ટ્રેનમાં મુસાફરી કરતા મુસાફરો માટે એક અગત્યના સમાચાર સામે આવ્યા છે. ભારતીય રેલ્વેએ રાત્રિના સમયે ટ્રેનના કોચમાં મોબાઇલ ચાર્જિંગને લઈને મોટો નિર્ણય લીધો છે. રેલ્વે બોર્ડે તમામ ઝોનલ રેલ્વેને સ્પષ્ટ આદેશ આપ્યો છે કે ટ્રેનના ડબ્બાઓમાં રાત્રે 11:00 વાગ્યાથી સવારે 5:00 વાગ્યા સુધી મોબાઇલ ચાર્જિંગ પોઇન્ટ ફરજિયાતપણે બંધ રાખવામાં આવે અને આ સમયગાળા દરમિયાન કોઈ પણ પ્રકારની છૂટછાટ આપવામાં ન આવે. મુસાફરોની સુરક્ષાને ધ્યાનમાં રાખીને આ નિર્ણય લેવામાં આવ્યો છે.
રાત્રિના સમયે શોર્ટ સર્કિટ અને આગ લાગવા જેવી સંભવિત ઘટનાઓનું જોખમ ઘટાડવા માટે આ પગલું લેવામાં આવ્યું છે. ત્યારે રાત્રે ટ્રેનમાં મુસાફરી કરતા મુસાફરોએ પોતાના મોબાઇલની બેટરી અને ચાર્જિંગનું અગાઉથી આયોજન કરવું પડશે.
દક્ષિણ પૂર્વ રેલ્વેમાં ટ્રેન દરમિયાન ચાર્જિંગ પર મુકેલી એક પાવર બેંક ફાટવાની કિસ્સો સામે આવ્યો હતો. તપાસમાં બહાર આવ્યું હતું કે દુર્ઘટના સમયે કોચમાં નિયમ મુજબ ચાર્જિંગ પોઇન્ટ બંધ કરવામાં આવ્યા નહોતા. આ ઘટનાને ગંભીરતાથી લઈને રેલ્વે બોર્ડે નક્કી કરેલા સમયમાં ચાર્જિંગ સુવિધા બંધ રાખવા અંગે કડક વલણ અપનાવ્યું છે. ઈલેક્ટ્રોનિક ઉપકરણોમાં શોર્ટ સર્કિટ, બેટરી ઓવરહીટિંગ કે શોર્ટ સર્કિટના કારણે ટ્રેનમાં આગ લાગવાની ઘટનાઓ રોકવા માટે આ એહતિયાતી પગલું લેવાયું છે. ઉલ્લેખનીય છે કે, આ પહેલા 19 જૂન 2014 અને માર્ચ 2021માં પણ રેલ્વેએ આ અંગેના આદેશો બહાર પાડ્યા હતા.
રેલ્વે બોર્ડે સંબંધિત ઓનબોર્ડ સ્ટાફ અને કર્મચારીઓને નિર્ધારિત સમયે ચાર્જિંગ પોઇન્ટ બંધ કરવાના કડક આદેશ આપ્યા છે. આ નિયમનું યોગ્ય પાલન થાય છે કે નહીં તેની ચકાસણી માટે અધિકારીઓ અને સુપરવાઈઝરોને ટ્રેનોમાં અચાનક (સરપ્રાઈઝ) તપાસ કરવાનો નિર્દેશ આપવામાં આવ્યો છે. નિયમ પાલનમાં કોઈ બેદરકારી સામે આવશે તો જવાબદાર કર્મચારીઓ સામે કાર્યવાહી કરવામાં આવશે.
