કોચિંગ ક્લાસ હિટ કરાવવા પ્રો.કુલકર્ણીએ ‘નીટ’નું પેપર લીક કર્યુ

ખાસ વિદ્યાર્થી માટે સ્પેશિયલ ક્લાસ શરૂ કરી ‘ગેસ’ પેપર આપ્યું પણ એક વિદ્યાર્થીએ પેપર લીક કરતાં ભાંડો ફૂટયો

મુખ્ય સુત્રધાર સહિત 8ની ધરપકડ, મની ટ્રેલની તપાસ શરૂ, CBIની તપાસમાં સનસનીખેજ ખુલાશા

દેશની સૌથી પ્રતિષ્ઠિત અને મોટી પરીક્ષાઓમાંથી એક એવી NEET-UG2026 ની પરીક્ષાના પેપર લીક મામલે દરરોજ નવા અને ચોંકાવનારા ખુલાસા થઈ રહ્યા છે. સેન્ટ્રલ બ્યુરો ઓફ ઇન્વેસ્ટિગેશન (CBI) આ મામલાની ઝીણવટભરી તપાસ કરી રહી છે.

સીબીઆઈના સૂત્રો પાસેથી મળેલી માહિતી મુજબ, આ કરોડો વિદ્યાર્થીઓના ભવિષ્ય સાથે જોડાયેલું પેપર લીક કોઈ બહુ મોટા આંતરરાજ્ય સંગઠિત સિન્ડિકેટનું કામ નહોતું. પરંતુ, આ આખા કૌભાંડ પાછળ એક કેમિસ્ટ્રી લેક્ચરરની પોતાના કોચિંગ ક્લાસને રાતોરાત ફેમસ અને સુપરહિટ બનાવવાની લાલચ જવાબદાર હતી. આ કેસના મુખ્ય સૂત્રધાર એવા કેમિસ્ટ્રી લેક્ચરર પી.વી. કુલકર્ણીએ પોતાના કોચિંગ સેન્ટરનું નામ મોટું કરવા અને આર્થિક ફાયદા માટે આ આખો પ્લાન ઘડ્યો હતો. પરંતુ, તેને અંદાજો પણ નહીં હોય કે તેની જ ક્લાસના એક તોફાની વિદ્યાર્થીની એક હરકત આખા દેશ સામે તેની પોલ ખોલી નાખશે. ચાલો વિગતવાર સમજીએ કે આ આખી ઘટના શું હતી અને કેવી રીતે આ કૌભાંડનો પર્દાફાશ થયો.

મૂળ મહારાષ્ટ્રના લાતૂર જિલ્લાના વતની અને પુણેમાં કેમિસ્ટ્રી લેક્ચરર તરીકે કામ કરતા પી.વી. કુલકર્ણીની ઈચ્છા પોતાનું એક મોટું અને સફળ કોચિંગ સેન્ટર ઊભું કરવાની હતી. આજના સમયમાં કોચિંગ સેન્ટર ત્યારે જ હિટ થાય છે જ્યારે ત્યાંથી વધુમાં વધુ વિદ્યાર્થીઓ દેશની ટોચની મેડિકલ કોલેજોમાં પસંદગી પામે. આ શોર્ટકટ અપનાવવા માટે કુલકર્ણીએ NEET-UG2026 નું કેમિસ્ટ્રીનું પેપર લીક કરવાનો કારસો ઘડ્યો.

