સુપ્રીમ કોર્ટે કેન્દ્ર સરકારને સગીરો દ્વારા સોશિયલ મીડિયા અને અન્ય ડિજિટલ પ્લેટફોર્મના ઉપયોગ અંગે કાયદાકીય સુરક્ષા વ્યવસ્થા સ્થાપિત કરવા વિચારણા કરવા જણાવ્યું હતું. કોર્ટે સ્પષ્ટ કર્યું કે બાળકોની સુરક્ષાના પગલાં માત્ર માર્ગદર્શિકા પૂરતા સીમિત ન હોવા જોઈએ; સોશિયલ મીડિયા પ્લેટફોર્મ અને અન્ય ડિજિટલ સેવાઓ દ્વારા ઉપયોગમાં લેવાતા સોફ્ટવેરે પણ ભારતીય કાયદાનું પાલન કરવું આવશ્યક છે.
’જસ્ટ રાઈટ્સ ફોર ચિલ્ડ્રન એલાયન્સ’ દ્વારા દાખલ કરવામાં આવેલી જનહિત અરજી (PIL) ની સુનાવણી દરમિયાન બેન્ચે આ અવલોકનો કર્યા હતા. આ અરજીમાં સોશિયલ મીડિયાનો ઉપયોગ કરતા 18 વર્ષથી ઓછી ઉંમરના બાળકો માટે અસરકારક સુરક્ષા પગલાંની માંગ કરવામાં આવી છે અને ડિજિટલ પ્લેટફોર્મ દ્વારા સગીરો સાથે સીધા કરાર કરવા પર પ્રતિબંધ મૂકવાની હિમાયત કરવામાં આવી છે.
અરજદારનું પ્રતિનિધિત્વ કરતા વકીલ એચ.એસ. ફૂલકાએ દલીલ કરી હતી કે વર્તમાન ભારતીય કાયદા હેઠળ, સગીરો કરાર કરવા માટે સક્ષમ નથી, અને તેમની સાથે કરવામાં આવેલા કોઈપણ કરાર ’શરૂૂઆતથી જ રદબાતલ’ (void ab initio) ગણાય છે. તેથી, સોશિયલ મીડિયા કંપનીઓ પર માત્ર સ્વૈચ્છિક માર્ગદર્શિકા લાગુ કરવી અપૂરતી રહેશે. ન્યાયાધીશ બાગચીએ સોલિસિટર જનરલ તુષાર મહેતાને પૂછ્યું કે શું ’મધ્યસ્થી નિયમો’ (Intermediary Rules) હેઠળ આ અંગે કોઈ કાયદાકીય જોગવાઈ દાખલ કરી શકાય છે. તેમણે મધ્યસ્થી નિયમો હેઠળ એવો નિર્દેશ જારી કરવાનું સૂચન કર્યું કે કંપનીઓએ તેમનું સોફ્ટવેર ભારતીય કાયદાના પાલનમાં તૈયાર કરવું જોઈએ. સોફ્ટવેર ભારતીય કાયદાને અનુરૂૂપ હોવું જોઈએ. આના જવાબમાં, સોલિસિટર જનરલે નોંધ્યું હતું કે આ માત્ર વિનંતી નહીં પરંતુ એક નિર્દેશ હતો. તેમણે કોર્ટને જાણ કરી કે કેન્દ્ર સરકાર આ મુદ્દાની તપાસ કરશે અને યોગ્ય પગલાં લેશે.
