ખંભાળિયાથી આશરે 10 કિલોમીટર દૂર લલીયા ગામના પાટીયા પાસેથી પાસેથી જી.જે. 03 એમ.એફ. 9389 નંબરના એક મોટરસાયકલ પર બેસીને જઈ રહેલા ભાણવડ તાલુકાના કંટોલિયા ગામના દેવશીભાઈ રાજશીભાઈ કંડોરીયા નામના 26 વર્ષના યુવાનનું મોટરસાયકલ કોઈ કારણોસર સ્લીપ થઈ જતા તેમને શરીરના જુદા જુદા ભાગોમાં ગંભીર ઈજાઓ થતા સારવાર અર્થે હોસ્પિટલમાં ખસેડવામાં આવ્યા હતા. જ્યાં સારવાર દરમિયાન તેમનું મૃત્યુ નિપજ્યું હતું. જે અંગે ખંભાળિયા પોલીસે અકસ્માત મૃત્યુ અંગેની નોંધ કરી, આગળની કાર્યવાહી કરી હતી.
ભાટિયાના યુવાનનું મૃત્યુ
કલ્યાણપુર તાલુકાના ભાટિયા ગામે રહેતા ભીમશીભાઈ વીરાભાઈ કરંગીયા નામના 40 વર્ષના યુવાન ખંભાળિયાથી આશરે 15 કિલોમીટર દૂર વડાલીયા સિંહણ ગામે આવેલા સિંહણ ડેમમાં કોઈ અગમ્ય કારણોસર ડૂબી જતા તેમનું મૃત્યુ નિપજ્યું હતું. આ બનાવ અંગેની જાણ મૃતકના નાનાભાઈ પરબતભાઈ વીરાભાઈ કરંગીયાએ અહીંની પોલીસને કરી છે.
સામાન્ય બાબતે ગુરગઢના બુઝુર્ગને માર પડ્યો
કલ્યાણપુર તાલુકાના ગુરગઢ ગામે રહેતા બાવાભાઈ જુસબભાઈ સેતા નામના 65 વર્ષના વૃદ્ધ તેમના ઘરની બહાર રહેલા ઓટલા પર બેઠા હતા. ત્યારે આ વિસ્તારમાં આવેલા આરોપી રાણા જુસબભાઈ સંઘારએ તેમના ઘરની સામે મોટરસાયકલ રાખી, બાવાભાઈ સેતાના ઘરની સામે જોયું હતું. જેથી બાવાભાઈએ પૂછતા આરોપી રાણા સંઘારએ ઉશ્કેરાઈને તેમને બિભત્સ ગાળો ભાંડી, હાથ મરડી નાખી, બાજુમાં રહેલા પથ્થર વડે તેમને ઈજાઓ કરતા આ અંગે કલ્યાણપુર પોલીસે બાવાભાઈની ફરિયાદ પરથી રાણા સંઘાર સામે ગુનો નોંધ્યો છે.
