રાજ્ય સરકારે બાકાયદા પરિપત્ર બહાર પાડવો પડયો, મંત્રીઓના જિલ્લા પ્રવાસ દરમિયાન ગરિમાપૂર્ણ અને યોગ્ય સ્વાગત કરવા આપવા સૂચના
ગુજરાતમાં ઉચ્ચ અધિકારીઓ ધારાસભ્યોને જવાબ આપતા ન હોવાની અને ફોન પણ ઉપાડતા ન હોવાની વ્યાપક ફરીયાદો વચ્ચે હવે જિલ્લાઓમાં મંત્રીઓની મુલાકાત દરમિયાન માન-મોભો જળવાતા નહીં હોવાની ફરીયાદો બાદ રાજ્ય સરકારે વધુ એક વખત પરિપત્ર બહાર પાડી જિલ્લા કલેકટરો, ડીડીઓ સહીત તમામ અધિકારીઓને સ્પષ્ટ સુચના આપવાની ફરજ પડી છે. રાજય સરકારના આ પરિપત્રથી ગુજરાતમાં બાબુશાહી ચાલતી હોવાનો અને ધારાસભ્યો તો ઠીક પ્રધાનોનો પણ માન-મોભો જળવાતો નહીં હોવાની છાપ ઉઠી છે.
ગુજરાત સરકારે રાજ્યના તમામ જિલ્લાઓમાં મંત્રીઓની મુલાકાત દરમિયાન પ્રોટોકોલ અને આદરના નિયમોનું પાલન ન થતું હોવાની ગંભીર નોંધ લીધી છે. આ અંગે મુખ્ય સચિવાલય દ્વારા તાજેતરમાં એક કડક પરિપત્ર જારી કરવામાં આવ્યો છે, જેમાં જિલ્લા કલેક્ટરો, જિલ્લા વિકાસ અધિકારીઓ (ડીડીઓ) અને સંબંધિત તમામ અધિકારીઓને સ્પષ્ટ સૂચના આપવામાં આવી છે કે મંત્રીઓને જિલ્લા પ્રવાસ દરમિયાન ગરિમાપૂર્ણ અને યોગ્ય સ્વાગત આપવું જરૂૂરી છે.
પરિપત્રમાં જણાવવામાં આવ્યું છે કે તાજેતરના સમયમાં અમુક જિલ્લાઓમાં મંત્રીઓની મુલાકાત વખતે પ્રોટોકોલનું પાલન ન થયું હોવાના અહેવાલો મળ્યા છે. “નેતાજીઓના પ્રોટોકોલ જળવાતા નથી” એવી ફરિયાદો પર સરકારે ગંભીરતાથી ધ્યાન આપ્યું છે. આને કારણે સરકારી વ્યવસ્થાની છાપ પર અસર પડી રહી છે અને મંત્રીઓને અપેક્ષિત આદર ન મળી રહ્યો છે. પરિપત્રમાં કહેવામાં આવ્યું છે કે મંત્રીઓ રાજ્ય સરકારના પ્રતિનિધિ તરીકે જિલ્લાઓની મુલાકાત લે છે, તેથી તેમને વાઇબ્રન્ટ ગુજરાતની ભાવના અનુરૂૂપ ઉષ્માભર્યું અને સુવ્યવસ્થિત સ્વાગત મળવું જોઈએ.
પરિપત્રની મુખ્ય સૂચનાઓ મુજબ જિલ્લા કલેક્ટર અને ડીડીઓએ મંત્રીઓની મુલાકાત પહેલાં જ તમામ તૈયારીઓ કરવી.એરપોર્ટ/રેલ્વે સ્ટેશન/રોડ પર યોગ્ય રીસેપ્શન, ફૂલમાળા, ગાર્ડ ઓફ ઓનર (જ્યાં અનુમતિ હોય) અને સ્થાનિક વહીવટી અધિકારીઓની હાજરી ફરજિયાત. કાર્યક્રમ સ્થળે પ્રોટોકોલ મુજબ સીટિંગ, માઇક વ્યવસ્થા અને સુરક્ષા.મંત્રીઓના કાર્યક્રમ દરમિયાન સ્થાનિક લોકપ્રતિનિધિઓ, અધિકારીઓ અને જનતાને સામેલ કરીને સકારાત્મક વાતાવરણ ઊભું કરવું.અનુચિત વર્તન અથવા પ્રોટોકોલ ભંગના કિસ્સામાં સંબંધિત અધિકારીઓ સામે કાર્યવાહી કરવામાં આવશે.
આ પરિપત્ર ગુજરાત સરકારની ’વાઇબ્રન્ટ ગુજરાત’ અને ’સુશાસન’ની નીતિને મજબૂત કરવાના ઉદ્દેશ્યથી જારી કરવામાં આવ્યો છે. સરકાર માને છે કે મંત્રીઓની જિલ્લા મુલાકાતો વિકાસ કાર્યોનું મૂલ્યાંકન, યોજનાઓનું અમલીકરણ અને જનતાની સમસ્યાઓના નિરાકરણ માટે મહત્વપૂર્ણ છે. તેથી તેમને યોગ્ય આદર આપવો એ વહીવટી અધિકારીઓની જવાબદારી છે. આ પગલું રાજ્યના વહીવટી તંત્રમાં શિસ્ત અને સંયમ લાવવાના પ્રયાસ તરીકે જોવામાં આવી રહ્યું છે. તાજેતરમાં અમુક જિલ્લાઓમાં મંત્રીઓની મુલાકાત વખતે અપેક્ષિત વ્યવસ્થા ન હોવાના અહેવાલો મળ્યા હતા, જેના કારણે આ પરિપત્ર જારી થયો છે. અધિકારીઓને સૂચના આપવામાં આવી છે કે આગામી તમામ મુલાકાતોમાં આ નિયમોનું સખતપણે પાલન કરવું.
