વર્ગ-4ના કર્મચારીઓ માટે 7000 સુધીનું દિવાળી બોનસ મંજૂર

પ્રકાશના મહાપર્વ દિવાળીની દેશભરમાં ઉમંગભેર તૈયારીઓ ચાલી રહી છે, ત્યારે ગુજરાત સરકારે તેના નાના અને પાયાના કર્મચારીઓ માટે એક અત્યંત સંવેદનશીલ અને ખુશી આપનારો નિર્ણય લીધો છે. તહેવારોના આ સપરમા દહાડે નાના કર્મચારીઓના ઘરમાં પણ મીઠાઈ આવે અને તેમના બાળકો નવા કપડાં પહેરી શકે તેવા ઉમદા હેતુથી રાજ્ય સરકારે વર્ગ-4ના કર્મચારીઓ માટે દિવાળી બોનસની સત્તાવાર જાહેરાત કરી છે.
ગાંધીનગરથી પ્રાપ્ત સત્તાવાર વિગતો અનુસાર, રાજ્ય સરકારના સામાન્ય વહીવટ વિભાગ દ્વારા એક મહત્વપૂર્ણ પરિપત્ર બહાર પાડવામાં આવ્યો છે. આ પરિપત્ર મુજબ, રાજ્ય સરકારના તમામ વર્ગ-4ના કર્મચારીઓને દિવાળીના તહેવાર નિમિત્તે 30 દિવસના પગાર બરાબર એડહોક બોનસ ચૂકવવામાં આવશે. આ બોનસની રકમ મહત્તમ 7000 રૂૂપિયાની મર્યાદામાં ચૂકવવાનું નક્કી કરવામાં આવ્યું છે. સરકારના આ નિર્ણયથી હજારો પરિવારોની દિવાળી વધુ રોશન બનશે.

આ બોનસનો લાભ માત્ર નવા કર્મચારીઓને જ નહીં, પરંતુ જુના નિયમિત કર્મચારીઓને પણ આપવામાં આવશે. સત્તાવાર જાહેરાત મુજબ, સાતમા પગારપંચ, છઠ્ઠા પગારપંચ અને પાંચમા પગારપંચ હેઠળ આવતા તમામ વર્ગ-4ના નિયમિત કર્મચારીઓને આ એડહોક બોનસનો સીધો લાભ મળશે. નાના કર્મચારીઓના આર્થિક ઉત્કર્ષ માટે લેવાયેલો આ નિર્ણય સરકારની હકારાત્મક નીતિ દર્શાવે છે.

આ દિવાળી ભેટનો લાભ લેવા માટે સરકાર દ્વારા કેટલાક સામાન્ય નિયમો પણ ઘડવામાં આવ્યા છે. જે મુજબ, જે વર્ગ-4ના કર્મચારીઓએ તેમની નોકરીના સળંગ 6 મહિના પૂર્ણ કર્યા હોય, તેઓ જ આ બોનસ મેળવવા માટે હકદાર ગણાશે. આ નિયમથી મોટાભાગના નિયમિત અને સ્થાયી કર્મચારીઓને આર્થિક સહાયનો સીધો ફાયદો થશે. તહેવારના સમયે હાથ પર રોકડ રકમ આવવાથી નાના કર્મચારીઓનું આર્થિક ભારણ હળવું થશે.
સરકારનો આ સંવેદનશીલ નિર્ણય માત્ર સચિવાલય કે રાજ્ય સરકારના સીધા વિભાગો પૂરતો જ સીમિત નથી. આ બોનસની જાહેરાતનો વ્યાપ વધારતા સરકારે સ્પષ્ટ કર્યું છે કે, રાજ્ય સરકાર હસ્તકના પંચાયત, વિવિધ સરકારી બોર્ડ અને નિગમોમાં ફરજ બજાવતા વર્ગ-4ના કર્મચારીઓને પણ આ 7000 રૂૂપિયા સુધીના એડહોક બોનસનો લાભ સમાન ધોરણે આપવામાં આવશે.

દિવાળી પૂર્વે આવેલી આ ખુશખબરે રાજ્યભરના હજારો પટાવાળા, સફાઈ કામદારો અને અન્ય વર્ગ-4ના કર્મચારીઓના પરિવારોમાં આનંદનું મોજું ફરી વળ્યું છે. મોંઘવારીના આ સમયમાં 7000 રૂૂપિયાની વધારાની આવક નાના પરિવારો માટે તહેવારની સાચી ખુશી બની રહેશે. સરકારી તંત્રની કામગીરીમાં પાયાનો રોલ ભજવતા આ નાના કર્મચારીઓના ઉત્સાહમાં પણ આ ભેટથી વધારો જોવા મળશે.