ગુજરાતના રસોડામાં મોંઘવારીનો નવો તડાકો પડ્યો છે. છેલ્લા થોડા દિવસોમાં ખાદ્ય તેલના ભાવમાં અચાનક તેજી જોવા મળી છે, જેનું મુખ્ય કારણ મધ્ય પૂર્વમાં ચાલી રહેલું ઈરાન-ઈઝરાયલ-અમેરિકા વચ્ચેનું યુદ્ધ છે. પામ તેલના ભાવમાં રૂૂ. 75નો વધારો થતાં ગ્રાહકોને મોટો ફટકો પડ્યો છે, જ્યારે સીંગતેલ (મગફળીનું તેલ) અને કપાસિયા તેલના 15 કિલોના ડબ્બામાં રૂૂ. 45 સુધીનો ઉછાળો આવ્યો છે.
આ યુદ્ધને કારણે ક્રૂડ ઓઇલના ભાવમાં 28%થી વધુનો ઉછાળો આવ્યો છે, જે બ્રેન્ટ ક્રૂડને 100 પ્રતિ બેરલથી ઉપર લઈ ગયો છે. આ તેજીએ પામ તેલને બાયોડીઝલ માટે આકર્ષક બનાવ્યું છે, કારણ કે તે ક્રૂડ ઓઇલની તુલનામાં સસ્તું છે. મલેશિયા અને ઈન્ડોનેશિયામાંથી પામ તેલની માંગ વધી છે, જ્યારે ભારત વિશ્વનો સૌથી મોટો આયાતકાર છે. ફ્રેઈટ રેટમાં વધારો અને પુરવઠાની અછતને કારણે પામ તેલના ભાવમાં તેજી આવી છે.
સ્થાનિક બજારમાં પામ તેલના ભાવ નવી ઊંચી સપાટીએ પહોંચ્યા છે. સીંગતેલના 15 કિલોના ડબ્બાના ભાવમાં રૂૂ. 45નો વધારો થતાં તે રૂૂ. 2850થી ઉપર જઈ પહોંચ્યો છે, જ્યારે કપાસિયા તેલનો ડબ્બો રૂૂ. 2300થી વધુ થયો છે. સૌરાષ્ટ્રમાં મગફળી અને કપાસનું ઉત્પાદન વિક્રમી હોવા છતાં ભાવ ઘટવાને બદલે વધી રહ્યા છે, કારણ કે વેપારીઓ લગ્ન મોસમ અને વૈશ્વિક તેજીનો લાભ લઈ રહ્યા છે.
આર્થિક નિષ્ણાતોનું કહેવું છે કે યુદ્ધ લાંબુ ચાલશે તો તેલના ભાવ વધુ વધી શકે છે, જે ભારતમાં ગેસ, ખાદ્ય અને અન્ય વસ્તુઓ પર અસર કરશે. સરકાર પાસેથી આયાત ડ્યુટીમાં રાહતની અપેક્ષા છે. ગૃહિણીઓએ જણાવ્યું કે રોજિંદા ઉપયોગના તેલમાં આ વધારો બજેટને ભારે પડી રહ્યો છે.
