓવરમાં 191/6 રન બનાવીને મેચ જીતી લીધી. ડેઝર્ટ વાઇપર્સ તરફથી મોહમ્મદ આમિર અને ડેવિડ પેને 2-2 વિકેટ લીધી, પરંતુ અંતે દુબઈ કેપિટલ્સે શાનદાર રમત બતાવી અને ઇન્ટરનેશનલ લીગ T20 2025નો ખિતાબ જીત્યો.
