31 ડિસેમ્બરે ઈ-કેવાયસીની મુદત પૂરી થશે તો પણ સરકારી યોજનાઓનો લાભ ચાલુ રાખવાની સરકારની જાહેરાત, અફવાઓથી દૂર રહેવા અપીલ

રાજ્યમાં રેશનકાર્ડ ધારકોનું ઈકેવાયસી કાર્ય હાલ પુરજોશમાં ચાલુ છે. રાજ્યના રાશનકાર્ડ ધારકોએ આગામી તા. 31 મી ડિસેમ્બર સુધીમાં ઈકેવાયસી કરાવી લેવાની ગાઈડ લાઈન જાહેર કરાયા બાદ અનાજનો જથ્થો મળસે કે કેમ તેથી મુંઝવણ વચ્ચે નાગરિક પુરવઠા અને ગ્રાહકોની બાબતોના મંત્રી કુંવરજીભાઈ બાવળિયાએ વિભાગ દ્વારા જાહેરાત પ્રસિદ્ધ કરી જણાવ્યું છે કે, રાજ્યના જે રાશનકાર્ડ ધારકનું ઈકેવાયસી બાકી છે તેઓને તા. 31 ડિસેમ્બર 2024 બાદ પણ મળવાપાત્ર અનાજ યથાવત રહેશે તેમા કોઈ ઘટાડો નહીં થાય.

આજ રીતે સરકારની અન્ય યોજનાઓનો લાભ પણ તા. 31 ડિસેમ્બર 2024 બાદ મળતો રહેશે.
ઈકેવાયસી માટે બાકી રહેતા તમામ રેશનકાર્ડ ધારકોને અફવાઓથી ગેરમાર્ગે ન દોરવા તથા બિન જરૂરી ગભરાટથી દૂર રહેવા અપાલી કરાઈ છે.

રેશનકાર્ડમાં ઈકેવાયસી માટે સરકારી કચેરીમાં જવાને બદલે ઘરબેઠા “Myration” મોબાઈલ એપ્લિકેશન સરળતાથી ઈકેવાયસી કરી શકાશે.

મંત્રી કુંવરજીભાઈ બાવળિયાએ ઈકેવાયસી બાબતે સ્પષ્ટતા જાહેર કરતા રાજ્યના રાશન કાર્ડમાં ઈકેવાયસી કરાવવાનું બાકી રહી ગયેલા લોકો ગરીબ પરિવારોને હાશકારો થયો છે.

ઉલ્લેખનીય છે કે, સરકાર દ્વારા રાશનકાર્ડ ધારકો માટે ઈકેવાયસીની મુદત તા. 31 ડિસેમ્બર 2024ની નિયત કરી છે. અને આ મુદત બાદ રેશનકાર્ડ ધારકોને રેશનીંગનું અનાજ કે, અન્ય સરકારી યોજનાઓના લાભ મળતા બંધ થઈ જશે તેવી અફવાના કારણે રેશનકાર્ડ ધારકો સરકારી કચેરીઓમાં ઈ-કેવાયસી માટે ભારે ધસારો કરી રહ્યા છે. જેથી કચેરીઓમાં પણ અંધાધુંધી સર્જાઈ રહી છે. અંતે રાજ્ય સરકારે 31 ડિસેમ્બર સુધીમાં ઈકેવાયસી નહીં કરાવનાર નાગરિકોને રેશનકાર્ડ ઉપર મળતી તમામ સુવિધાઓ અને લાભો ચાલુ રાખવાની જાહેરાત કરતા ઈકેવાયસી માટે હેરાન થતાં નાગરિકોમાંરાહતની લાગણી જન્મી છે.

