ભારતીય ટીમે ગુરુવારે (27 ઓગસ્ટ) મહિલા હોકી વર્લ્ડ કપમાં જર્મનીને 3-1થી હરાવ્યું હતું. નેધરલેન્ડ્સના એમ્સટેલવીનમાં રમાયેલા મુકાબલામાં વિજય સાથે ટીમ ઇન્ડિયાએ 52 વર્ષ જૂનો રેકોર્ડ તોડ્યો. આ પાંચમા અને છઠ્ઠા સ્થાન માટેની મેચ હતી. આ જીત સાથે ટીમ ઇન્ડિયાએ પાંચમું સ્થાન મેળવ્યું, જે 1974 માં મહિલા વર્લ્ડ કપ શરૂૂ થયા પછી ટીમનું શ્રેષ્ઠ પરિણામ છે.
પહેલા મહિલા ટીમ પ્રથમ સીઝન (1974) માં ફક્ત ચોથા સ્થાને રહી હતી. હવે, 52 વર્ષની લાંબી રાહ જોયા પછી ટીમે ફરીથી તેનું શ્રેષ્ઠ પરિણામ પ્રાપ્ત કર્યું છે. નવનીત કૌર અને ઇશિકાએ ટીમની ઐતિહાસિક જીતમાં મહત્વપૂર્ણ ભૂમિકા ભજવી હતી. નવનીતે બે ગોલ કર્યા હતા જ્યારે ઇશિકાએ એક ગોલ કર્યો. ભારત માટે ત્રણેય ગોલ છેલ્લી 17 મિનિટમાં થયા.
મેચનો પહેલો ક્વાર્ટર ગોલ વગર રહ્યો હતો. પ્રથમ 15 મિનિટમાં કોઈ પણ ટીમ ગોલ કરી શકી નહીં. બીજા ક્વાર્ટરમાં પણ આવી જ સ્થિતિ જોવા મળી. બંને ટીમો ગોલ કરવામાં નિષ્ફળ રહી હતી. જર્મનીને બંને ક્વાર્ટરમાં પેનલ્ટી કોર્નર મળ્યા અને તેની ટીમની સાથી ખેલાડી સોનિયા ઝિમરમેનને ગ્રીન ગાર્ડ મળ્યું હતું. ત્રીજા ક્વાર્ટરમાં દર્શકોએ ભારતનો પ્રથમ ગોલ જોયો જે ઇશિકાએ 43મી મિનિટે કર્યો હતો.
આ ગોલની ઉજવણી હજુ ચાલી રહી હતી ત્યાં નવનીત કૌરે 44મી મિનિટે ટીમ માટે બીજો ગોલ કર્યો જેનાથી ત્રણ ક્વાર્ટર પછી ભારત 2-0થી આગળ થઈ ગયું હતું. જર્મનીને ભારતને રોકવાની અને શક્ય તેટલા ગોલ કરવાની જરૂૂર હતી, પરંતુ ટીમ તેમ કરવામાં નિષ્ફળ રહી. ભારતે ક્વાર્ટરની શરૂૂઆતમાં જ ગોલ કર્યો. નવનીત કૌરે 47મી મિનિટે ભારતનો ત્રીજો ગોલ કર્યો. ભારત પાસે હવે 3-0ની લીડ હતી. રમત આગળ વધી અને છેલ્લી મિનિટે 59મી મિનિટે લિન ક્રિંગ્સે જર્મની માટે પહેલો ગોલ કર્યો. ફૂલ ટાઈમ સુધી મેચ 3-1થી સમાપ્ત થઈ હતી.
