ગયા અઠવાડિયે શેરબજારમાં આવેલી તેજીએ રોકાણકારોને ખુશ થવાની તક આપી હતી, પરંતુ આ આશાવાદ લાંબો સમય ટક્યો નહીં. સોમવારે (19 ઓક્ટોબર) દલાલ સ્ટ્રીટ પર ફરી વેચવાલીનું દબાણ જોવા મળ્યું. બેંકિંગ શેરોમાં મોટો ઘટાડો અને ક્રૂડ ઓઈલના વધતા ભાવને કારણે રોકાણકારોના મનોબળ પર નકારાત્મક અસર પડી છે. બીજી તરફ સોના-ચાંદીમાં સામાન્ય તેજી અને ક્રુડના ભાવમાં 1 થી 2 ડોલરનો આંશિક ઘટાડો જોવાયો હતો.
બપોરે 2:30 વાગ્યા સુધીમાં BSE સેન્સેક્સ 1,000 પોઈન્ટ અને NSE નિફ્ટી 50માં 295 પોઈન્ટનો ઘટાડો નોંધાયો હતો. આ બંને મુખ્ય સૂચકાંકોની સતત બે સત્રની તેજીનો સિલસિલો તૂટી ગયો છે. આ નબળાઈ માત્ર લાર્જ-કેપ શેરો પૂરતી સીમિત નહોતી; નિફ્ટી મિડકેપ 100 અને નિફ્ટી સ્મોલકેપ 100 સૂચકાંકોમાં પણ ઘટાડો જોવા મળ્યો. આ દરમિયાન, રોકાણકારોને અંદાજે રૂૂ. 4 લાખ કરોડનું નુકસાન થયું છે, કારણ કે BSE સેન્સેક્સની તમામ કંપનીઓનું કુલ માર્કેટ કેપિટલાઇઝેશન રૂૂ. 4,72,62,167 કરોડ (શુક્રવારના બંધ ભાવે) થી ઘટીને રૂૂ. 4,68,17,995 કરોડ (સોમવારે બપોરે 2:30 વાગ્યે) થઈ ગયું છે.
આ ભારે વેચવાલી પાછળ અનેક પરિબળો જવાબદાર છે. દિગ્ગજ ખાનગી બેંકોમાં નબળાઈ, વિદેશી રોકાણકારો દ્વારા સતત મૂડી પાછી ખેંચવી અને ક્રૂડ ઓઈલના ઊંચા ભાવને કારણે રોકાણકારો ચિંતિત બન્યા છે. બજારના લાઈવ અપડેટ્સ માટે અહીં જુઓ.
સપ્ટેમ્બર ક્વાર્ટરના પરિણામો જાહેર થયા બાદ, ખાનગી ક્ષેત્રની બેંકો મુખ્ય સૂચકાંકો પર દબાણ લાવવાનું મુખ્ય કારણ બની છે. HDFC બેંક, ICICI બેંક અને એક્સિસ બેંક સેન્સેક્સમાં ઘટાડો લાવનારા મુખ્ય શેરોમાં સામેલ હતા. સૂચકાંકમાં આવેલા કુલ ઘટાડામાંથી અડધાથી વધુ હિસ્સો આ ત્રણ બેંકોના કારણે હતો. જયારે બ્રેન્ટ ક્રૂડ તેના તાજેતરના સ્તરોથી ઓછું થવા છતાં, સોમવારના સત્ર દરમિયાન પ્રતિ બેરલ 108-109 ની આસપાસ ટ્રેડ થયું.