સીબીઆઈના સૂત્રોના જણાવ્યા અનુસાર, કુલકર્ણીએ તેની સહયોગી મનીષા વાઘમરે સાથે મળીને પુણેમાં આવેલા પોતાના ઘરે જ કેટલાક ખાસ પસંદ કરેલા વિદ્યાર્થીઓ માટે ‘સ્પેશિયલ કોચિંગ ક્લાસ’ શરૂૂ કર્યા હતા. આ ગુપ્ત ક્લાસીસમાં કુલકર્ણીએ વિદ્યાર્થીઓને પરીક્ષામાં આવનારા અસલી સવાલો, તેના ઓપ્શન્સ (વિકલ્પો) અને તેના સાચા જવાબો ખૂબ જ વિગતવાર સમજાવ્યા અને ગોખાવ્યા હતા. આ ‘સ્પેશિયલ ક્લાસ’ અને લીક થયેલા સવાલોના બદલામાં કુલકર્ણીએ વિદ્યાર્થીઓ અને તેમના વાલીઓ પાસેથી લાખો રૂૂપિયાની મોટી રકમ વસૂલી હતી.

કુલકર્ણીનો પ્લાન એકદમ પાકો હતો. જો આ વિદ્યાર્થીઓ પરીક્ષામાં ટોપ કરી જાય, તો તેના કોચિંગ ક્લાસનું નામ આખા દેશમાં થઈ જાય અને ભવિષ્યમાં તેની પાસે કરોડો રૂૂપિયાની કમાણી થાય. પરંતુ, ગુનાના રસ્તે ક્યારેય સફળતા મળતી નથી. આ ‘સ્પેશિયલ બેચ’ માં ભણતા વિદ્યાર્થીઓમાંથી એક વિદ્યાર્થી થોડો તોફાની અને જુદા મગજનો હતો.

આ વિદ્યાર્થીએ વિચાર્યું કે તેણે આ ક્લાસ માટે જે મોટી રકમ ચૂકવી છે, તેની ભરપાઈ કંઈક બીજી રીતે કરવામાં આવે. તેણે પોતાના પૈસા વસૂલ કરવા માટે કુલકર્ણીએ આપેલા NEET ના તે લીક થયેલા પ્રશ્નપત્રને (જેને તે સમયે ‘ગેસ પેપર’ તરીકે ઓળખાવવામાં આવતું હતું) સોશિયલ મીડિયા પર અન્ય કેટલાક એવા લોકોને મોકલી આપ્યું જેઓ પોતે પણ કોચિંગ ક્લાસ ચલાવતા હતા. બસ, આ એક ભૂલ અથવા શરારતે આખા પેપર લીક કાંડની દિશા બદલી નાખી. સોશિયલ મીડિયાના માધ્યમથી આ પેપર જોતજોતામાં સેંકડો લોકો સુધી પહોંચી ગયું.

જ્યારે સોશિયલ મીડિયા પર આ પેપર ફરતું થયું, ત્યારે શરૂૂઆતમાં મોટાભાગના લોકો અને વિદ્યાર્થીઓએ તેને ગંભીરતાથી ન લીધું. સામાન્ય રીતે પરીક્ષાના દિવસોમાં આવા ઘણા ફેક અને ગેસ પેપર્સ ફરતા હોય છે, એટલે લોકોએ તેને સામાન્ય ગણ્યું. પરંતુ અસલી ભૂકંપ તો 3 મે 2026 ના રોજ આવ્યો, જ્યારે NEET-UGની સત્તાવાર પરીક્ષા લેવાઈ.

પરીક્ષા પૂરી થયા બાદ જ્યારે વિદ્યાર્થીઓએ સોશિયલ મીડિયા પર વાયરલ થયેલા સવાલો અને વિદ્યાર્થીઓની નોટબુકમાં લખેલા પ્રશ્નો સરખાવ્યા, ત્યારે બધાના હોશ ઊડી ગયા. નોટબુકમાં લખેલા કેમિસ્ટ્રીના સવાલો 3 મેના અસલી પરીક્ષાના પ્રશ્નપત્ર સાથે 100% મેચ થતા હતા. આ ઘટના સામે આવતા જ દેશભરમાં હોબાળો મચી ગયો અને લાખો પ્રમાણિક વિદ્યાર્થીઓ રસ્તા પર આવી ગયા.

