ગુજરાતમાં છેલ્લા કેટલાક દિવસોથી પડી રહેલા સાર્વત્રિક અને ભારે વરસાદના કારણે જનજીવન વેરવિખેર થઈ ગયું છે. ખાસ કરીને ગ્રામીણ અને નીચાણવાળા વિસ્તારોમાં વરસાદી પાણી ભરાવા તેમજ રસ્તાઓ ધોવાઈ જવાને કારણે વાહનવ્યવહારને વ્યાપક અસર પહોંચી છે. સરકારી તંત્રના સત્તાવાર અહેવાલ અનુસાર, હાલની સ્થિતિએ રાજ્યના અલગ-અલગ વિસ્તારોમાં કુલ 168 માર્ગો વાહનવ્યવહાર માટે સંપૂર્ણપણે બંધ કરી દેવામાં આવ્યા છે, જેના કારણે હજારો મુસાફરો અટવાયા છે.
બંધ કરવામાં આવેલા માર્ગોના આંકડા પર નજર કરીએ તો, તેમાં 1 સ્ટેટ હાઈવે અને 2 નેશનલ હાઈવેનો સમાવેશ થાય છે, જેના પર વાહનોની લાંબી કતારો જોવા મળી રહી છે. આ સિવાય ગ્રામીણ વિસ્તારોને જોડતા પંચાયત હસ્તકના સૌથી વધુ 154 રસ્તાઓ અને 11 અન્ય માર્ગો પણ બંધ છે. રસ્તાઓ પર પાણી ફરી વળવાના કારણે અનેક ગામડાઓનો સંપર્ક મુખ્ય મથકોથી તૂટી ગયો છે, અને લોકોને જીવનજરૂૂરી ચીજવસ્તુઓ મેળવવામાં પણ મુશ્કેલી પડી રહી છે. જોકે, મુસાફરો અને સ્થાનિક લોકો માટે રાહતના સમાચાર પણ સામે આવ્યા છે.
વરસાદનું જોર ઘટતાની સાથે જ વહીવટી તંત્ર દ્વારા યુદ્ધના ધોરણે પાણી નિકાલ અને રસ્તા સમારકામની કામગીરી શરૂૂ કરી દેવામાં આવી છે. છેલ્લા 24 કલાકમાં પાણી ઓછું થતાં તંત્રએ ત્વરિત કાર્યવાહી કરીને 157 જેટલા માર્ગોને ફરીથી વાહનવ્યવહાર માટે ખુલ્લા મૂકી દીધા છે. બાકીના બંધ રસ્તાઓ પણ વહેલી તકે શરૂૂ થાય તે માટે કાટમાળ હટાવવાની અને માટી પુરાણની કામગીરી સતત ચાલુ રાખવામાં આવી છે.