નવા ચૂંટાયેલ ટ્રમ્પનો વધુ એક નિર્ણય

અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે ગુરુવારે પોતાના નવા મંત્રીના નામની જાહેરાત કરી છે. રસી વિરોધી કાર્યકર્તા રોબર્ટ એફ. કેનેડી જુનિયરને આરોગ્ય અને માનવ સેવા વિભાગની જવાબદારી સોંપવામાં આવી છે. ખૂબ લાંબા સમયથી, ફાર્માસ્યુટિકલ કંપનીઓએ અમેરિકનો પર જુલમ કર્યો છે, ટ્રમ્પે ગુરુવારે કેનેડી જુનિયરની નિમણૂકની જાહેરાત કરતી તેમની ટ્રુથ સોશિયલ સાઇટ પરની પોસ્ટમાં જણાવ્યું હતું. જાહેર આરોગ્યની વાત આવે ત્યારે આ કંપનીઓ છેતરપિંડી, નકલી સમાચાર અને ખોટી માહિતી ફેલાવવામાં રોકાયેલી છે.

તેમણે કહ્યું કે કેનેડી ક્રોનિક રોગચાળાનો અંત લાવશે અને અમેરિકાને ફરીથી મહાન અને સ્વસ્થ બનાવશે.
કેનેડી જુનિયર વિશ્વના સૌથી અગ્રણી રસી વિરોધી કાર્યકરોમાંના એક છે અને તેમણે લાંબા સમયથી આગ્રહ કર્યો છે કે રસીઓ ઓટીઝમ અને અન્ય સ્વાસ્થ્ય સમસ્યાઓનું કારણ બને છે. દેશના સૌથી પ્રખ્યાત રાજકીય પરિવારોમાંના એકમાંથી આવતા, કેનેડી સ્વર્ગસ્થ એટર્ની જનરલ રોબર્ટ એફ. કેનેડીના પુત્ર અને ભૂતપૂર્વ યુએસ પ્રમુખ જ્હોન એફ. કેનેડીના ભત્રીજા છે. તેમણે ગયા વર્ષે પ્રથમ વખત ડેમોક્રેટિક નોમિનેશન માટે રાષ્ટ્રપતિ જો બિડેનને પડકાર ફેંક્યો હતો. આ પછી તેમણે અપક્ષ ઉમેદવાર તરીકે ચૂંટણી લડવાનો નિર્ણય કર્યો. જોકે, બાદમાં એક ડીલ હેઠળ તેણે ટ્રમ્પને સમર્થન આપવાનો દાવો પાછો ખેંચી લીધો હતો. આ ડીલ હેઠળ, તેમને ટ્રમ્પના બીજા કાર્યકાળમાં આરોગ્ય નીતિની દેખરેખની ભૂમિકાનું વચન આપવામાં આવ્યું હતું.

આંતરરાષ્ટ્રીય મુસાફરો ઘટતા પાયલોટને ચૂકવવાના પગારના પણ ફાંફા

યુક્રેન યુદ્ધને લગભગ 3 વર્ષ થવા આવ્યાં છે. બંને દેશો એક બીજા ઉપર હુમલા કરી રહ્યા છે. આ યુદ્ધ લાંબુ ખેંચવા માટે પુતિન ઉપર આક્ષેપો મુકાય છે. તેવામાં રશિયાનો વિમાન ઉદ્યોગ એક તાજા સંકટમાં ફસાયો છે. મીડિયા રિપોર્ટ પ્રમાણે દૈનિક ઇઝવેષ્ટિયામાં કહેવામાં આવ્યું છે કે રશિયાની 30 એરલાઈન્સ કંપનીઓ દેવાળુ ફૂંકવાની કગારે પહોંચી ગઈ છે. આ 30 કંપનીઓ દેશના 25 ટકા યાત્રીઓને લઇ જાય છે. પરંતુ વિત્તીય બોજાને લીધે 2025માં તે દેવાળું ફૂંકે તેમ છે.

આ કંપનીઓ પૈકી મોટા ભાગની કંપનીઓએ તો વિદેશોમાંથી વિમાનો ભાડા પટ્ટે લીધેલાં છે.
યુક્રેન યુદ્ધ શરૂૂ થતાં પશ્ચિમના દેશોએ રશિયા ઉપર આર્થિક પ્રતિબંધો મુક્યા છે. તેથી રશિયાને આર્થિક નુકસાન થઇ રહ્યું છે. આ 25 પૈકી મોટા ભાગની કંપનીઓએ હવે ભાડા પટ્ટે વિમાનો લેવાનું બંધ કરવું પડયું છે. પુતિને તે કંપનીઓ માટે દેવાં માફીની કશીક યોજના બનાવી છે. પરંતુ તે કંપનીઓ ઉપર ટેક્ષનો બોજ ઘણો વધી ગયો છે. આ કંપનીઓ ઉપર 25 ટકા ટેક્ષ લાગે છે. મૂળ તો 28 ટકા હતો. જે ઘટાડવો પડયો છે.

