ઈરાન અને ઈઝરાયલ વચ્ચે ફરી એકવાર યુદ્ધ ભડકતાં મિડલ ઈસ્ટમાં તણાવ વધ્યો છે. આજે બજારો ખુલતાની સાથે જ સેન્સેક્સ અને નિફ્ટીમાં મોટો ઘટાડો જોવા મળ્યો છે. BSE-લિસ્ટેડ કંપનીઓના બજાર મૂડીરોકાણમાં ₹4 લાખ કરોડથી વધુનો ઘટાડો થયો છે.
સપ્તાહની શરૂઆતમાં જ બજારમાં નોંધપાત્ર ઘટાડો જોવા મળી રહ્યો છે. સેન્સેક્સની વાત કરીએ તો સેન્સેક્સમાં આજે એકઝાટકે 925 પોઈન્ટનો કડાકો બોલાઈ ગયો હતો. પ્રિસેશનના કડાકા બાદ સેન્સેક્સમાં થોડીક રિકવરી દેખાઈ અને તે સમાચાર લખવા સુધીમાં 800 પોઈન્ટના કડાકા સાથે 73471.78 પોઈન્ટની આસપાસ ટ્રેડ થઇ રહ્યો હતો. જ્યારે નિફ્ટીની વાત કરીએ તો જે શુક્રવારે 23336.70 પોઈન્ટ પર ક્લોઝ થઈ હતી તે આજે સોમવારે સીધો 296 પોઇન્ટના કડાકા સાથે 23070 પર પહોંચી ગયો હતો. ત્યારબાદ તેમાં પણ થોડીક રિકવરી આવતી હતી સમાચાર લખવા સુધીમાં નીફ્ટી 23134 પોઈન્ટ પર ટ્રેડ થઇ રહ્યો હતો.
શેરબજારમાં ઉથલપાથલના પરિણામે રોકાણકારોના કરોડો રૂપિયા સ્વાહા થયાં છે. આંકડાઓ પર નજર કરીએ તો, 5 જૂનના રોજ BSE-લિસ્ટેડ તમામ કંપનીઓનું કુલ બજાર મૂડી આશરે ₹461.10 લાખ કરોડ હતું; જોકે, આજે બજાર ખુલતા જ તે ઘટીને ₹459.44 લાખ કરોડ થઈ ગયું. આ એક જ ફટકામાં રોકાણકારોને ₹4.42 લાખ કરોડનું નુકસાન થયું છે.
આજે સોનાની વાત કરીએ તો વાયદા બજારમાં શુક્રવારનું સોનાનું ક્લૉઝિંગ રેટ 155594 રૂપિયા હતું જે આજે સીધું 153596 સુધી ગગડી ગયું હતું. એટલે કે તેમાં કુલ 1998 રૂપિયાનો કડાકો બોલાઈ ગયો હતો. જ્યારે ચાંદીની વાત કરીએ તો તેમાં 6547 રૂપિયાનો કડાકો બોલાઈ ગયો હતો. શુક્રવારે ચાંદી 248537 રૂપિયાના ભાવે ક્લૉઝ થઇ હતી જે આજે સીધી 241990 રૂપિયાના તળિયે ખુલી હતી. આ સાથે રોકાણકારોને નુકસાન ભોગવવાનો વારો આવ્યો છે.
