અમેરિકાની ધાર્મિક વસ્તીમાં એક નોંધપાત્ર બદલાવ જોવા મળી રહ્યો છે. તાજેતરમાં રિલિજિયસ લેન્ડસ્કેપ સ્ટડી (છકજ) દ્વારા કરવામાં આવેલા એક મહત્વપૂર્ણ અભ્યાસમાં અમેરિકાના ધાર્મિક ચહેરા પર નવી રોશની ફેંકવામાં આવી છે. આ અભ્યાસનો મુખ્ય ઉદ્દેશ્ય અમેરિકામાં વિવિધ ધર્મોના અનુયાયીઓની સંખ્યા અને ભૌગોલિક વિતરણને સમજવાનો હતો.
આ અભ્યાસમાં એક આશ્ચર્યજનક આંકડો એ પણ બહાર આવ્યો છે કે અમેરિકાની 29 ટકા વસ્તી હવે કોઈ પણ ધર્મ સાથે જોડાયેલી નથી. જો કે, છેલ્લા કેટલાક સમયથી આ આંકડો સતત વધી રહ્યો હતો, પરંતુ તાજેતરના અભ્યાસમાં જાણવા મળ્યું છે કે હવે તે સ્થિર થઈ ગયો છે. નિષ્ણાતો આ વલણને અમેરિકન સમાજ માટે સકારાત્મક સંકેત માને છે, કારણ કે તે સમાજમાં સંતુલન જાળવવામાં મદદ કરી શકે છે.
રિલિજિયસ લેન્ડસ્કેપ સ્ટડી અનુસાર, અમેરિકાની 62 ટકા વસ્તી હજુ પણ ખ્રિસ્તી ધર્મનું પાલન કરે છે. તેમ છતાં, આ આંકડો વર્ષ 2014 થી 9 ટકા પોઈન્ટ્સ અને વર્ષ 2007 થી 16 ટકા પોઈન્ટ્સ જેટલો ઘટ્યો છે, જે ખ્રિસ્તી વસ્તીમાં નોંધપાત્ર ઘટાડો દર્શાવે છે.
ખ્રિસ્તી વસ્તીનું પ્રાદેશિક વિતરણ જોઈએ તો, 21 ટકા મધ્યપશ્ચિમમાં, 16 ટકા ઉત્તરપૂર્વમાં, 42 ટકા દક્ષિણમાં અને 21 ટકા પશ્ચિમ વિસ્તારમાં રહે છે. વય જૂથની વાત કરીએ તો, 14% ખ્રિસ્તીઓ 18-29 વર્ષની વયના છે, 28% 30-49 વર્ષના, 28% 50-65 વર્ષના અને 29% 65 વર્ષથી વધુ ઉંમરના છે.
અમેરિકાની કુલ વસ્તીમાં પુખ્ત મુસ્લિમોનું પ્રમાણ 1 ટકા છે. પ્રાદેશિક રીતે જોઈએ તો, 20 ટકા મધ્યપશ્ચિમમાં, 29 ટકા ઉત્તરપૂર્વમાં, 33 ટકા દક્ષિણમાં અને 18 ટકા પશ્ચિમ વિસ્તારમાં વસે છે. વય જૂથની દ્રષ્ટિએ, 35 ટકા મુસ્લિમો 18-29 વર્ષની વયના છે, 42 ટકા 30-49 વર્ષના, 13 ટકા 50-65 વર્ષના અને 8 ટકા 65 વર્ષથી વધુ ઉંમરના છે.
અમેરિકામાં હિન્દુ ધર્મનું પાલન કરનારા લોકોની સંખ્યા પણ કુલ વસ્તીના 1 ટકા જેટલી છે. હિન્દુ વસ્તી વિવિધ પ્રદેશોમાં ફેલાયેલી છે. જેમાં 13 ટકા મધ્યપશ્ચિમમાં, 26 ટકા ઉત્તરપૂર્વમાં, 32 ટકા દક્ષિણમાં અને 29 ટકા પશ્ચિમમાં રહે છે. વય જૂથ પ્રમાણે, 22 ટકા હિંદુઓ 18-29 વર્ષની વયના છે, 51 ટકા 30-49 વર્ષના, 17 ટકા 50-65 વર્ષના અને 4 ટકા 65 વર્ષથી વધુ ઉંમરના છે.
અમેરિકામાં બૌદ્ધ ધર્મ અને યહૂદી ધર્મનું પાલન કરનારા લોકોની વસ્તી પણ લગભગ 1-2 ટકા જેટલી છે. બૌદ્ધ ધર્મ પાળનારાઓનું પ્રાદેશિક વિતરણ જોઈએ તો, 10 ટકા મધ્યપશ્ચિમમાં, 13 ટકા ઉત્તરપૂર્વમાં, 32 ટકા દક્ષિણમાં અને 45 ટકા પશ્ચિમમાં રહે છે. જ્યારે યહૂદી ધર્મના અનુયાયીઓ 9 ટકા મધ્યપશ્ચિમમાં, 42 ટકા ઉત્તરપૂર્વમાં, 26 ટકા દક્ષિણમાં અને 23 ટકા પશ્ચિમ વિસ્તારમાં વસે છે.
રિલિજિયસ લેન્ડસ્કેપ સ્ટડી અમેરિકાની ધાર્મિક વિવિધતા અને પૃષ્ઠભૂમિને સમજવા માટે એક મહત્વપૂર્ણ સ્ત્રોત છે. ભલે ખ્રિસ્તી ધર્મ અમેરિકામાં સૌથી મોટો ધર્મ હોય, પરંતુ અન્ય ધર્મોની પણ નોંધપાત્ર હાજરી છે. મુસ્લિમ, હિંદુ અને યહૂદી સમુદાયોની હાજરી અમેરિકાને એક બહુ-ધાર્મિક રાષ્ટ્ર બનાવે છે. આ ઉપરાંત, કોઈ પણ ધર્મ સાથે જોડાયેલા ન હોય તેવા લોકોની વસ્તીમાં સ્થિરતા એ સમાજમાં વધી રહેલા સંતુલનનો સંકેત આપે છે.
