સમાચાર માધ્યમોમાં રીફાઈનરી શટડાઉનના સમાચાર વહેતા થયા બાદ કંપનીની સત્તાવાર જાહેરાત
તાજેતરના મીડિયા અહેવાલોમાં વાડીનાર રિફાઇનરીના આગામી બંધ અંગે ચર્ચા થઈ રહી છે ત્યારે નયારા એનર્જીએ ગ્રાહકો અને હિતધારકોને આશ્વાસન આપ્યું છે કે દેશભરમાં ઇંધણ પુરવઠામાં કોઈ વિક્ષેપ પડશે નહીં.
કંપનીના અધિકૃત નિવેદનમાં જણાવવામાં આવ્યું છે કે તેલ પુરવઠામાં ચાલી રહેલા વિક્ષેપોને કારણે ઉદ્યોગ સામે અભૂતપૂર્વ પડકારો ઊભા થયા છે, જેનાથી ઇંધણ વિતરણ અને ઉપલબ્ધતા પર અસર પડી છે. યુએસ-ઈરાન તનાવને કારણે આ પરિસ્થિતિ વધુ જટિલ બની છે.
તેમ છતાં નયારા એનર્જીએ ભારતની ઊર્જા જરૂૂરિયાતો પૂરી કરવા પર પૂરું ધ્યાન કેન્દ્રિત કર્યું છે. નિવેદનમાં કહેવામાં આવ્યું છે, અમે અમારા ગ્રાહકોને ખાતરી આપીએ છીએ કે અમે ઉચ્ચ ગુણવત્તાવાળા ઇંધણનો સતત પુરવઠો જાળવીને ભારતની ઊર્જા જરૂૂરિયાતોને પૂરી કરવા માટે સંપૂર્ણપણે પ્રતિબદ્ધ છીએ.
કંપનીએ જણાવ્યું કે તેના 7,000થી વધુ રિટેલ આઉટલેટ્સ રાબેતા મુજબ કાર્યરત છે અને કોઈપણ આઉટલેટમાં સેવામાં વિક્ષેપ પડ્યો નથી. વધુમાં, રિફાઇનરીના ટર્નઅરાઉન્ડ (જાળવણી)નું કાળજીપૂર્વક આયોજન કરવામાં આવ્યું છે. એપ્રિલની શરૂૂઆતથી આશરે 35 દિવસ માટે બંધ રહેવાની યોજના છે, પરંતુ કંપનીએ કહ્યું છે કે તે પૂરતા પ્રોડક્ટ સ્ટોક અને બફર સાથે સંપૂર્ણપણે તૈયાર છે જેથી આ સમયગાળા દરમિયાન ઇંધણ પુરવઠામાં કોઈ અછત ન રહે.
વાડીનાર રિફાઇનરીની ક્ષમતા લગભગ 4 લાખ બેરલ પ્રતિ દિવસ છે, જે ભારતની કુલ રિફાઇનિંગ ક્ષમતાના આશરે 8% જેટલી છે. આ બંધને કારણે અસ્થાયી અસર પડી શકે છે, પરંતુ અન્ય રિફાઇનરીઓ અને સ્ટોકપાઇલ્સના આધારે પુરવઠો સ્થિર રહેશે એવી આશા છે.
નયારા એનર્જીએ ફરી એક વાર પુનરોચ્ચાર કર્યો છે કે તે રાષ્ટ્રની ઊર્જા ભાગીદાર તરીકે પ્રતિબદ્ધ છે અને ગ્રાહકો માટે ઓપરેશનલ સ્થિરતા તેમજ અવિરત સેવાને પ્રાથમિકતા આપે છે.આ નિવેદન એવા સમયે આવ્યું છે જ્યારે વૈશ્વિક અનિશ્ચિતતા અને ક્રૂડના વધતા ભાવ વચ્ચે ઇંધણ પુરવઠા અંગે ચિંતા વ્યક્ત કરવામાં આવી રહી છે. નયારા એનર્જીનું આ આશ્વાસન ગ્રાહકોમાં વિશ્વાસ જાળવી રાખવા માટે મહત્વપૂર્ણ માનવામાં આવે છે.
