ઓલ્ડ રેલ્વે રોડ નજીક આવેલી ’હોટેલ ગંગા ઇન’ શનિવારે એક સગીરા પર બળાત્કાર બાદ વિવાદમાં ફસાઈ ગઈ હતી. મંગળવારે, પીડિતાના સંબંધીઓ અને મોટી સંખ્યામાં લોકો હોટલની બહાર એકઠા થયા. ગુસ્સે ભરાયેલા ટોળાએ પથ્થરમારો કર્યો, આગળના કાચ તોડી નાખ્યા અને અંદરના ભાગમાં પણ તોડફોડ કરી. હોટલના મેનેજમેન્ટ સાથે જોડાયેલી એક મહિલા અને ભીડમાં રહેલી મહિલાઓ વચ્ચે ઝઘડો થયો, જેના કારણે શારીરિક ઝપાઝપી થઈ. પોલીસ મહિલાને વાહનમાં લઈ ગઈ.
ત્યારબાદ, હોટલના શટર બંધ કરી દેવામાં આવ્યા. આ દરમિયાન, ભીડના કેટલાક સભ્યો બુલડોઝર લઈને હોટલની બહાર પહોંચ્યા, અને ઇમારત તોડી પાડવા અથવા સીલ કરવાની માંગણી કરી. આ હંગામો લગભગ બે કલાક સુધી ચાલ્યો; પોલીસે કાર્યવાહી કરવાની ખાતરી આપ્યા પછી જ ભીડ વિખેરાઈ ગઈ. હોટેલ ગંગા ઇનમાં દરેક સ્તરે બેદરકારી સ્પષ્ટ દેખાઈ. હોટલના રજિસ્ટરોની તપાસ કર્યા પછી, પોલીસે એવા કિસ્સાઓ શોધી કાઢ્યા જ્યાં અગાઉ અધૂરા દસ્તાવેજોના આધારે રૂૂમ ફાળવવામાં આવ્યા હતા. હોટેલનું લાઇસન્સ રદ કરવાની ભલામણ કરતો રિપોર્ટ વહીવટીતંત્રને સુપરત કરવામાં આવ્યો છે.