ઓક્ટોબર 2022માં લાગુ થયેલ સ્કીમની મુદતમાં 16 જૂન 2024ના રોજ છ માસનો વધારો થયેલ જે કાલે પૂર્ણ થશે

ગેરકાયદેસર બાંધકામો રેગ્યુલરાઈઝ કરવા સૌથી વધુ ઓફલાઈન અરજીઓ આવી: કોમર્સિયલની અનેક અરજીઓ રદ કરાઈ

શહેરના ગેરકાયદેસર બાંધકામો રેગ્યુલરાઈઝ કરી આવક ઉભી કરવા માટે સરકારે ઓક્ટોબર 2022ના રોજ ઈમ્પેક્ટ ફી કાયદો અમલમાં મુક્યો હતો. જેની મુદતમાં સતત ચાર વખત વધારો કરવામાં આવ્યો છે.

ત્યારે હવે ઈમ્પેક્ટ ફીની મુદત આવતી કાલે પૂર્ણ થશે. ગેરકાયદેસર બાંધકામો રેગ્યુલરાઈઝ કરવા માટે અત્યાર સુધીમાંઓફલાઈન અને ઓનલાઈન અંદાજે 970થી વધુ અરજીઓ આવી હોવાનું જાણવા મળેલ છે. છતાં આજ અને કાલ ઓનલાઈન અરજી કરનારાઓની સંખ્યાનો ઉમેરો થશે તેમજ ત્રણેય ઝોનની અરજી જનરેટ કરવાની બાકી હોય સાચો આંકડો સોમવારના રોજ ફાઈનલ થશે તેમ ટાઉન પ્લાનીંગ વિભાગમાંથી જાણવા મળેલ છે.

શહેરમાં વધી રહેલા ગેરકાયદેસર બાંધકામો રોકવામાં તંત્ર ઉણુ ઉતર્યુ છે ત્યારે આ બાંધકામોમાંથી પૈસા બનાવવા માટે સરકારે 2022થી ઈમ્પેક્ટ ફી નિયમની અમલવારી શરૂ કરી છે. જેમાં સૌપ્રથમ પોર્ટલ ઉપર ઓનલાઈન અરજી કરવાનો નિયમ અમલમાં મુક્યો હતો. પરંતુ કોમર્શીયલ બાંધકામોમાં પાર્કિંગ મુદ્દે ઓનલાઈન અરજી કરતી વખતે અનેક સમસ્યાઓ આવતા અંતે સરકારે ઓફલાઈન અરજી સ્વીકારવાનુંચાલુ કર્યુ હતું. 2022માં શરૂ થયેલ યોજનામાં અવાર નવાર મુદત વધારો કરવામાં આવ્યો છે. સતત ચોથી વખત મુદત 16 જૂન 2024ના રોજ છ માસ માટે વધારવામાં આવેલ જે આવતી કાલે 15/12/2024ના રોજ પૂર્ણ થતી હોય સંભવત ફરી વખત મુદતમાં વધારો થાય તેમ લાગી રહ્યું છે. ઓનનલાઈન અને ઓફલાઈન સહિતની કોમર્શીયલ તેમજ રહેણાકના બાંધકામોની અંદાજે 970થી વધુ અરજીઓ આવ્યાનું જાણવા મળેલ છે. તેમજ મંજુર થયેલ અરજીનો આંકડો હાલ મળી શકેલ નથી.

ટીઆરપી ગેમઝોન અગ્નિકાંડમાં બાંધકામ ગેરકાયદેસર હોવાનું ખુલવા પામ્યું છે. અને સાથો સાથ આ ગેમઝોનને ઈમ્પેક્ટ ફી હેઠળ આવરી લેવાના પ્રયાસો પણ થયા હતાં. અને આવતી કાલે મુદત પૂર્ણ થાય છે ત્યારે હવે વધારાનાું બાંધકામ કાયદેસર કરવા માટે ઈમ્પેક્ટ ફી યોજના હેઠળ મુકાતા ડોક્યુમેન્ટમાં ફાયર એનઓસી ફરજિયાત રજૂ કરવાનો નિયમ અમલમાં મુક્યો છે. આ મુદ્દે ફાયર વિભાગમાંથી પ્રાપ્ત વિગત મુજબ અત્યાર સુધી ગેરકાયદેસર બાંધકામ કાયદેસર કરવા માટે ઈમ્પેક્ટ ફીની ફાઈલ ઓનલાઈન રજૂ કરવામા આવશે ત્યારે ટાઉન પ્લાનીંગ વિભાગ દ્વારા વધારાના બાંધકામ અંતર્ગત તપાસ હાથ ધરી મંજુરી અપાતી હતી. છતાં અગાઉ થઈ ગયેલી અરજીઓ અંગે તપાસ કરવામાં આવશે.