આ ગંભીર મામલાની નોંધ લેતા, 12 મે 2026 ના રોજ શિક્ષણ મંત્રાલયના ઉચ્ચ શિક્ષણ વિભાગ દ્વારા સત્તાવાર ફરિયાદ નોંધાવવામાં આવી હતી. મામલાની ગંભીરતા અને દેશના લાખો યુવાનોના ભવિષ્યને ધ્યાનમાં રાખીને આ કેસની તપાસ તાત્કાલિક સેન્ટ્રલ બ્યુરો ઓફ ઇન્વેસ્ટિગેશન (CBI) ને સોંપવામાં આવી. કેસ હાથમાં લેતાની સાથે જ સીબીઆઈએ દેશભરમાં પોતાની ખાસ ટીમો બનાવીને ઓપરેશન શરૂૂ કરી દીધું.

છેલ્લા કેટલાક દિવસોમાં સીબીઆઈએ ભારતના અલગ-અલગ રાજ્યોમાં મોટા પાયે દરોડા પાડ્યા છે. આ દરોડા દરમિયાન મુખ્ય આરોપીઓ અને શંકાસ્પદોના મોબાઈલ ફોન, લેપટોપ, ટેબ્લેટ જેવા ઈલેક્ટ્રોનિક ગેજેટ્સ અને ઘણા મહત્વના દસ્તાવેજો જપ્ત કરવામાં આવ્યા છે.

આ ડિજિટલ પુરાવાઓને વૈજ્ઞાનિક અને ફોરેન્સિક તપાસ માટે સેન્ટ્રલ ફોરેન્સિક સાયન્સ લેબોરેટરીમાં મોકલવામાં આવ્યા છે. સીબીઆઈના ડિજિટલ એક્સપર્ટ્સ હવે આ ફોનની ચેટ્સ, ડિલીટ કરાયેલો ડેટા અને કોલ ડિટેલ્સનું ટેકનિકલ વિશ્ર્લેષણ કરી રહ્યા છે, જેથી જાણી શકાય કે આ પેપર સોશિયલ મીડિયા પર કયા કયા ગ્રૂપમાં અને કેટલા લોકો સુધી પહોંચ્યું હતું.

8 આરોપીઓની ધરપકડ: મની ટ્રેલની તપાસ શરૂ

લાંબી પૂછપરછ અને પુરાવાઓ મળ્યા બાદ સીબીઆઈએ માસ્ટરમાઇન્ડ પી.વી. કુલકર્ણીની ધરપકડ કરી લીધી છે. આ સિવાય સીબીઆઈએ અત્યાર સુધીમાં દેશના અલગ-અલગ શહેરો જેવા કે જયપુર, ગુરુગ્રામ, નાસિક અને અમદાવાદમાંથી કુલ 8 આરોપીઓની ધરપકડ કરી લીધી છે. આ તમામ આરોપીઓને કોર્ટ દ્વારા 7 દિવસના પોલીસ રિમાન્ડ પર મોકલી દેવામાં આવ્યા છે, જેથી તેમની વધુ પૂછપરછ કરી શકાય. જ્યારે અન્ય બે આરોપીઓને ટ્રાન્ઝિટ રિમાન્ડ પર દિલ્હી લાવવામાં આવી રહ્યા છે. આ મોટા પાયે થયેલા આર્થિક વ્યવહારોને ટ્રેક કરવા માટે સીબીઆઈએ હવે આ કેસની ‘ફાઇનાન્સિયલ ઇન્વેસ્ટિગેશન’ એટલે કે નાણાકીય તપાસ પણ શરૂૂ કરી દીધી છે. એજન્સી એ જાણવાનો પ્રયાસ કરી રહી છે કે પેપરના બદલામાં લેવાયેલા પૈસા કયા બેંક એકાઉન્ટ્સમાં ટ્રાન્સફર થયા અને આ કાળા નાણાંનો ક્યાં ઉપયોગ કરવામાં આવ્યો.