રેલવે ટ્રેક ઓળંગતા સર્જાયેલી ગોઝારી દુર્ઘટના: મોત નીપજતા પરિવારમાં શોક છવાયો
મહેસાણા જિલ્લામાં બુધવારે સાંજે બનેલી એક કરુણ ઘટનાએ સમગ્ર વિસ્તારને શોકમાં ગરકાવ કરી દીધો છે. શોભાસણ ગામ નજીક રેલવે ટ્રેક ક્રોસ કરતી વખતે ત્રણ કિશોરો માલગાડીની અડફેટે આવી ગયા હતા, જેમાં ત્રણેયના ઘટનાસ્થળે જ મોત નીપજ્યા હતા. આ દુર્ઘટનામાં જીવ ગુમાવનાર ત્રણેય બાળકો અભ્યાસ કરતા વિદ્યાર્થીઓ હતા. ઘટનાની જાણ થતાં જ ગામમાં શોકનો માહોલ છવાઈ ગયો હતો અને પરિવારો પર દુ:ખનો પહાડ તૂટી પડ્યો હતો.
પ્રાથમિક માહિતી અનુસાર મહેસાણા તાલુકાના શોભાસણ ગામ નજીક બુધવારે સાંજે અંદાજે 4:26 વાગ્યાની આસપાસ આ દુર્ઘટના બની હતી. ત્રણ કિશોરો રેલવે ટ્રેક ક્રોસ કરી રહ્યા હતા ત્યારે અચાનક પસાર થઈ રહેલી માલગાડીની અડફેટે આવી ગયા હતા.
અકસ્માત એટલો ગંભીર હતો કે ત્રણેય કિશોરોના ઘટનાસ્થળે જ પ્રાણ પંખેરૂૂ ઉડી ગયા હતા. ઘટનાના સમાચાર વાયુવેગે સમગ્ર વિસ્તારમાં ફેલાતા લોકો મોટી સંખ્યામાં ઘટનાસ્થળે એકત્રિત થઈ ગયા હતા.
અકસ્માતમાં મૃત્યુ પામેલા ત્રણેય બાળકો મહેસાણા તાલુકાના શોભાસણ ગામના ઠાકોરવાસ વિસ્તારમાં રહેતા હોવાનું જાણવા મળ્યું છે. મૃતકોમાં 15 વર્ષીય જીગ્નેશ હમીરજી ઠાકોરનો સમાવેશ થાય છે, જે ધોરણ 11માં અભ્યાસ કરતો હતો. આ ઉપરાંત 16 વર્ષીય મૌલિકજી ફતેહસિંહ ઠાકોર, જે પણ ધોરણ 11નો વિદ્યાર્થી હતો, તેનું પણ ઘટનાસ્થળે જ મોત થયું હતું. ત્રીજો મૃતક 14 વર્ષીય યુવરાજ રણજીતજી ઠાકોર હતો, જે ધોરણ 9માં અભ્યાસ કરતો હતો. ત્રણેય વિદ્યાર્થીઓના અકાળ અવસાનથી ગામમાં શોકની લાગણી ફેલાઈ ગઈ છે.
એકસાથે ત્રણ કિશોરોના મોતના સમાચાર મળતા જ પરિવારોમાં રડારડનો માહોલ સર્જાયો હતો. જે બાળકો થોડા સમય પહેલા સુધી પરિવાર સાથે હસતા-રમતા હતા, તેમના અચાનક થયેલા અવસાનથી સ્વજનો આઘાતમાં સરી પડ્યા છે. ગામના લોકો પણ આ ઘટનાથી સ્તબ્ધ બની ગયા છે. એક જ ગામના ત્રણ યુવાન દીકરાઓના મોતથી સમગ્ર શોભાસણ ગામમાં શોકની લાગણી જોવા મળી રહી છે.
અકસ્માતની જાણ થતાં જ સ્થાનિક લોકો તરત જ ઘટનાસ્થળે પહોંચી ગયા હતા. સાથે જ પોલીસનો કાફલો પણ સ્થળ પર દોડી ગયો હતો. પોલીસ દ્વારા ઘટનાની પ્રાથમિક તપાસ હાથ ધરવામાં આવી છે. મૃતદેહોને પોસ્ટમોર્ટમ માટે ખસેડવાની કાર્યવાહી કરવામાં આવી હતી અને અકસ્માત કેવી રીતે બન્યો તે અંગે વધુ તપાસ શરૂૂ કરવામાં આવી છે.
