ઓમાનના દરિયાકાંઠે ભારત તરફ જઈ રહેલા કાર્ગો જહાજ ‘MV Cape Dao’ પર થયેલા હુમલામાં દેવરિયાના સૂરજ યાદવનું મૃત્યુ થયું હતું. મસ્કત સ્થિત ભારતીય દૂતાવાસે ભારતીય નાગરિકના મૃત્યુની પુષ્ટિ કરી છે. દૂતાવાસ જહાજ પર સવાર ભારતીયોની સુરક્ષા અને મૃતકના પાર્થિવ દેહને ભારત પરત લાવવાની પ્રક્રિયા અંગે ઓમાનના સત્તાવાળાઓ સાથે સંકલન સાધી રહ્યું છે.
‘ફોરવર્ડ સીમેન્સ યુનિયન ઓફ ઈન્ડિયા’ (FSUI)એ મૃતકની ઓળખ ગૌરીબજાર પોલીસ સ્ટેશન વિસ્તાર હેઠળના કરમજીતપુર ગામના રહેવાસી સૂરજ યાદવ તરીકે કરી છે. યુનિયનના જણાવ્યા અનુસાર, યાદવ જહાજ પર ‘વાઈપર’ તરીકે નોકરી કરતા હતા.
જહાજ પર કુલ 28 ક્રૂ સભ્યો સવાર હતા. FSUIએ અહેવાલ આપ્યો છે કે તેમાંથી 20 ભારતીય નાગરિકો હતા. જોકે, ભારતીય દૂતાવાસ તરફથી મળેલી શરૂઆતની સત્તાવાર માહિતીમાં 19 ભારતીય નાગરિકોનો ઉલ્લેખ કરવામાં આવ્યો હતો. બાદના અહેવાલોમાં જાણવા મળ્યું હતું કે જહાજ પર 20 ભારતીયો સવાર હતા. ઓમાનના અધિકારીઓના જણાવ્યા અનુસાર હુમલા બાદ જહાજના એન્જિન રૂમમાં આગ લાગી હતી. ઓમાનની રોયલ નેવીએ ૨૭ ક્રૂ સભ્યોને બચાવી લીધા અને તેમને તબીબી સહાય પૂરી પાડી. ઓમાનના સત્તાવાર નિવેદનમાં જહાજ પર થયેલા હુમલા દરમિયાન એક ક્રૂ સભ્યના મૃત્યુની પુષ્ટિ કરવામાં આવી હતી, અને ભારતીય દૂતાવાસે મૃતક ભારતીય નાગરિક હોવાની ઓળખ કરી હતી.
કેન્દ્રીય મંત્રી સર્બાનંદ સોનોવાલે પણ સૂરજ યાદવના મૃત્યુ પર શોક વ્યક્ત કર્યો છે. તેમણે જણાવ્યું હતું કે સૂરજના માથામાં ઈજા થઈ હતી અને સરકાર તેમના પાર્થિવ દેહને સંપૂર્ણ સન્માન સાથે ભારત પાછા લાવવા માટે જરૂરી પગલાં લઈ રહી છે.
