વૈભવ સૂર્યવંશી દુલીપ ટ્રોફીમાં અડધી સદી ફટકારનાર સૌથી નાની ઉંમરનો ખેલાડી બન્યો છે. તેણે સેન્ટ્રલ ઝોન સામે ચાલી રહેલી સેમિફાઇનલ મેચ દરમિયાન આ સિદ્ધિ મેળવી. તેણે માત્ર 42 બોલમાં પોતાની અડધી સદી પૂરી કરી જોકે, 92 રને તે આઉટ થયો હતો.
જ્યારે પણ વૈભવ સૂર્યવંશી મેદાનમાં ઉતરે છે, ત્યારે તે હંમેશા એક રેકોર્ડ બનાવે છે. 31 ઓગસ્ટ, સોમવારના રોજ, સેન્ટ્રલ ઝોન સામે ચાલી રહેલી દુલીપ ટ્રોફી સેમિફાઇનલમાં પૂર્વ ઝોન તરફથી રમતી વખતે, 15 વર્ષીય ખેલાડીએ ધમાકેદાર અડધી સદી ફટકારી. વૈભવે માત્ર 42 બોલમાં પોતાની અડધી સદી પૂરી કરી. આ અડધી સદી સાથે, તેણે 57 વર્ષ જૂનો રેકોર્ડ તોડીને ઇતિહાસ રચ્યો. આમ, વૈભવ સૂર્યવંશી દુલીપ ટ્રોફીમાં ફિફ્ટી ફટકારનાર સૌથી નાની ઉંમરનો ખેલાડી બન્યો છે.
આમ કરીને તેણે ભૂતપૂર્વ ક્રિકેટર લક્ષ્મણ સિંહના રેકોર્ડને તોડી નાખ્યો, જેમણે 1969માં 16 વર્ષ અને 23 દિવસની ઉંમરે આ રેકોર્ડ બનાવ્યો હતો. હવે, વૈભવ સૂર્યવંશીએ 15 વર્ષ અને 157 દિવસની ઉંમરે ફિફ્ટી ફટકારીને આ રેકોર્ડ પોતાના નામે કર્યો છે. નોંધનીય છે કે, આ યાદીમાં પિયુષ ચાવલાનો પણ સમાવેશ થાય છે, જેમણે 2005માં 16 વર્ષ અને 370 દિવસની ઉંમરે ફિફ્ટી ફટકારી હતી.
દુલીપ ટ્રોફીનો પહેલો સેમિફાઇનલ રજત પાટીદારના નેતૃત્વ હેઠળના સેન્ટ્રલ ઝોન અને ઇશાન કિશનના પૂર્વ ઝોન વચ્ચે રમાઈ રહ્યો છે. મેચના પહેલા દિવસે, સેન્ટ્રલ ઝોન 266 રનમાં ઓલઆઉટ થઈ ગયું. રિંકુ સિંહ એકમાત્ર બેટ્સમેન હતો જેણે 50 રનનો આંકડો પાર કર્યો હતો.
તેણે 60 રનની મહત્વપૂર્ણ ઇનિંગ રમી. દરમિયાન, પૂર્વ ઝોન માટે, મુકેશ કુમાર અને અભિજીત કે. સરકારે 3-3 વિકેટ લીધી, જ્યારે મોહમ્મદ શમી અને મોહમ્મદ કૌનૈન કુરેશીએ 2-2 વિકેટ લીધી. વૈભવ સૂર્યવંશી પાછલી દુલીપ ટ્રોફી મેચમાં બેટિંગમાં સારું પ્રદર્શન કરી શક્યો ન હતો.
વૈભવ સૂર્યવંશી અને અભિમન્યુ ઈશ્વરને બીજા દિવસે શરૂૂઆત કરી. બંને બેટ્સમેન ઝડપથી રન બનાવી રહ્યા છે. પૂર્વ ઝોને માત્ર 8મી ઓવરમાં વિકેટ ગુમાવ્યા વિના 50 રનનો આંકડો પાર કર્યો. 40 રન પર બેટિંગ કરતી વખતે વૈભવ સૂર્યવંશીને જીવનદાન આપવામાં આવ્યું. તેણે 42 બોલમાં પોતાની અડધી સદી પૂરી કરી. આ સાથે, પૂર્વ ઝોને પણ 15 ઓવરમાં 100 રનનો આંકડો પાર કરી લીધો.
