તમામ મતદાન મથકોએ સરહદી જાપ્તા જેવો જડબેસલાક બંદોબસ્ત : સિંઘમ કક્ષાના અનેક IPS અધિકારીઓનો વિશાળ કાફલો મેદાનમાં
આજે વહેલી સવારથી પશ્ર્ચિમ બંગાળની કુલ 294 બેઠકોમાંથી બાકી રહેલી 142 બેઠકો માટેના મતદાનના બીજા આખરી નિર્ણાયક રાઉન્ડની શરૂઆત થઈ ગઈ છે અને સવારથી જ મતદાન મથકો પર લાંબી લાઈનો જોવા મળી છે. પ્રથમ તબક્કાની જેમ આ બીજા તબક્કામાં પણ 90 ટકાથી વધુ મતદાન થવાની ચુંટણી પંચને આશા છે. પંચે બંગાળના તમામ મતાદિકાર ધરાવતા નાગરિકોને નિર્ભય થઈ ને મતદાન કરવા આહવાન આપ્યું છે.
પશ્ચિમ બંગાળ વિધાનસભા ચૂંટણીમાં આજે બીજા અને અંતિમ તબક્કાનું મતદાન ચાલી રહ્યું છે.
સવારે 7 વાગ્યાથી તમામ મતદાન કેન્દ્રો પર મતદાન શરૂૂ થઈ ગયું છે અને સાંજે 6 વાગ્યા સુધી ચાલશે.
કુલ 294 બેઠકોમાંથી 142 બેઠકો પર આજે મતદાન થઈ રહ્યું છે, જે મુખ્યત્વે દક્ષિણ બંગાળના 7 જિલ્લાઓમાં ફેલાયેલી છે. આ તબક્કામાં કુલ 1,448 ઉમેદવારો પોતાની કિસ્મત અજમાવી રહ્યા છે. સૌથી મહત્વપૂર્ણ મુકાબલો ભવાનીપુર બેઠક પર છે, જ્યાં મુખ્યમંત્રી મમતા બેનરજી અને વિપક્ષના નેતા તથા ભાજપા ઉમેદવાર શુભેન્દુ અધિકારી સામસામે છે.
મુખ્યમંત્રી મમતા બેનરજી, વિપક્ષના નેતા શુભેન્દુ અધિકારી ઉપરાંત સ્વપન દાસગુપ્તા, રાસબિહારી, ચંદ્રિમા ભટ્ટાચાર્ય, દીપ્ષિતા ધર, મીનાક્ષી મુખર્જી, અધીર રંજન ચૌધરી, ફરીહાદ હકીમ, અર્જુન સિંહ, તાપસ રોય, અરુપ વિશ્વાસ, શુભંકર સરકાર, કલ્તાન દાસગુપ્તા સહિત અનેક જાણીતા ચહેરાઓના ભાગ્યનો નિર્ણય EVM કેન્દ્ર પર થશે. કેન્દ્ર સરકારના ગૃહખાતાએ સિંઘમ જેવા આઈપીએસ અધિકારીઓનો મોટો કાફલો મેદાનમાં ઉતાર્યો છે.
પશ્ચિમ બંગાળમાં બીજા તબક્કામાં લગભગ 3.21 કરોડ મતદાતાઓ મતદાન કરશે. ચૂંટણી પંચે 142 મતવિસ્તારોમાં હજારો પોલિંગ બૂથ બનાવ્યા છે. 1,200થી વધુ મતદાતાઓ ધરાવતા બૂથ માટે સહાયક બૂથ બનાવવાનો પણ આદેશ આપવામાં આવ્યો છે. ચૂંટણી પંચે ચોતરફ સરહદી જાપ્તા જેવો જડબે સલાક બંદોબસ્ત ગોઠવ્યો છે.
