ક્રિકેટની દુનિયાના દિગ્ગજોએ પાકિસ્તાનના પૂર્વ કપ્તાન ઈમરાન ખાનના ખરાબ સ્વાસ્થ્ય પર ચિંતા વ્યક્ત કરી છે અને પાકિસ્તાનની સરકારને પૂર્વ પાકિસ્તાની કપ્તાનને સારી સુવિધા આપવાની અપીલ કરી છે. ભારતના સુનીલ ગાવસ્કર અને કપિલ દેવ સહિત દુનિયાભરના 14 પૂર્વ કપ્તાનોએ પાકિસ્તાન સરકારને લેટર લખીને પૂર્વ પ્રધાનમંત્રી અને વર્લ્ડ કપ વિજેતા કપ્તાન ઈમરાન ખાન સાથે જેલમાં નિષ્પક્ષ વ્યવહાર કરવાની માગ કરી છે. હાલમાં જ ઈમરાન ખાનના સ્વાસ્થ્યને લઈને મોટા સમાચાર આવ્યા હતા. મીડિયા રિપોર્ટમાં દાવો કર્યો હતો કે જેલમાં બંધ ઈમરાન ખાનની આંખોની રોશની સતત ઘટી રહી છે. તેને લઈને 17 ફેબ્રુઆરીના રોજ જાહેર કરવામાં આવેલા સંયુક્ત નિવેદનમાં કેટલાય દેશોના પૂર્વ ક્રિકેટ કપ્તાનોએ તેમના સ્વાસ્થ્ય અને જેલની પરિસ્થિતિઓને લઈને ગંભીર ચિંતા વ્યક્ત કરી છે.
આ લેટર પર હસ્તાક્ષર કરનારામાં સુનીલ ગાવસ્કર, કપિલ દેવ, માઈકલ એથરટન, એલન બોર્ડર, ગ્રેગ ચેપલ, ઈયાન ચેપલ, બેલિંડા ક્લાર્ક, ડેવિડ ગોવર, નાસિર હુસૈન, ક્લાઈવ લોયડ, સ્ટીફન વો અને જોન રાઈટ જેવા દિગ્ગજ સામેલ છે. આ તમામે પોતાના લેટરમાં ઈમરાન ખાનના ક્રિકેટ યોગદાનને યાદ અપાવતા પાકિસ્તાની સરકાર પાસે અપીલ કરી છે. દિગ્ગજ ક્રિકેટરોએ લેટરમાં લખ્યું છે કે, અમે અમારી નેશનલ ક્રિકેટ ટીમોના પૂર્વ કપ્તાન પાકિસ્તાનના જાણીતા ક્રિકેટર અને વર્લ્ડ ક્રિકેટના એક મહાન વ્યક્તિ ઈમરાન ખાન સાથે થઈ રહેલા કથિત વર્તન અને જેલની સ્થિતિ વિશે ઊંડા ચિંતા સાથે લખી રહ્યા છીએ. ખેલમાં ઈમરાન ખાનના યોગદાનને આખી દુનિયા વખાણે છે. કેપ્ટન તરીકે તેમણે પાકિસ્તાનને 1992માં ક્રિકેટ વર્લ્ડ કપમાં ઐતિહાસિક જીત અપાવી. આ જીત સ્કિલ, હિમ્મત, લીડરશીપ અને સ્પોર્ટમેનશિપ પર બની હતી. જેણે સરહદ પાર જઈને કેટલીય પેઢીઓને પ્રેરણા આપી.
