રશિયાના સાઇબેરિયામાં આવેલી એક લેબોરેટરી સાથે સંકળાયેલા સંભવિત ઇન્ફેક્શનના કિસ્સાએ સમગ્ર દેશમાં ચિંતા જગાવી છે.સાઇબેરિયા વિસ્તારમાં આવેલા શેલેખોવ શહેરની એન્ટી-પ્લેગ રિસર્ચ ઇન્સ્ટિટ્યૂટના ૨૮ વર્ષીય સંશોધકનું ગંભીર ન્યુમોનિયાને કારણે મૃત્યુ થયું હતું, જેના પગલે સત્તાવાળાઓએ સેંકડો લોકોને દેખરેખ હેઠળ મૂક્યા છે. અધિકારીઓએ પ્લેગના કેસની પુષ્ટિ કરી નથી અને જણાવ્યું છે કે રોગચાળો ફેલાયો હોવાના કોઈ પુરાવા નથી. અમેરિકા પણ આ પરિસ્થિતિ પર નજીકથી નજર રાખી રહ્યું છે.
શેલેખોવમાં આવેલી એન્ટી-પ્લેગ રિસર્ચ લેબોરેટરીમાં બનેલી ઘટના બાદ સંભવિત ચેપને લઈને તપાસ શરૂ કરવામાં આવી છે. રશિયાની ચેપ નિયંત્રણ એજન્સીઓ સમગ્ર સ્થિતિ પર નજર રાખી રહી છે. જોકે હાલ ઇરકુત્સ્ક વિસ્તાર, ઇરકુત્સ્ક શહેર અને શેલેખોવની આરોગ્ય તથા રોગચાળાની સ્થિતિ સામાન્ય હોવાનું જણાવવામાં આવ્યું છે.
અહેવાલોમાં મૃતક મહિલાની ઓળખ ડાર્યા શિપિલોવા તરીકે કરવામાં આવી છે. ૨૯ સપ્ટેમ્બરના રોજ ગંભીર ન્યુમોનિયાને કારણે તેમને હોસ્પિટલમાં દાખલ કરવામાં આવ્યા હતા અને વેન્ટિલેટર પર રાખવામાં આવ્યા હતા, પરંતુ બે દિવસ બાદ તેમનું અવસાન થયું હતું.
‘ડેઈલી મેઈલ’ના અહેવાલ મુજબ, તેમણે ડોક્ટરોને જણાવ્યું હતું કે ભૂલથી તેમના હાથમાંથી જીવંત બેક્ટેરિયા ધરાવતી ટેસ્ટ ટ્યુબ તૂટી ગઈ હતી. મંગોલિયાની સરહદ નજીક આવેલા બુર્યાતિયામાં ફિલ્ડ ટ્રિપ દરમિયાન તેઓ બીમાર પડ્યા હતા અને ત્યારબાદ તેમને શેલેખોવ હોસ્પિટલમાં લઈ જવામાં આવ્યા હતા.
ચેપ ફેલાવાની આશંકા વચ્ચે શેલેખોવની હોસ્પિટલમાં પણ સાવચેતી વધારવામાં આવી હોવાનું સામે આવ્યું છે. સ્થાનિક સ્તરે મળતી માહિતી પ્રમાણે લગભગ 200 લોકોને મેડિકલ મોનિટરિંગ હેઠળ રાખવામાં આવ્યા છે. એક ડિલિવરી હોસ્પિટલમાં સાવચેતીના ભાગરૂપે ક્વોરન્ટાઇનની વ્યવસ્થા કરવામાં આવી હોવાના દાવા પણ સામે આવ્યા છે, જોકે તેની સત્તાવાર પુષ્ટિ થઈ નથી. ઇરકુત્સ્કના એક એલ્યુમિનિયમ પ્લાન્ટે પણ કર્મચારીઓને સાવચેતીના ભાગરૂપે માસ્ક પહેરવાની સલાહ આપી છે. દર્દીના સંપર્કમાં આવેલા લોકો પર નજર રાખવામાં આવી રહી છે. અત્યાર સુધી આવા સંપર્કમાં આવેલા લોકોમાં કોઈ ગંભીર લક્ષણો જોવા મળ્યા ન હોવાનું જણાવાયું છે.
‘ડેઈલી મેઈલ’ના અહેવાલ મુજબ, આ વિસ્તારની ત્રણ હોસ્પિટલોમાં ક્વોરેન્ટાઇનના પગલાં અમલમાં મૂકવામાં આવ્યા છે. ગવર્નર ઇગોર કોબઝેવે જણાવ્યું હતું કે સંપર્કમાં આવેલા તમામ લોકોને તબીબી દેખરેખ હેઠળ રાખવામાં આવ્યા છે; કોઈમાં પણ લક્ષણો જોવા મળ્યા નથી અને તમામ પરીક્ષણ પરિણામો નેગેટિવ આવ્યા છે. પ્રયોગશાળા નજીક આવેલા એલ્યુમિનિયમ પ્લાન્ટે કર્મચારીઓને માસ્ક પહેરવાની સૂચના આપી છે, જ્યારે તેના ડાયરેક્ટરે લોકોને અફવાઓ અને ભ્રામક અહેવાલોથી દૂર રહેવા અનુરોધ કર્યો છે.
બુર્યાતિયાના વડા એલેક્સી ત્સિડેનોવે જણાવ્યું હતું કે મૃત્યુનું કારણ પ્લેગ હોઈ શકે છે, પરંતુ આ વિસ્તારમાં પ્લેગનો રોગચાળો ફેલાયો નથી. રોસ્પોટ્રેબનાડઝોરે પ્લેગના કેસની પુષ્ટિ કરી નથી. એજન્સીના ભૂતપૂર્વ વડા ગેન્નાડી ઓનિશેન્કોએ TASSને જણાવ્યું હતું કે રોગકારક જીવાણુ (પેથોજેન) કદાચ પ્લેગ નથી, અને જો તે પ્લેગ હોત તો પણ ઠંડા હવામાનમાં તેના ફેલાવાની શક્યતા ઓછી હોત.
