કિમ જોંગ ઉન ઉત્તર કોરિયાના શાસક પક્ષના નેતા તરીકે ફરીથી નિમણૂક મેળવી ચુકયા છે. કોંગ્રેસમાં પોતાના ઉદ્ઘાટન ભાષણમાં, કિમ જોંગ ઉને દેશની અર્થવ્યવસ્થા અને લોકોના જીવનધોરણને સુધારવાની પ્રતિજ્ઞા લીધી હતી. ઉત્તર કોરિયાની શાસક વર્કર્સ પાર્ટીએ ફરીથી કિમ જોંગ ઉનને તેના મહાસચિવ તરીકે પસંદ કર્યા છે.
રવિવારે રબર-સ્ટેમ્પ પાર્ટી કોંગ્રેસ દ્વારા કરવામાં આવેલી જાહેરાત આશ્ચર્યજનક નથી કારણ કે કિમ પરિવાર 1940 ના દાયકાના અંતથી સરમુખત્યારશાહી પર શાસન કરી રહ્યો છે. કિમના નેતૃત્વ હેઠળ ઉત્તર કોરિયાએ તેની “યુદ્ધ પ્રતિરોધકતા” માં “મૂળભૂત રીતે સુધારો” કર્યો છે, “પરમાણુ દળોને તેના મુખ્ય ભાગ તરીકે” સ્થાન આપીને દેશને શક્તિવાન બનાવ્યો છે.
લાંબા સમયથી આંતરરાષ્ટ્રીય પ્રતિબંધો છતાં, ઉત્તર કોરિયાએ તેની પરમાણુ ક્ષમતાઓનું નિર્માણ કરવાનું ચાલુ રાખ્યું છે, નિયમિતપણે પ્રતિબંધિત ઇન્ટરકોન્ટિનેન્ટલ મિસાઇલોનું પરીક્ષણ કર્યું છે. પરંતુ શાસનની ગુપ્તતાને કારણે સૈન્યએ કેટલી પ્રગતિ કરી છે તેનું મૂલ્યાંકન કરવું મુશ્કેલ બને છે. 2011 માં તેમના પિતાના મૃત્યુ પછી શાસનનો કબજો સંભાળનારા કિમે પરમાણુ શસ્ત્રો કાર્યક્રમમાં ભારે રોકાણ કર્યું છે, જેના કારણે પ્યોંગયાંગ પશ્ચિમ અને ખાસ કરીને અમેરિકા માટે એક મોટો પડકાર બની ગયો છે.
છેલ્લા દાયકામાં દર પાંચ વર્ષે એક વાર યોજાયેલી કોંગ્રેસ 19 ફેબ્રુઆરીએ શરૂૂ થઈ હતી. લગભગ 5,000 પક્ષના સભ્યોની હાજરી સાથે, તે ઉત્તર કોરિયામાં રાજકીય શક્તિના માળખામાં એક દુર્લભ ઝલક આપે છે, જે સૌથી ઉત્સુક નિરીક્ષકો માટે પણ એકદમ અસ્પષ્ટ રહે છે. આ બેઠકોને સૌથી મહત્વપૂર્ણ રાજકીય ઘટના માનવામાં આવે છે અને વિદેશ નીતિથી લઈને તેની પરમાણુ મહત્વાકાંક્ષાઓ સુધી દેશની પ્રાથમિકતાઓ ક્યાં છે તેની સમજ આપે છે.
