2002ના નીતિશ કટારા હત્યા કેસમાં સુપ્રીમ કોર્ટે એક મહત્ત્વનો ચુકાદો આપ્યો છે. જેમાં કોર્ટ દ્વારા દોષિત સુખદેવ યાદવ ઉર્ફે પહેલવાનને મુક્ત કરવાનો આદેશ આપવામાં આવ્યો છે. સુપ્રીમ કોર્ટે કહ્યું કે, તેણે આ વર્ષે માર્ચમાં તેની 20 વર્ષની સજા પૂરી કરી લીધી છે. ગયા મહિને સુપ્રીમ કોર્ટે તેને તેની માફી અરજી પેન્ડિંગ રહે ત્યાં સુધી રજા આપી હતી.
હવે અંતિમ રાહત તરીકે, સુપ્રીમ કોર્ટે તેની મુક્તિનો આદેશ આપ્યો છે. સજા સમીક્ષા બોર્ડે યાદવની માફી અરજીને તેના આચરણનો હવાલો આપીને ફગાવી દીધી હતી. સુપ્રીમ કોર્ટે બોર્ડની કાર્યવાહી પર આશ્ચર્ય વ્યક્ત કર્યું અને કહ્યું કે તે કોર્ટ દ્વારા પસાર કરાયેલા આદેશને કેવી રીતે દબાવી શકે છે.
જસ્ટિસ બી.વી. નાગરત્ન અને જસ્ટિસ કે.વી. વિશ્વનાથનની ખંડપીઠે કહ્યું કે, ન્યાયિક સત્તાના આદેશને કેવી રીતે દબાવી શકાય? જો આ વલણ રહ્યું, તો દરેક દોષિત જેલમાં જ મરી જશે. કારોબારીનું આ કેવું વર્તન છે? યાદવને 20 વર્ષની સજા પૂરી કર્યા પછી તેને મુક્ત કરી દેવો જોઈએ.
દિલ્હી સરકાર તરફથી હાજર રહેલા એડિશનલ સોલિસિટર જનરલ અર્ચના પાઠક દવેએ દલીલ કરી હતી કે, 20 વર્ષની સજા પછી આપમેળે મુક્તિ થઈ શકતી નથી અને આજીવન કેદનો અર્થ એ છે કે બાકીના કુદરતી જીવન માટે જેલમાં રહેવું. યાદવ તરફથી હાજર રહેલા વરિષ્ઠ વકીલ સિદ્ધાર્થ મૃદુલે દલીલ કરી હતી કે તેમના ક્લાયન્ટે 9 માર્ચ, 2025ના રોજ તેમની સજા પૂરી કરી દીધી છે. યાદવને 9 માર્ચ પછી કસ્ટડીમાં રાખવા માટે કોઈપણ માન્ય વાજબીપણું નકારી કાઢ્યું અને કહ્યું કે દિલ્હી સરકાર દ્વારા સજાનું અર્થઘટન ખોટું છે.
