સ્ટ્રેટ ઓફ હોર્મુઝને સુરક્ષિત રીતે ખુલ્લુ રાખવા મહત્વ મૂકાયું
અમેરિકી રાષ્ટ્રપતિ ડોનાલ્ડ ટ્રમ્પ અને ભારતના વડાપ્રધાન નરેન્દ્ર મોદી વચ્ચે 24 માર્ચ, 2026ના રોજ થયેલી ટેલિફોન વાતચીતમાં વિશ્વના સૌથી અમીર વ્યક્તિ એલોન મસ્ક પણ જોડાયા હતા. આ વાતચીત વેસ્ટ એશિયા (મધ્ય પૂર્વ)માં ચાલી રહેલા સંકટ, ખાસ કરીને ઈરાન સાથેના યુદ્ધ અંગે હતી.
વ્હાઇટ હાઉસે આ વાતચીતને “ઉત્પાદક” ગણાવી છે. વ્હાઇટ હાઉસના પ્રેસ સેક્રેટરી કેરોલિન લેવિટે જણાવ્યું કે, રાષ્ટ્રપતિ ટ્રમ્પ અને વડાપ્રધાન મોદી વચ્ચે ઉત્તમ સંબંધ છે અને આ વાતચીત ઉત્પાદક હતી.
ન્યૂયોર્ક ટાઈમ્સના અહેવાલ મુજબ, બે અનામી અમેરિકી અધિકારીઓએ પુષ્ટિ કરી છે કે એલોન મસ્ક આ ફોન કોલમાં સામેલ હતા. આ એક અસામાન્ય ઘટના માનવામાં આવી રહી છે કારણ કે એક ખાનગી નાગરિકનું યુદ્ધકાળ દરમિયાન બે દેશોના વડાઓ વચ્ચેની વાતચીતમાં સામેલ થવું સામાન્ય નથી.
વાતચીતમાં વડાપ્રધાન મોદીએ સ્ટ્રેટ ઓફ હોર્મુઝને ખુલ્લું, સુરક્ષિત અને સુલભ રાખવાના મહત્ત્વ પર ભાર મૂક્યો હતો. તેમણે જણાવ્યું કે આ માર્ગ વૈશ્વિક શાંતિ, સ્થિરતા અને આર્થિક સુખાકારી માટે અત્યંત મહત્ત્વનો છે. આ સ્ટ્રેટ દ્વારા વિશ્વના મોટા ભાગના તેલનું પરિવહન થાય છે. નોંધનીય છે કે આ મોદી અને ટ્રમ્પ વચ્ચેની પ્રથમ વાતચીત હતી જે 28 ફેબ્રુઆરીએ શરૂૂ થયેલા વેસ્ટ એશિયા સંઘર્ષ પછી થઈ છે.
મસ્કની સામેલગીરીનું કારણ? અહેવાલો અનુસાર, છેલ્લા વર્ષે મસ્કે સરકારી કામ (ફેડરલ વર્કફોર્સ ઘટાડવાનું) છોડ્યા પછી ટ્રમ્પ સાથે તેમના સંબંધોમાં તિરાડ પડી હતી. હવે મસ્કની આ વાતચીતમાં સામેલગીરી એ સૂચવે છે કે બંને વચ્ચે સંબંધો સુધરી રહ્યા છે. જો કે, મસ્કે આ વાતચીતમાં બોલ્યા હતા કે નહીં તે સ્પષ્ટ નથી. વ્હાઇટ હાઉસ અને ભારતીય સરકાર તરફથી મસ્કની હાજરી અંગે કોઈ સત્તાવાર પુષ્ટિ અથવા નકાર કરવામાં આવ્યો નથી.
