વર્લ્ડ કોંગ્રેસ ઓફ ડાયાબિટીસમાં નવતર સ્વરૂપની જાહેરાત
આજકાલ યુવા પેઢી પણ ડાયાબિટીસનો શિકાર બની રહી છે, ત્યારે વૈજ્ઞાનિકોએ ડાયાબિટીસનો એક નવો પ્રકાર શોધી કાઢ્યો છે. આ પ્રકાર ટાઈપ-1 અને ટાઈપ-2 ડાયાબિટીસથી તદ્દન અલગ છે અને ખાસ કરીને અમુક ચોક્કસ પ્રકારના લોકોને વધુ અસર કરે છે.
તાજેતરમાં બેંગકોકમાં આયોજિત વર્લ્ડ કોંગ્રેસ ઓફ ડાયાબિટીસ 2025માં આ નવા પ્રકારના ડાયાબિટીસની જાહેરાત કરવામાં આવી હતી, જેને ટાઈપ-5 નામ આપવામાં આવ્યું છે. સૌથી મહત્વની વાત એ છે કે ટાઈપ-5 ડાયાબિટીસ એવા લોકોને વધુ અસર કરે છે જેઓનું વજન ઓછું હોય છે અને જેમના પરિવારમાં ડાયાબિટીસનો કોઈ ઇતિહાસ નથી. આ ઉપરાંત, આ પ્રકારના ડાયાબિટીસના લક્ષણો પણ ટાઈપ-1 અથવા ટાઈપ-2 ડાયાબિટીસના સામાન્ય લક્ષણોથી અલગ હોય છે. ક્રિશ્ચિયન મેડિકલ કોલેજ (CMC), વેલ્લોરના એન્ડોક્રિનોલોજી વિભાગના પ્રોફેસર ડો. નિહાલ થોમસે જણાવ્યું કે ટાઈપ-5 ડાયાબિટીસ ધરાવતા લોકો સામાન્ય રીતે ઓછું વજન ધરાવે છે, તેઓ ડાયાબિટીસનો કોઈ પારિવારિક ઇતિહાસ ધરાવતા નથી અને તેઓ એવા લક્ષણો દર્શાવે છે જે ટાઈપ-1 અથવા ટાઈપ-2 ડાયાબિટીસ સાથે મેળ ખાતા નથી.
