T20 વર્લ્ડ કપના ઇતિહાસમાં બન્ને ટીમો 5 વખત આમને સામને આવી છે, ભારતની 3 વખત જીત
ભારતીય ક્રિકેટ ટીમ અને ઇંગ્લેન્ડ વચ્ચે ટી20 વિશ્વ કપ 2026 ની અત્યંત રોમાંચક સેમિફાઇનલ મેચ આગામી 5 માર્ચે મુંબઈના ઐતિહાસિક વાનખેડે સ્ટેડિયમ ખાતે રમાવા જઈ રહી છે. સતત બીજી વખત વિશ્વ વિજેતા બનવાનું સપનું પૂરું કરવા અને 8 માર્ચે રમાનારી ફાઇનલ મેચમાં પોતાનું સ્થાન નિશ્ચિત કરવા માટે ભારતે આ ’કરો યા મરો’ સમાન મુકાબલામાં ઇંગ્લેન્ડને હરાવવું જ પડશે. આ મેચ માટે દુનિયાભરના ક્રિકેટ પ્રેમીઓમાં ભારે ઉત્સાહ જોવા મળી રહ્યો છે, ત્યારે જાણીએ કે જૂના આંકડા અને વર્તમાન પરિસ્થિતિ કઈ ટીમની તરફેણ કરી રહ્યા છે.
ટી20 વિશ્વ કપના અત્યાર સુધીના ઇતિહાસ પર નજર કરીએ તો આ બંને દિગ્ગજ ટીમો કુલ 5 વખત આમને સામને આવી છે. આ 5 રોમાંચક મુકાબલાઓમાંથી ભારતીય ટીમે 3 વખત મેદાન માર્યું છે, જ્યારે ઇંગ્લેન્ડને 2 વખત સફળતા મળી શકી છે. સૌથી વિશેષ વાત એ છે કે આ બંને ટીમો વિશ્વ કપની સેમિફાઇનલમાં પણ અગાઉ બે વાર ટકરાઈ ચૂકી છે. વર્ષ 2022 માં રમાયેલી સેમિફાઇનલમાં ઇંગ્લેન્ડે ભારતને 10 વિકેટથી કારમી હાર આપી હતી. જોકે, ભારતીય ખેલાડીઓએ હિંમત ન હારતા વર્ષ 2024 ની સેમિફાઇનલમાં 68 રનથી શાનદાર વિજય મેળવીને તે હારનો સણસણતો બદલો લીધો હતો.
આંતરરાષ્ટ્રીય ટી20 ક્રિકેટના એકંદર આંકડાઓની વાત કરીએ તો, ભારતીય ટીમનો દબદબો સ્પષ્ટપણે જોવા મળે છે. અત્યાર સુધીમાં બંને દેશો વચ્ચે કુલ 29 મુકાબલા રમાયા છે, જેમાંથી 17 મેચમાં ભારતે ભવ્ય જીત નોંધાવીને પોતાનું વર્ચસ્વ સાબિત કર્યું છે. બીજી બાજુ, ઇંગ્લેન્ડ માત્ર 12 મેચમાં જ વિજયી બની શક્યું છે. ભારતીય પ્રશંસકો માટે સૌથી વધુ રાહત આપનારા સમાચાર એ છે કે વર્ષ 2024 ની શરૂૂઆતથી લઈને અત્યાર સુધીમાં આ બંને ટીમો વચ્ચે કુલ 6 મેચ રમાઈ છે, જેમાંથી ઇંગ્લેન્ડ માત્ર 1 જ મેચ જીતવામાં સફળ રહ્યું છે.
વર્તમાન વર્ષ 2026 ના ટી20 વિશ્વ કપમાં ભારત અને ઇંગ્લેન્ડ બંનેનું પ્રદર્શન ખૂબ જ સંતુલિત અને લગભગ એકસમાન રહ્યું છે. બંને ટીમોએ આ ટુર્નામેન્ટમાં અત્યાર સુધી કુલ 7 મેચ રમી છે અને બંનેને માત્ર 1 1 મેચમાં પરાજયનો સામનો કરવો પડ્યો છે. ગ્રુપ રાઉન્ડમાં ભારતીય ટીમ પોઈન્ટ ટેબલ પર પ્રથમ ક્રમે રહી હતી, તો બીજી તરફ ઇંગ્લેન્ડે પણ સુપર 8 રાઉન્ડમાં પોતાનું વર્ચસ્વ જાળવી રાખીને ટોચનું સ્થાન પ્રાપ્ત કર્યું હતું. મુંબઈના વાનખેડે સ્ટેડિયમની પીચ હંમેશાથી બેટ્સમેનો માટે મદદરૂૂપ રહી છે, તેથી 5 માર્ચે રમાનારી આ મેચમાં મોટા સ્કોરની અપેક્ષા છે. વર્તમાન ફોર્મ જોતા બંને ટીમો સમાન શક્તિશાળી લાગી રહી છે, પરંતુ જૂના રેકોર્ડ્સ અને આંકડા સ્પષ્ટપણે ભારતીય ટીમની મજબૂત સ્થિતિ દર્શાવે છે.
