ફિલિપાઇન્સ- તાઇવાનમાં તબાહી મચાવ્યા પછી ‘પર્વતોમાંથી સુનામી’ તરીકે વર્ણવાયેલા વાવાઝોડાએ હોંગકોંગને ખેદાનમેદાન કર્યું: આજે ચીન પર ત્રાટકશે
છેલ્લા બે દિવસમાં તાઈવાન અને ફિલિપાઇન્સમાં ભારે વિનાશ કર્યા પછી, વર્ષોમાં સૌથી શક્તિશાળી પૈકીનું એક સુપર ટાયફૂન રાગાસા, બુધવારે બપોર અને સાંજની વચ્ચે ચીનના શહેરો તૈશાન અને ઝાંઝિયાંગ વચ્ચે લેન્ડફોલ કરવાની તૈયારીમાં છે. આ વાવાઝોડાથી તાઇવાનના લોકપ્રિય પર્યટન કેન્દ્ર પૂર્વીય કાઉન્ટી હુઆલિયનમાં અત્યાર સુધીમાં ચૌદ લોકોના મોત થયા છે, જ્યારે સુપર ટાયફૂન રાગાસા દરમિયાન પર્વતોમાં એક અવરોધક તળાવ છલકાઇને એક શહેરને ડૂબાડી દેતાં 124 લોકો ગુમ થયા છે, અહેવાલ મુજબ, તાઇવાનના સમગ્ર પ્રદેશોએ બચાવ ટીમો હુઆલિયનમાં મોકલી છે, સૈન્યએ મદદ માટે 340 સૈનિકો મોકલ્યા છે.
શ્રેણી પાંચ વાવાઝોડાની સમકક્ષ દક્ષિણ ચીન સમુદ્ર પર દિવસોથી ગર્જના કરી રહેલા વાવાઝોડાને ભુસ્તરશાસ્ત્રીઓએ પર્વતોમાંથી સુનામી તરીકે વર્ણવી છે. વાવાઝોડું આજે વહેલી સવારે ભારે પવન અને ભારે વરસાદ સાથે હોંગકોંગ પહોંચ્યું હતું અને દક્ષિણ ચીનના દરિયાકાંઠે જનજીવન સ્થગિત કરી દીધું હતું, દક્ષિણ ચીનમાં, 10 થી વધુ શહેરોમાં શાળાઓ, ફેક્ટરીઓ અને પરિવહન સેવાઓ સ્થગિત કરવામાં આવી હતી. જોરદાર પવનને કારણે પદયાત્રી પુલની છતના ભાગો ઉડી ગયા હતા અને સમગ્ર હોંગકોંગમાં વૃક્ષો તૂટી પડ્યા હતા, જેમાં લગભગ 13 ઘાયલ લોકોને હોસ્પિટલોમાં સારવાર આપવામાં આવી હતી.
અહેવાલ મુજબ, હોંગકોંગે ટાયફૂન સિગ્નલ 10 જારી કર્યો છે, જે તેની સૌથી મોટી ચેતવણી છે, જેમાં વ્યવસાયો અને પરિવહન સેવાઓ બંધ રાખવાની વિનંતી કરવામાં આવી છે. સાઉથ ચાઇના મોર્નિંગ પોસ્ટ અનુસાર, ભારે વરસાદ ચાલુ રહેવાની ધારણા હોવાથી, અધિકારીઓએ અંબર વરસાદી તોફાનનો સંકેત પણ જારી કર્યો હતો, જેમાં કેટલીક શેરીઓ પહેલાથી જ આંશિક રીતે પાણીથી ભરાઈ ગઈ હતી. તેમણે દરિયાની સપાટી વધવાની ચેતવણી પણ આપી છે. હોંગકોંગ અને મકાઉમાં દુકાનો બંધ રહી હતી, શાળાઓ અને ફ્લાઇટ્સ રદ કરવામાં આવી હતી.
દરમિયાન આજે ગુઆંગડોંગ પ્રાંતમાં લેન્ડફોલ થવાનું છે, જ્યાં લગભગ 370,000 લોકોને સ્થળાંતર કરવામાં આવ્યા છે, અને ઘણી શાળાઓ અને વ્યવસાયો બંધ છે. હોંગકોંગે તેની વાવાઝોડાની ચેતવણીને 10 સ્તર સુધી વધારી દીધી છે, જે મહત્તમ સ્તર છે.
રાગાસા – કેટેગરી 5 વાવાઝોડાની સમકક્ષ – સોમવારે તેના ઉચ્ચતમ બિંદુ પર 285 કિમી/કલાક (177 માઇલ પ્રતિ કલાક) સુધીના પવનથી ભરપૂર છે, ચીનની હવામાન એજન્સીએ સુપર ટાયફૂન રાગાસા વિશે કડક ચેતવણીઓ જારી કરી છે, તેને તોફાનોનો રાજા ગણાવ્યો છે.
ઇટાલીના મેડામાં અતિ ભારે વરસાદથી પૂર સાથે કાદવ ધસી પડ્યો
ઉત્તરી ઇટાલીના મુશળધાર વરસાદને કારણે દેશભરમાં ભારે પૂર અને કાદવ ધસી પડ્યો હતો. ઇટાલીની રાષ્ટ્રીય નાગરિક સુરક્ષા સેવાએ ઘણા પ્રદેશોમાં ‘નારંગી’ હવામાન ચેતવણી જારી કરી છે, જેમાં ટાયરેનિયન દરિયાકાંઠે અને દક્ષિણના ભાગોમાં પરિસ્થિતિ વધુ ખરાબ થવાની ચેતવણી આપવામાં આવી છે. પ્રથમ પ્રતિભાવ આપનારાઓને મહત્તમ મદદ કરવામાં આવી છે, 600 થી વધુ કટોકટીના કોલનો જવાબ આપવામાં આવ્યો છે, પરિવારોને ઘરો, વાહનો અને પૂરગ્રસ્ત રસ્તાઓ પરથી બહાર કાઢવામાં આવ્યા છે. અધિકારીઓને ડર છે કે આગામી દિવસોમાં કટોકટી વધુ ઘેરી બની શકે છે
