સુત્રાપાડા-કેશોદમાં 10, વંથલીમાં 4.25 ઈંચ વરસાદથી રાતોરાત જળબંબાકાર
ગઈકાલે ધમાકેદાર એન્ટ્રી બાદ આજે સવારથી જ સૌરાષ્ટ્ર-દક્ષિણ ગુજરાતમાં સટાસટી
ગુજરાતમાં લાંબા વિરામ બાદ અંતે મેઘરાજાએ મન મોકળુ કર્યું છે અને ચોમાસાએ ધમાકેદાર એન્ટ્રી કરી હોય તેમ આજે સવારે છ વાગ્યે પુરા થતાં 24 કલાક દરમિયાન 107 તાલુકામાં ઝાપટાથી માંડી 8 ઈંચ વરસાદ નોંધાયા બાદ આજે સવારથી મેઘરાજાએ સૌરાષ્ટ્રમાં ગીર સોમનાથ અને જૂનાગઢ જિલ્લામાં ધુંવાધાર બેટીંગ કરી હોય તેમ બપોરે બે વાગ્યે પુરા થતા 36 કલાક દરમિયાન માંગરોળમાં 12, સુત્રાપાડામાં 10, માળીયા હાટીનામાં 11.38, કેશોદમાં 10 ઈંચ, વંથલીમાં 4.25, માણાવદરમાં 3.50, તાલુકામાં 3 ઈંચ વરસાદ પડી જતાં ખેડૂતોમાં આનંદની લાગણી ફેલાયેલ છે. આ સહિત આજે સવારે 6 થી બપોરે બે વાગ્યા સુધીમાં કુલ 86 તાલુકામાં વરસાદ નોંધાયો છે અને બપોરે પણ મેઘરાજા હેત પૂર્વક વરસી રહ્યાં છે.
સવારથી બપોર સુધીમાં વેરાવળમાં 3.31, વડોદરાના સિનોરમાં 2.87, કોડીનારમાં 2.36, ઓલપાડમાં 2.28, હાસોટમાં 2.20, વાલીયામાં 1.93, તાલાલામાં 1.85, રાજકોટના લોધિકામાં 36 કલાકમાં 5 ઈંચ, જૂનાગઢમાં 3.66, બોટાદમાં 2.08 ઈંચ વરસાદ પડી ગયો છે. છેલ્લા 36 કલાકમાં મેઘરાજાએ ધમાકેદાર ઈનીંગ ખેલતાં ગઈકાલ સુધી જ્યાં ધુળ ઉડતી હતી તેવા અનેક વિસ્તારો આજે બપોર સુધીમાં જળબંબાકાર થઈ ગયા છે.
આજે સવારે 6 વાગ્યે પુરા થતા 24 કલાકમાં કુલ 107 તાલુકામાં વરસાદ નોંધાયો હતો જેમાં સૌથી વધુ વરસાદ નોંધાયેલા વિસ્તારોમાં સુરત જિલ્લાના પાલસાણા પછી બારડોલી તાલુકામાં 7.76 ઇંચ, વાલસાડ જિલ્લાના ઉમરગાંવમાં 7.72 ઇંચ, સુરતના મહુવામાં 7.52 ઇંચ અને વાલસાડના વાપી તાલુકામાં 7.44 ઇંચ વરસાદ થયો હતો. જુનાગઢ જિલ્લાના માલિયા હાટીના તાલુકામાં 7.01 ઇંચ, સુરતના અંબિકા તાલુકામાં 6.46 ઇંચ અને ગીર સોમનાથ જિલ્લાના સુત્રાપાડામાં 5.24 ઇંચ વરસાદ નોંધાયો હતો. આ ઉપરાંત જુનાગઢના કેશોદ અને માંગરોળ તાલુકાઓમાં પણ અનુક્રમે 5.20 ઇંચ અને 4.76 ઇંચ વરસાદ થયો હતો.
દક્ષિણ ગુજરાતના સુરત, વાલસાડ અને નવસારી જિલ્લાઓમાં સૌથી વધુ અસર જોવા મળી હતી. સુરત જિલ્લાના ઉમરપાડા તાલુકામાં 4.72 ઇંચ, વાલસાડના પારડીમાં 4.45 ઇંચ અને નવસારીના ગાંડેવી તાલુકામાં 3.03 ઇંચ વરસાદ થયો હતો. તાપી જિલ્લાના વલોદ અને વ્યારા તાલુકાઓમાં પણ અનુક્રમે 4.02 ઇંચ અને 3.62 ઇંચ વરસાદ નોંધાયો હતો. આ વિસ્તારોમાં મેઘરાજાએ ખેડૂતોને રાહત પૂરી પાડી છે.
સૌરાષ્ટ્રમાં જુનાગઢ અને ગીર સોમનાથ જિલ્લાઓમાં સારો વરસાદ થયો હતો. રાજકોટ જિલ્લાના લોધિકા તાલુકામાં 3.35 ઇંચ, ગોંડલમાં 2.83 ઇંચ અને જામકંડોરણામાં 2.48 ઇંચ વરસાદ નોંધાયો હતો. જોકે રાજકોટ તાલુકામાં માત્ર 0.31 ઇંચ વરસાદ થયો હતો. અમરેલી, ભાવનગર, ભરૂૂચ, છોટાઉદેપુર અને નર્મદા જિલ્લાના અનેક તાલુકાઓમાં 0.04 ઇંચથી 2.05 ઇંચ સુધીનો વરસાદ નોંધાયો છે.
