ડેસ્ટિનેશન વેડીંગ, ડેકોરેશન, દાગીનાની ખરીદી રડારમાં; સોશિયલ મીડિયાને આધારે પુરાવા એકઠા કરવાનું ચાલુ
લગ્નની સિઝન પાછી ફરી છે અને તેની સાથે જ બિગ ફેટ વેડિંગ્સ નો ટ્રેન્ડ પણ પાછો આવ્યો છે. મહેમાનોને ચાર્ટર્ડ ફ્લાઇટ્સમાં લઈ જવામાં આવે છે, જ્યારે ડિઝાઇનર આઉટફિટ્સ અને આંતરરાષ્ટ્રીય સ્થળો આ ભવ્ય સમારંભો માટે સ્ટેજ સેટ કરે છે. જોકે, આ ચમક-દમક પાછળ આવકવેરા વિભાગના અધિકારીઓ આ કાર્યક્રમો પર ચુપચાપ નજર રાખી રહ્યા છે, તેમ સૂત્રો પાસેથી જાણવા મળ્યું છે. આથી, સલાહ છે કે તમારા લગ્નની ભવ્યતા તમારા આવક સાથે મેળ ખાતી હોવી જોઈએ. નહીં તો ગમે ત્યારે ઇન્કમ ટેકસ ડીપાર્ટમેન્ટ ‘મહેમાન’ બનીને તપાસમા આવી શકે છે
વિભાગ હવે વૈભવી લગ્નો પર વધુ નજીકથી નજર રાખી રહ્યું છે, કારણ કે પરિવારો વિદેશી સ્થળો અને અનેક દિવસોની ઉજવણીમાં મોટા પાયે ખર્ચ કરી રહ્યા છે. સૂત્રોના જણાવ્યા અનુસાર, ઘણા કિસ્સાઓમાં આ ખર્ચ વ્યક્તિઓ દ્વારા જાહેર કરાયેલી આવક સાથે મેળ ખાતો નથી.
દુબઈ, બાલી, ઇસ્તંબુલ, ઇટાલી અને થાઈલેન્ડમાં થતા લગ્નો ખાસ કરીને ઝીણવટભરી તપાસ હેઠળ છે. આ ઇવેન્ટ્સનો ખર્ચ વારંવાર કરોડોમાં હોય છે અને તેમાં ટ્રાવેલ એજન્ટો, ઇવેન્ટ પ્લાનર્સ અને વિદેશી હોટલોને ચૂકવણીઓ સામેલ હોય છે. જ્યારે કોઈ ઇવેન્ટનું કદ પરિવારની નાણાકીય પ્રોફાઇલ કરતાં ઘણું વધારે દેખાય છે, ત્યારે વિભાગ તે કેસોને ફ્લેગ કરે છે.
લગ્નની સિઝન દરમિયાન ઊંચા મૂલ્યની જ્વેલરીની ખરીદીઓ પર પણ શંકાની સોય છે. રોકડમાં અથવા ઓછી આવક ધરાવતા સંબંધીઓના નામે ઘણા મોંઘા સોના અને હીરાની ખરીદી કરવામાં આવી હતી. કેટલાક પરિવારોને ભંડોળ ક્યાંથી આવ્યું તે સમજાવવા માટે નોટિસ પણ મળી ચૂકી છે.
પ્રીમિયમ ડેસ્ટિનેશન વેડિંગ્સનું આયોજન કરતા વેડિંગ પ્લાનર્સ પણ તપાસ હેઠળ છે. ઘણા માત્ર તેમની આવકનો અમુક ભાગ જ કાગળ પર દર્શાવે છે, જ્યારે બાકીનો ભાગ રોકડમાં લે છે નાણાકીય તપાસની સાથે, વિભાગે સોશિયલ મીડિયા પોસ્ટ્સ પરની નજર પણ વધારી છે. ભવ્ય કાર્યો, ચાર્ટર્ડ ફ્લાઇટ્સ અને લક્ઝરી ડેકોરના ચિત્રો અને વિડિઓઝની તુલના પરિવારોના નાણાકીય પ્રોફાઇલ સાથે કરવામાં આવે છે.
રોકડામાં થતી ચૂકવણી પર પણ ખાસ નજર
અમદાવાદમાં અધિકારીઓએ લગ્નની સેવાઓ માટે રોકડ વ્યવહારોમાં વધારો નોંધ્યો છે. ઘણા પરિવારો કેટરર્સ, ડેકોરેટર્સ, ફોટોગ્રાફરો અને મેક-અપ ટીમોને ડિસ્કાઉન્ટ મેળવવા અથવા GST થી બચવા માટે રોકડમાં ચૂકવણી કરે છે. આનાથી વાસ્તવિક બજેટને ટ્રેક કરવું મુશ્કેલ બને છે. અમારા માટે સોશિયલ મીડિયા એક મોટો સંકેત બની ગયો છે એમ એક આવકવેરા નિરીક્ષકે નામ ન આપવાની શરતે જણાવ્યું હતું. પરિવારો તેમના લગ્નની દરેક ચમકદાર ક્ષણ પોસ્ટ કરે છે, અને તે પોસ્ટ્સ ક્યારેક તેમના નાણાકીય રેકોર્ડ કરતાં વધુ બોલે છે