મતદાનમાં પારદર્શિતા જાળવવા માટે તમામ સંવેદનશીલ બૂથ પર LIVE webcastની વ્યવસ્થા કરવામાં આવી છે, જેથી ચૂંટણી પંચ સીધી દેખરેખ રાખી શકે. દરેક બૂથ પર પીવાના પાણી, બેસવાની જગ્યા અને દિવ્યાંગ તથા વરિષ્ઠ નાગરિકો માટે રેમ્પની સુવિધા સુનિશ્ચિત કરવામાં આવી છે. પોલિંગ બૂથની અંદર મોબાઇલ ફોન કે કેમેરા લઈ જવાની કડક મનાઈ છે. ચૂંટણી પંચે લોકોને નિર્ભય રીતે મતદાન કરવા હાકલ કરી છે.
આ વખતે સુરક્ષાને ધ્યાનમાં રાખીને લગભગ 2,400 CAPF કંપનીઓ તૈનાત કરવામાં આવી છે. બીજા તબક્કાની તમામ 142 બેઠકો પર કેન્દ્રિય બળોની ભારે તૈનાતી છે. ચૂંટણી પંચે સંવેદનશીલ વિસ્તારોમાં ‘એરિયા ડોમિનેશન’ અને ‘રૂૂટ માર્ચ’ દ્વારા મતદાતાઓમાં વિશ્વાસ જાગૃત કરવાનો પ્રયાસ કર્યો છે. મતદાન પછી પણ લગભગ 700 કંપનીઓ રાજ્યમાં રાખવાનો નિર્ણય લેવાયો છે, જેથી હિંસા અટકાવી શકાય. મતદાન સવારે 7 વાગ્યાથી સાંજે 6 વાગ્યા સુધી ચાલશે. મતગણતરી અને પરિણામ 4 મે, 2026ના રોજ જાહેર થશે.
ભાજપ કાર્યાલયમાં તોડફોડ, કાર્યકર પર આક્રમક હુમલાના બનાવો
પશ્ચિમ બંગાળમાં ઉચ્ચ દાવવાળી વિધાનસભા ચૂંટણીનો બીજો તબક્કો હિંસાની ઘટનાઓ અને મતદારોને ધાકધમકી અને ટેકનિકલ ખામીઓના આરોપો સાથે શરૂૂ થયો. પશ્ચિમ બંગાળ પોલીસે જણાવ્યું હતું કે મતદાનના શરૂૂઆતના કલાકો દરમિયાન છપરા, શાંતિપુર, નિમતાલા અને ભાંગર સહિત પશ્ચિમ બંગાળના ઘણા ભાગોમાં હિંસા અને તોડફોડની ઘટનાઓ નોંધાઈ હતી. નાદિયા જિલ્લાના ઠાપરામાં મતદાન એજન્ટ પર હુમલો કરવાનો ભાજપે આરોપ મુકયો છે.
જે ભાજપનો કાર્યકર હતો જેને હોસ્પીટલમાં દાખલ કરાયો છે. પશ્ચિમ બંગાળના મુખ્યમંત્રી મમતા બેનર્જીએ તેમના ભવાનીપુર વિધાનસભા મતવિસ્તારના વિવિધ બૂથની મુલાકાત લીધી હતી, જ્યાં તેઓ પ્રતિષ્ઠાના જંગમાં વિરોધ પક્ષના નેતા સુવેન્દુ અધિકારીનો સામનો કરી રહ્યા છે, જેને નંદીગ્રામના પ્રતીકાત્મક રિમેચ તરીકે જોવામાં આવે છે, જ્યાં તેમણે 2021 માં તેમને હરાવ્યા હતા. શાંતિપુરામાં ભાજપની ઓફિસમાં ટીએમસી કાર્યકરોએ આજે તોડફોડ કરી હતી. સામે પક્ષે ટીએમસી કાર્યકર્તા ઉપર પણ હુમલો કરવામાં આવ્યો છે. પત્રકારો સાથે વાત કરતી વખતે, મમતાએ દાવો કર્યો હતો કે ઘણા નિરીક્ષકો બહારથી આવ્યા છે અને ભાજપના નિર્દેશો મુજબ કાર્ય કરી રહ્યા છે.