મુદત વધવાની સંભાવના
સરકારે 2022માં શરૂ કરેલ ઈમ્પેક્ટ ફિ યોજના આવતી કાલે પૂર્ણ થનાર છે. આ યોજનાની ડિમાન્ડ વધતા સરકારે સતત ચાર વખત મુદતમાં વધારો કર્યો છે. છેલ્લે તા. 16 જૂન 2024થી છ માસ માટે મુદત વધારાઈ છે. આથી હજુ પણ શહેરમાં અનેક ગેરકાયદેસર બાંધકામો રેગ્યુલરાઈઝ કરવાના બાકી હોવાનું જાણવા મળેલ છે. જેના લીધે સરકાર દ્વારા ફરી વખત મુદત વધારવામાં આવેતેવું જાણકારો કહી રહ્યા છે.

સતત ચાર દિવસ કામગીરી ઠપ રહેતા દેકારો
ઈમ્પેક્ટ ફી કાયદાનો આવતી કાલે છેલ્લો દિવસ છે. છેલ્લે છેલ્લે ગેરકાયદેસર બાંધકામોની અરજી કરવા માટે ભારે ધરારો થયો હોવાનું જાણવા મળેલ છે. પરંતુ મુખ્યમત્રીના કાર્યક્રમમાં વ્યસ્ત હોવાના કારણે વોર્ડ ઓફિસરો દ્વારા સહી કરવા સહિતની કામગીરી ન થતાં બે દિવસ લોકોને ધરમનો ધક્કો થયો હતો. જ્યારે શનિ અને રવિવારની પણ રજા હોય અરજદારો હવે નવી અરજી નહીં કરી શકે આથી અનેક ગેરયાદસેર બાંધકામો રેગ્યુલરાઈઝ કરવાની અરજી કરવા માટે અરજદારોએ તૈયાર કરેલ જેના ઉપર પાણી ફરી વળતા દેકારોબોલી ગયો છે.

સૌ.યુનિ. સામે કોંગ્રેસનો નવતર વિરોધ: છાત્રોને ડિગ્રી વિતરણ કરી આર્શ્ર્ચયજનક કાર્યક્રમ આપ્યો

થોડા સમય પહેલા કોંગ્રેસ દ્વારા સૌરાષ્ટ્ર યુનિવર્સિટીના 17 વર્ષ પહેલા ખાતમૂહર્ત થયેલા એક બાંધકામ હજુ પૂર્ણ ના થયાના ઘટસ્ફોટ કરીને સંઘ અને ભાજપ સરકારની નિષ્ફળતાના આક્ષેપો કરી એમ એક તીરે બે નિશાન ટાંક્યા હતા.વાત છે સંઘ અને ભાજપ સાથે જોડાયેલ અને સૌ.યુની.ના પૂર્વ કુલપતિ ડો. કમલેશ જોષીપૂરાના કાર્યકાળ દરમિયાન એટલે કે વર્ષ 2007 મા ખાતમૂહર્ત થયેલ કોન્વોકેશન હોલનુ કામ ભ્રષ્ટાચારના વિવાદો બાદ સ્થગિત થતા હજુ આજની તારીખે ખંઢેરમા ફેરવાયેલ સ્થિતિમા એમ ને એમ હોવાથી કોંગ્રેસના વિદ્યાર્થી પ્રતિનિધિઓએ આ ખંઢેરના 17 વર્ષ પૂર્ણ આજે થતા તેમનુ નામકરણ કરી નાટકીય રીતે ઉદ્ઘાટન કરવાની થોડા સમય પહેલા જાહેરાત કરી હતી.

