સંયુક્ત રાષ્ટ્ર સુરક્ષા પરિષદ (UNSC) માં સુધારાઓ અને કાયમી સભ્યપદને લઈને ભારતે પોતાનું કડક અને સ્પષ્ટ વલણ દુનિયા સામે મૂક્યું છે. ભારતે જણાવ્યું છે કે યુએનએસસી (UNSC) માં એવા સુધારા કરવા જે વીટો પાવર વગરના નવા કાયમી સભ્યોની શ્રેણી ઊભી કરે, તે બિલકુલ સ્વીકાર્ય નથી. જો આવું થાય તો તે નવા સભ્યોને “બીજા વર્ગના” (Second-Class) સભ્યો બનાવી દેશે અને વર્તમાન પાંચ કાયમી સભ્યો (P5) નું વર્ચસ્વ યથાવત રાખશે.
સુરક્ષા પરિષદના સુધારાઓ પર ચર્ચા દરમિયાન ભારતે ભારપૂર્વક જણાવ્યું કે, સુરક્ષા પરિષદમાં જો નવા કાયમી સભ્યો ઉમેરવામાં આવે તો તેમને પણ હાલના પાંચ કાયમી સભ્યોની જેમ જ સમાન અધિકારો અને વીટો પાવર મળવો જોઈએ. માત્ર દેખાડા માટેના કે મર્યાદિત અધિકારોવાળા કાયમી સભ્યપદથી વૈશ્વિક અસમાનતા દૂર નહીં થાય.
ભારતનું માનવું છે કે માત્ર ટુકડે-ટુકડે સુધારાઓ કરવાથી કોઈ પરિણામ નહીં આવે. સુરક્ષા પરિષદના તમામ પાંચ મુખ્ય મુદ્દાઓ કે પાસાઓ પર એકસાથે ગંભીરતાથી ચર્ચા થવી જોઈએ જેથી આ વૈશ્વિક સંસ્થા આજની વાસ્તવિકતાઓ સાથે તાલ મિલાવી શકે, ન કે 1945ની જૂની વ્યવસ્થા પ્રમાણે ચાલતી રહે.
ભારતે નોંધ્યું છે કે 2022ની વીટો પહેલને પરિવર્તનના સંકેત તરીકે જોવામાં આવી હતી, પરંતુ યુએનજીએના 76/262 બાદથી વીટોના થઈ રહેલા મોટા પ્રમાણમાં ઉપયોગ અને તેની વાસ્તવિક સ્થિતિ કંઈક અલગ જ વાર્તા કહે છે. સંયુક્ત રાષ્ટ્રમાં ભારતના પ્રતિનિધિઓએ સ્પષ્ટ શબ્દોમાં કહ્યું છે કે, સમય આવી ગયો છે કે સમયમર્યાદા નક્કી કરીને સ્પષ્ટ અને તથ્યાત્મક વાતો શરૂૂ કરવામાં આવે, જેથી વૈશ્વિક સંસ્થાઓમાં લોકશાહી અને ન્યાયી પ્રતિનિધિત્વ સુનિશ્ચિત થઈ શકે. આ વીડિયોમાં સંયુક્ત રાષ્ટ્ર સુરક્ષા પરિષદ અને વૈશ્વિક સ્તરે ભારતની કાયમી સભ્યપદની માંગ તેમજ વીટો અધિકારો સંબંધિત ચર્ચાઓ વિશે વધુ વિગતવાર માહિતી જોઈ શકાય છે.
