નવરાત્રિના પ્રથમ નોરતે ગુજરાતનાં પ્રસિદ્ધ શક્તિપીઠો અને યાત્રાધામોમાં ભક્તિનો માહોલ જોવા મળ્યો હતો. પાવાગઢ, અંબાજી અને ચોટીલા ખાતે વહેલી સવારથી જ મોટી સંખ્યામાં માઈભક્તો ઉમટી પડ્યા હતા. માતાજીનાં દર્શન કરવા માટે ભક્તોએ કલાકો સુધી લાંબી કતારોમાં ઊભા રહેવું પડ્યું હતું. નવરાત્રિના પ્રારંભ સાથે જ ત્રણેય યાત્રાધામોમાં ભક્તોની ભારે અવરજવર જોવા મળી હતી. માતાજીની એક ઝલક મેળવવા માટે ભક્તોમાં અનેરો ઉત્સાહ જોવા મળ્યો હતો.
પંચમહાલ જિલ્લાના પાવાગઢ સ્થિત મહાકાળી માતાજીના મંદિરે નવરાત્રિના પ્રથમ દિવસે મોટી સંખ્યામાં શ્રદ્ધાળુઓ દર્શન માટે પહોંચ્યા હતા. વહેલી સવારે 5 વાગ્યાથી જ ડુંગર પર જવા માટે ભક્તોની અવરજવર વધી હતી. દૂરદૂરથી આવેલા માઈભક્તોએ માતાજીનાં દર્શન કરીને ધન્યતા અનુભવી હતી. દર્શન માટે ભક્તોને લાંબી કતારોમાં ઊભા રહેવું પડ્યું હતું. ભક્તોની સુરક્ષા માટે 1300થી વધુ પોલીસ જવાનો તૈનાત કરવામાં આવ્યા છે. યાત્રાળુઓની સુવિધા માટે 75 એસટી બસો દોડાવવામાં આવી રહી છે અને આરોગ્ય સેવાઓ માટે 60 સભ્યોની ટીમ કાર્યરત કરવામાં આવી છે.
બનાસકાંઠા જિલ્લાના અંબાજી સ્થિત શક્તિપીઠમાં પણ નવરાત્રિના પ્રથમ નોરતે ભક્તોનો ભારે ધસારો જોવા મળ્યો હતો. વહેલી સવારથી જ માતા અંબાનાં દર્શન કરવા માટે શ્રદ્ધાળુઓ મંદિર તરફ ઉમટી પડ્યા હતા. મંદિર પરિસર અને દર્શન માટેના માર્ગો પર ભક્તોની લાંબી કતારો જોવા મળી હતી. ’જય અંબે’ના નાદ સાથે ભક્તોએ માતાજીનાં દર્શન કરી નવરાત્રિની શરૂૂઆત કરી હતી. ગુજરાત સહિત અન્ય રાજ્યોમાંથી પણ શ્રદ્ધાળુઓ અંબાજી પહોંચ્યા હતા.નવરાત્રિ મહોત્સવને નિહાળવા માટે અંબાજીના ઐતિહાસિક ચાચર ચોકમાં ભવ્ય મંડપ બાંધવામાં આવ્યો છે, જ્યાં દરરોજ રાત્રે 9:00 વાગ્યે મહાઆરતી બાદ રાત્રિના 12:00 વાગ્યા સુધી ભક્તો ગરબાની રમઝટ માણશે.
સુરેન્દ્રનગર જિલ્લાના ચોટીલા સ્થિત ચામુંડા માતાજીના મંદિર ખાતે પણ નવરાત્રિના પ્રથમ દિવસે ભક્તોની ભારે ભીડ જોવા મળી હતી. માતાજીનાં દર્શન કરવા માટે વહેલી સવારથી જ મોટી સંખ્યામાં શ્રદ્ધાળુઓ ચોટીલા પહોંચ્યા હતા. ડુંગર પર આવેલા મંદિર સુધી પહોંચીને માતાજીનાં દર્શન કરવા માટે ભક્તોએ લાંબી કતારોમાં રાહ જોવી પડી હતી. નવરાત્રિના પ્રથમ નોરતે માતાજીનાં દર્શન કરીને ભક્તોએ સુખ, શાંતિ અને સમૃદ્ધિ માટે પ્રાર્થના કરી હતી. નવરાત્રિના પ્રથમ નોરતે પાવાગઢ, અંબાજી અને ચોટીલા ખાતે જોવા મળેલી ભક્તોની ભીડ ગુજરાતની ધાર્મિક આસ્થા અને પરંપરાનું પ્રતિબિંબ બની હતી. માતાજીનાં દર્શન માટે કલાકો સુધી રાહ જોવા છતાં ભક્તોમાં ઉત્સાહ અને શ્રદ્ધા યથાવત્ જોવા મળ્યાં હતાં. નવરાત્રિના આગામી દિવસોમાં પણ આ ત્રણેય યાત્રાધામોમાં મોટી સંખ્યામાં ભક્તો પહોંચે તેવી શક્યતા છે. ભક્તોની વધતી અવરજવરને ધ્યાનમાં રાખીને દર્શન વ્યવસ્થા અને સુચારુ આયોજનનું મહત્ત્વ પણ વધ્યું છે.