આજે કોંગ્રેસના વિદ્યાર્થીનેતા અને ઝોનલ પ્રવક્તા રોહિતસિંહ રાજપૂતની આગેવાનીમા અનેક વિદ્યાર્થી કાર્યકરોએ સૌરાષ્ટ્ર યુની.કેમ્પસમા આવેલ આ કોન્વોકેશન હોલની જગ્યા પર વિદ્યાર્થી કાર્યકરો દ્વારા તકદીનુ અનાવરણ કરીને ખંઢેરનુ નામકરણ જોશીપુરાનો ઉતારો નામ આપ્યુ હતું અને નાટકીય રીતે રીબીન કાપી ઉદ્ઘાટન કરી એક પ્રતિત્મારક વિરોધ દર્શાવ્યો હતો. પદવીદાન સમારોહમા વિદ્યાર્થીઓને પહેરવામા આવતા વેશ-પોષક ધારણ કરીને કાર્યકરોએ આ ખંઢેરમા પોતાની ડિગ્રી લેવા પહોચીને પ્લે કાર્ડ સાથે અંદર પ્રવેશીને આશ્ચર્યજનક વિરોધ દર્શાવ્યો હતો.

તાજમહલ મહેલ બનાવતા સમયે અંદાજે 17 વર્ષો લાગ્યા હતા ત્યારે તેનાથી વધુ સમયથી બનતા કોન્વોકેશન હોલે એક ઐતિહાસીક રેકોર્ડ બનાવતા ભ્રષ્ટાચારનુ શ્રેષ્ઠ પ્રતીકનો એવોર્ડ પણ એનાયત કરાયો હતો અને વધુમા આક્ષેપો કર્યા હતા કે વિદ્યાર્થીઓના હકના પૈસાથી બનનાર કોન્વોકેશન હોલમા 17 વર્ષ બાદ પણ વિદ્યાર્થીઓનો એક પદવીદાન સમારોહ ના યોજાયો હોય તો શા માટે મોટે ઉપાડે સતાધિસો જાહેરાતો કરી હતી? કોન્ટ્રાક્ટરોને કરોડોની રકમ ચૂકવી એ કેમ વસૂલાત કરતા નથી અને અત્યાર સુધી પોલીસ ફરિયાદ કેમ નોંધાઈ નથી ? સુસાશનની વાતો કરતી ભાજપ સરકાર પોતાના પક્ષના કહેવતા વિધવાન આગેવાનને બચાવવા કેમ તપાસ કમિટીઓમા ક્લીનચિટ આપી હતી.?વિપક્ષ તરીકે અમારી ફરજ બને કે જનતા સમક્ષ સરકાર અને યુની.ના સતાધિસોની લોલમપોલ છતી કરવી અને જેથી વિદ્યાર્થીઓને પણ ખ્યાલ આવે કે ખરેખર કેન્દ્ર અને રાજ્યમા રહેલી ભાજપ સરકાર માત્ર જાહેરાતો કરીને ખાતમુહર્તો જ કરે છે.

જો ગુજરાતના રાજ્યપાલ ખરા અર્થમાં સૌરાષ્ટ્ર યુનિવર્સિટીના ચાન્સેલર હોય તો સમગ્ર બાબતને વિજિલન્સ દ્વારા તપાસ કરાવે અને ભ્રષ્ટાચારમાં સામેલ જોશીપુરા એન્ડ કંપનીના સભ્યો સામે ફરિયાદ દાખલ કરે. કોંગ્રેસ તમામ બાબતના પુરાવાઓ આપવાની ખાતરી પણ આપે છે તેવુ કોંગ્રેસના વિદ્યાર્થીનેતા રોહિતસિંહ રાજપૂતે માંગ કરી હતી.