સિડનીમાં આતંકી હુમલો કરનાર હુમલાખોરોનું પાકિસ્તાની કનેક્શન સામે આવ્યું, વીકએન્ડના બહાને નીકળ્યા હતા પિતા-પુત્ર

ઓસ્ટ્રેલિયાના બોન્ડી બીચ પર થયેલા ગોળીબારમાં ૧૬ લોકોની હત્યા કરનારા આતંકવાદીઓની ઓળખ થઈ છે. આ બંને આતંકીઓ સંબંધમાં પિતા-પુત્ર છે. 50 વર્ષીય સાજિદ અકરમ અને તેના 24 વર્ષીય પુત્ર નવીદ અકરમ એ યહૂદીઓના તહેવાર હનુક્કાહની ઉજવણી દરમિયાન દરિયાકિનારે એકઠા થયેલા લોકો પર ગોળીબાર કર્યો હતો.

આંતરરાષ્ટ્રીય સમાચાર એજન્સી સીબીએસ અનુસાર, નવીદ અકરમ પાકિસ્તાની નાગરિક છે.

ન્યૂ સાઉથ વેલ્સ પોલીસ કમિશનર મેલ લેન્યોને એક પત્રકાર પરિષદમાં જણાવ્યું હતું કે ૫૦ વર્ષીય આતંકવાદીને પોલીસે ગોળી મારીને મારી નાખ્યો હતો, જ્યારે ૨૪ વર્ષીય આતંકવાદી નવીદ હોસ્પિટલમાં દાખલ છે. નવીદ અકરમ પાસે ઓસ્ટ્રેલિયાના ન્યૂ સાઉથ વેલ્સનું ડ્રાઇવિંગ લાઇસન્સ પણ છે. આ હુમલામાં અત્યાર સુધીમાં ૧૬ લોકો માર્યા ગયા છે અને ૪૦ ઘાયલ થયા છે.

હુમલામાં સામેલ આતંકવાદીઓ સાજિદ અકરમ અને નવીદ અકરમે તેમના પરિવારને કહ્યું હતું કે તેઓ દક્ષિણ કિનારે માછીમારી કરવા જઈ રહ્યા છે. ત્યારબાદ તેઓએ હુમલો કર્યો. હુમલા પછી પોલીસે સિડનીના પશ્ચિમમાં બોનીરિગ સ્થિત નવીદના ઘરને ઘેરી લીધું હતું. નવીદની માતા વેરેનાએ મીડિયાને જણાવ્યું કે તેનો પુત્ર, જે બેરોજગાર રાજમિસ્તરી હતો, તેણે રવિવારે સવારે છેલ્લીવાર પરિવાર સાથે વાત કરી હતી અને કહ્યું હતું કે તે વીકએન્ડ પર તેના પિતા સાથે જર્વિસ બે ગયો હતો.

લેન્યોને જણાવ્યું કે તપાસકર્તાઓએ ઘટનાસ્થળેથી શંકાસ્પદોના છ લાઇસન્સ પ્રાપ્ત હથિયારો જપ્ત કર્યા. તેમણે ઉમેર્યું કે સાજિદ પાસે લગભગ દસ વર્ષથી બંદૂકનું લાઇસન્સ હતું. પોલીસે એક શંકાસ્પદ વ્યક્તિના વાહનમાંથી એક ઇમ્પ્રુવાઇઝ્ડ એક્સપ્લોઝિવ ડિવાઇસ (IED) અને ISISનો ધ્વજ મળી આવ્યો હોવાનો પણ અહેવાલ આપ્યો છે.

પોલીસ કહે છે કે 50 વર્ષીય શૂટર, જેને ગઈકાલે રાત્રે બોન્ડી બીચ પર થયેલા ઘાતક હુમલા બાદ પોલીસે ગોળી મારીને મારી નાખ્યો હતો, તેની પાસે મનોરંજન માટે બંદૂકનું લાઇસન્સ હતું.

NSW પોલીસ કમિશનર મેલ લેન્યોને કહ્યું કે સાજિદ અકરમ એક ગન ક્લબનો સભ્ય હતો અને રાજ્યના કાયદા હેઠળ, ફાયરઆર્મ્સ લાઇસન્સ મેળવવાનો હકદાર હતો. લેન્યોને કહ્યું, “અમે આ હુમલા પાછળના હેતુની તપાસ કરીશું, અને મને લાગે છે કે તે તપાસનો એક મહત્વપૂર્ણ ભાગ છે.”

પ્રધાનમંત્રી એન્થોની આલ્બાનીઝે કહ્યું કે બંદૂકધારીઓ “હનુક્કાહના પ્રથમ દિવસે જાણી જોઈને યહૂદી સમુદાયને નિશાન બનાવી રહ્યા હતા.” આ હુમલામાં મૃત્યુ પામેલા લોકોની ઉંમર 10 વર્ષથી 87 વર્ષની વચ્ચે છે.

આતંકી નવીદની માતા વેરેનાએ સિડની મોર્નિંગ હેરાલ્ડને જણાવ્યું હતું કે તેના પુત્ર પાસે કોઈ હથિયાર નહોતું અને તે વધુ સોશિયલ નહોતો. તે બે મહિના પહેલા જ તેની ઈંટ લગાવવાની નોકરીમાંથી બેરોજગાર થયો હતો કારણ કે તેની કંપની નાદાર થઈ ગઈ હતી. વેરેનાએ કહ્યું કે નવીદ દારૂ કે સિગારેટ પીતો ન હતો અને માત્ર તેના કામથી જ મતલબ રાખતો હતો. અકરમને 2022ની એક સોશિયલ મીડિયા પોસ્ટમાં ટેગ કરવામાં આવ્યો હતો, જેમાં જણાવાયું હતું કે તેણે અલ-મુરાદ ઇન્સ્ટિટ્યૂટમાં કુરાનનો અભ્યાસ પૂર્ણ કરી લીધો હતો.