ગુજરાતની યુનિવર્સિટીઓમાં વિદેશી વિદ્યાર્થીઓના પ્રવેશ અને વલણમાં નોંધપાત્ર ફેરફારો જોવા મળી રહ્યા છે. વર્ષ 2021માં અફઘાનિસ્તાનમાં તાલિબાનના સત્તા પર આવ્યા બાદ ભારતીય સરકારે અફઘાન વિદ્યાર્થીઓને અપાતી શિષ્યવૃત્તિ ફક્ત ઓનલાઈન અભ્યાસક્રમો પૂરતી જ મર્યાદિત કરી દીધી છે. આ નીતિગત ફેરફારના કારણે ગુજરાતની વિવિધ યુનિવર્સિટીઓમાં ICCR (ઇન્ડિયન કાઉન્સિલ ઓફ કલ્ચરલ રિલેશન્સ) હેઠળ આવતા અફઘાન વિદ્યાર્થીઓની સંખ્યામાં મોટો ઘટાડો નોંધાયો છે.
બીજી બાજુ, આફ્રિકન દેશો અને બાંગ્લાદેશના વિદ્યાર્થીઓ માટે પ્રવેશનું પ્રમાણ વધ્યું છે. હાલમાં ગુજરાતમાં 60થી વધુ દેશોના અંદાજે 1,400 જેટલા વિદ્યાર્થીઓ ICCR હેઠળ અંડરગ્રેજ્યુએટ અને પોસ્ટ ગ્રેજ્યુએટ અભ્યાસક્રમો કરી રહ્યા છે. ICCR ના ગુજરાતના સબ-ઝોનલ ડિરેક્ટર સુભાષ સિંહના જણાવ્યા અનુસાર, ચાલુ શૈક્ષણિક વર્ષ (2026-27) માટે આશરે 350 નવા વિદ્યાર્થીઓએ પ્રવેશ મેળવ્યો છે, જેમાં 55 ટકાથી વધુ વિદ્યાર્થીઓ આફ્રિકન રાષ્ટ્રોના છે. કુલ વિદેશી વિદ્યાર્થીઓમાંથી 800થી વધુ આફ્રિકાના અને 250 બાંગ્લાદેશના છે, જ્યારે ઇન્ડોનેશિયા ત્રીજા સ્થાને છે. અમદાવાદની ગુજરાત યુનિવર્સિટી અને જીટીયુ (GTU) માં જ 600થી વધુ વિદેશી વિદ્યાર્થીઓ નોંધાયેલા છે.
વીર નર્મદ દક્ષિણ ગુજરાત યુનિવર્સિટી (સુરત) અને મહારાજા સયાજીરાવ યુનિવર્સિટી (વડોદરા) જેવા શૈક્ષણિક સંકુલોમાં પણ બાંગ્લાદેશી વિદ્યાર્થીઓની સંખ્યામાં મોટો વધારો જોવા મળ્યો છે. સુરતની યુનિવર્સિટીમાં આ વર્ષે પ્રવેશ મેળવનારા કુલ 85 વિદ્યાર્થીઓમાંથી 29 એકલા બાંગ્લાદેશના છે.
