સ્મૃતિ મંધાનાએ ફરી એકવાર મહિલા T20 વર્લ્ડ કપમાં શાનદાર પ્રદર્શન કર્યું છે. ભારતીય વાઈસ કેપ્ટને સતત બીજી મેચમાં અડધી સદી ફટકારી અને નેધરલેન્ડ સામે 74 રન બનાવ્યા. સ્મૃતિ મંધાનાએ નેધરલેન્ડ્સ સામે 36 બોલમાં 11 ચોગ્ગા અને એક છગ્ગાની મદદથી પોતાની અડધી સદી પૂરી કરી. મંધાનાએ પોતાની ઇનિંગ દરમિયાન ત્રણ મોટા રેકોર્ડ બનાવ્યા.
સ્મૃતિ મંધાના T20 આંતરરાષ્ટ્રીય મેચોમાં 600 ચોગ્ગા ફટકારનાર પ્રથમ ક્રિકેટર બની છે. પુરુષ કે મહિલા ક્રિકેટમાં અત્યાર સુધી કોઈ પણ ખેલાડીએ 600 ચોગ્ગા ફટકાર્યા નથી. મંધાનાએ કુલ 603 ચોગ્ગા ફટકાર્યા છે. સ્મૃતિ મંધાના મહિલા T20 વર્લ્ડ કપના ઇતિહાસમાં સૌથી વધુ પચાસથી વધુ સ્કોર કરનારી ખેલાડી પણ બની ગઈ છે. મંધાનાએ મહિલા T20 વર્લ્ડ કપમાં પોતાનો છઠ્ઠો પચાસથી વધુ સ્કોર બનાવ્યો છે, અને હરમનપ્રીત કૌરને પાછળ છોડી દીધી છે.
સ્મૃતિ મંધાનાએ શેફાલી વર્મા સાથે મળીને એક મહત્વપૂર્ણ રેકોર્ડ પણ બનાવ્યો. શેફાલી અને મંધાના T20 આંતરરાષ્ટ્રીય ક્રિકેટમાં 3,500 થી વધુ રનની ભાગીદારી કરનારી પ્રથમ જોડી બની છે. શેફાલી વર્માએ નેધરલેન્ડ્સ સામે પણ 55 રન બનાવ્યા હતા. ભારતની મહિલા ટીમે અહીં બુધવારે નેધરલેન્ડ્સને ટી-20 વર્લ્ડ કપમાં 95 રનથી હરાવીને સતત બીજો વિજય નોંધાવ્યો હતો.
ભારતે બેટિંગ મળ્યા પછી પાંચ વિકેટે 209 રન બનાવ્યા હતા જેમાં વાઇસ-કેપ્ટન સ્મૃતિ મંધાના (74 રન, 47 બોલ, એક સિક્સર, અગિયાર ફોર) અને શેફાલી વર્મા (પંચાવન રન, 38 બોલ, દસ ફોર)ના સૌથી મોટા યોગદાન હતા. તેમની વચ્ચે 115 રનની ભાગીદારી થઈ હતી. બેબેટ દ લીડના સુકાનમાં નેધરલેન્ડ્સની ટીમ 114 રનમાં આઉટ થઈ ગઈ હતી. શ્રી ચરનીએ ચાર, શેફાલીએ ત્રણ અને નંદની શર્માએ બે વિકેટ લીધી હતી. ભારત બન્ને મેચ જીતીને ગ્રૂપ-એમાં ચાર પોઇન્ટ સાથે મોખરે છે. શાનદાર પર્ફોર્મન્સ માટે સ્મૃતિ મંધાના વુમન ઓફ ધ મેચનો એવોર્ડ આપવામાં આવ્યો હતો.