એ-320 વિમાનોની સંભાળ માટે માસિક 80 હજારથી 1 લાખ 20 હજાર ડોલરનો ખર્ચ થાય છે. આથી ઘણી આંતરિક વિમાન સેવા રદ્દ કરવી પડી છે. પાયલોટને પગાર આપવાનાં ફાંફાં છે તેથી તેઓ નોકરી છોડી રહ્યા છે. તેથી વિમાનોના પરિચાલનમાં મુશ્કેલી થાય છે. સ્ટાફની ઘટને લીધે, શેરેમેત્યેવો ઇંટરનેશનલ એરપોર્ટ પરની 68 ઉડાનો રદ કરવી પડી છે.

આ સંકટમાંથી બહાર નીકળવા રશિયા નાના નાના પાડોશી દેશો પાસેથી મદદ માગે છે તે કાજાકિસ્તાન અને ઉઝબેકિસ્તાન સહિત કેટલાયે મધ્ય એશિયાઈ નાના દેશો પાસેથી મદદ માગે છે. જેથી આંતરિક ઉડ્ડયનો ચાલતાં રહી શકે. રશિયાના પરિવહન મંત્રીએ પણ આ વાતની પુષ્ટિ કરી છે.

પાકિસ્તાનની સરકાર પોતાના દેશમાં આતંકવાદને અંકુશમાં રાખવામાં સક્ષમ નથી અને ભારત પર ગંભીર આરોપો લગાવી રહી છે. પાકિસ્તાને છેલ્લા કેટલાક દાયકાઓથી તેની ધરતી પર આતંકવાદને ખીલવા દીધો છે. હવે આ આતંકવાદીઓ ખુદ પાકિસ્તાન માટે માથાનો દુખાવો બની ગયા છે. પાકિસ્તાનમાં દરરોજ ક્યાંક ને ક્યાંક આતંકવાદી હુમલા થઈ રહ્યા છે. જેમાં અનેક લોકોએ જીવ પણ ગુમાવ્યા છે. આ બધાની વચ્ચે પાકિસ્તાન આતંકવાદને કાબૂમાં લેવાને બદલે ભારત પર દોષારોપણ કરવામાં વ્યસ્ત છે. પાકિસ્તાન ભારત પર તેના દેશમાં થઈ રહેલા આતંકવાદી હુમલાઓને કથિત રીતે સમર્થન આપવાનો આરોપ લગાવી રહ્યું છે.

પાકિસ્તાનના વિદેશ મંત્રાલયના પ્રવક્તા મુમતાઝ ઝહરા બલોચે ગઈ કાલે (14 નવેમ્બર) સાપ્તાહિક બ્રીફિંગમાં ભારત પર આરોપ મૂક્યો હતો અને કહ્યું હતું કે, “આ આતંકવાદી જૂથોને ભારત તરફથી સમર્થન મળે છે.” પાકિસ્તાનના પાયાવિહોણા આરોપોને સમર્થન આપવા માટે મંત્રાલયના પ્રવક્તાએ કુલભૂષણ જાધવની ધરપકડનો ઉલ્લેખ કર્યો. પાકિસ્તાને 2016માં કુલભૂષણ જાધવને RAWનો એજન્ટ ગણાવીને ધરપકડ કરી હતી. પાકિસ્તાન ભારત ઉપરાંત અફઘાનિસ્તાન પર નારાજ છે. તેણે અફઘાનિસ્તાનને આતંકવાદી સંગઠનો સામે કડક કાર્યવાહી કરવા કહ્યું છે.

પાકિસ્તાનના વિદેશ મંત્રાલયના પ્રવક્તા મુમતાઝ ઝહરા બલોચે કહ્યું, “અફઘાનિસ્તાને તેની ધરતીનો ઉપયોગ પાકિસ્તાન અથવા અન્ય કોઈ પાડોશી વિરુદ્ધ આતંક ફેલાવવા માટે થવા દેવો જોઈએ નહીં.” પાકિસ્તાને અફઘાનિસ્તાનને વિનંતી કરી છે કે તે વિનંતીઓને ગંભીરતાથી લે. પાકિસ્તાનના લોકોની ધીરજની પરીક્ષા ન લેવાની ચેતવણી પણ આપી હતી.

પાકિસ્તાનના બલૂચિસ્તાનમાં 9 નવેમ્બરના રોજ બલૂચ લિબરેશન આર્મી (BLA)એ શહેરના રેલવે સ્ટેશન પર હુમલો કર્યો. આ આતંકી હુમલામાં કુલ 26 લોકોએ જીવ ગુમાવ્યા હતા. તે જ સમયે, 62 લોકો ગંભીર રીતે ઘાયલ થયા હતા. આ સિવાય ગુરુવારે (14 નવેમ્બર) ઉત્તર-પશ્ચિમ પાકિસ્તાનમાં પાકિસ્તાની તાલિબાન આતંકવાદી (TTP)ના ઘરમાં બોમ્બ વિસ્ફોટ થયો હતો. જેમાં બે બાળકો અને પાંચ આતંકવાદીઓ માર્યા ગયા હતા. પાકિસ્તાને અફઘાનિસ્તાન પર ટીટીપી આતંકવાદીઓને પોતાની જમીન આપવાનો આરોપ લગાવ્યો છે.