15થી 24 એપ્રિલ દરમિયાન ઓનલાઈન ફોર્મ ભરી શકાશે
ગુજરાતના શિક્ષણ ક્ષેત્રે કારકિર્દી બનાવવા ઈચ્છતા યુવાનો માટે લાંબા સમયના વિરામ બાદ ખુશખબર આવી છે. રાજ્ય સરકારના શિક્ષણ વિભાગ દ્વારા ધોરણ 1 થી 5 ના ગુજરાતી માધ્યમ માટે 11,000 વિદ્યાસહાયકો (વર્ગ-3) ની મહાભરતીની જાહેરાત કરવામાં આવી છે. TET-1 પાસ કરેલા હજારો ઉમેદવારો માટે આ એક ઐતિહાસિક અને સુવર્ણ તક સમાન છે.
જાહેરાત ક્રમાંક 01/2026 અનુસાર, સમગ્ર ભરતી પ્રક્રિયા પારદર્શક રીતે ઓનલાઇન માધ્યમથી હાથ ધરવામાં આવશે. ઉમેદવારોએ નીચે મુજબના શિડ્યુલને ખાસ ધ્યાનમાં રાખવાનું રહેશે. ઓનલાઇન ફોર્મ ભરવાની શરૂૂઆત: 15 એપ્રિલ, 2026 (સવારે 12:00 વાગ્યાથી) ફોર્મ ભરવાની અંતિમ તારીખ: 24 એપ્રિલ, 2026 (બપોરે 15:00 કલાક સુધી) રહેશે.
સ્વીકાર કેન્દ્ર પર ફોર્મ જમા કરવાની અંતિમ તારીખ: 24 એપ્રિલ, 2026 (સાંજે 17:00 કલાક સુધી) છે. આ ભરતીમાં અરજી કરવા માટે ઉમેદવારો પાસે સરકારના નિર્ધારિત નિયમો મુજબની શૈક્ષણિક અને તાલીમી લાયકાત હોવી જરૂૂરી છે. જેમાં ઉમેદવાર પાસે D.El.Ed. (ડિપ્લોમા ઇન એલિમેન્ટરી એજ્યુકેશન) ની પદવી હોવી અનિવાર્ય છે. ઉમેદવારે TET-1 (ટીચર એલિજિબિલિટી ટેસ્ટ) સફળતાપૂર્વક પાસ કરેલી હોવી જોઈએ.
આ જાહેરાતમાં એક મહત્વનો નિર્ણય લેવામાં આવ્યો છે. જે ઉમેદવારો હાલ D.El.Ed ના છેલ્લા વર્ષમાં અભ્યાસ કરી રહ્યા છે પરંતુ અગાઉ TET-1 પરીક્ષા પાસ કરી ચૂક્યા છે, તેઓ પણ આ ભરતીમાં ભાગ લઈ શકશે. આવા ઉમેદવારોએ અરજી કર્યા બાદ જ્યારે પરિણામ જાહેર થાય, ત્યારે પોતાના ગુણ અને માર્કશીટ ઓનલાઇન પોર્ટલ પર અપડેટ કરવાની રહેશે. રાજ્યમાં પ્રાથમિક શિક્ષણનું માળખું મજબૂત કરવાના હેતુથી લેવાયેલા આ નિર્ણયને પગલે ઉમેદવારોમાં ભારે ઉત્સાહ જોવા મળી રહ્યો છે. લાયકાત ધરાવતા ઉમેદવારોને સમયમર્યાદામાં સત્તાવાર વેબસાઇટ પર જઈને અરજી કરી દેવા સૂચના આપવામાં આવી છે.
શિક્ષણ વિભાગ દ્વારા ખાલી પડેલી જગ્યાઓનું લિસ્ટ અને મેરિટની ગણતરીની પ્રક્રિયા આંતરિક રીતે શરૂૂ કરી દેવામાં આવી હોવાનું જણાય છે. આ ભરતી પ્રક્રિયા પારદર્શક રીતે અને ઝડપથી પૂર્ણ થાય તેવી માંગ પણ ઉમેદવારો દ્વારા કરવામાં આવી રહી છે. ખાસ કરીને ગ્રામીણ વિસ્તારોની પ્રાથમિક શાળાઓમાં શિક્ષકોની ઘટ પૂરી કરવા માટે આ ભરતી ખૂબ જ મહત્વની સાબિત થશે.
