ગણેશોત્સવના વિસર્જન દિવસે રાજ્યના અલગ-અલગ જિલ્લામાં ડૂબવાની ઘટનાઓમાં કુલ 14 લોકોના મોત થયાની જાણ થઈ છે. રાજકોટમાં 3, મોરબીમાં 2, સુરતના કામરેજમાં 3, બગોદરામાં 1, અમરેલીના બાબરામાં 4 અને રાજુલા-ચાંચ બંદરમાં 1નાં મોત નોંધાયા છે.
રાજકોટના કુવાડવા-વાંકાનેર રોડ પર ખોડિયાર મંદિર પાસેના ચેકડેમમાં વિસર્જન કરી નહાવા પડેલા એક જ પરિવારના ત્રણ સભ્યો ડૂબી ગયા. રાણપુરના ધીરુભાઈ ચૌહાણ (50), તેમના પુત્ર નયન (23) અને સગા નરેન્દ્ર ચૌહાણ (30)ના મૃતદેહ બહાર કાઢવામાં આવ્યા. સ્થળ પરની બે મહિલાઓને બચાવી લેવામાં આવી હતી. પાણી 20-22 ફૂટ ઊંડું હોવાનું જણાયું.
મોરબી પાસે સાદુળકાની મચ્છુ નદીમાં રાત્રે વિસર્જન કરવા ગયેલા પીપળીના ચાર યુવાનો ઊંડા પ્રવાહમાં ફસાયા. આકાશ માલિયા અને આકાશ ગજાનંદભાઈને બચાવી લેવાયા, જ્યારે બે યુવાનોના મોત થયા. વિલાસ સુભાષભાઈ ગાયકવાડ (34)નો મૃતદેહ મળ્યો હતો. પ્રતિબંધ છતાં રાત્રે વિસર્જન કરવાનું કહેવાય છે.
સુરતના કામરેજ તાલુકાના ધોરણ પારડી પાસે તાપી નદીમાં વિસર્જન માટે ગયેલી નાવડી પલટી. ખોલવાડના મેર રાજુભાઈ લાલાભાઈ (21), શિયાળિયા દાનાભાઈ સુભાભાઈ (26) અને સાદુલભાઈ મુલાભાઈ મેર (23) સહિત ત્રણના મોત થયા. માંગરોલ અને ઓલપાડ તાલુકામાં પણ અલગ ડૂબવાની ઘટનાઓ નોંધાઈ. અમદાવાદ ગ્રામ્યના બગોદરા-શિયાળ રોડ પરના તળાવમાં વિસર્જન બાદ નહાવા પડેલા બે કિશોરોમાંથી મહાવીર ગંભીરભાઈ ચૌહાણને બચાવી લેવાયા, જ્યારે હર્ષરાજસિંહ વિજયસિંહ ચૌહાણ ડૂબી ગયા.
અમરેલી જિલ્લાના બાબરા વિસ્તારના ચેકડેમમાં વિસર્જન બાદ નહાવા ગયેલા લોકોમાંથી ચારના મોત થયા. રાજુલા તાલુકાના ચાંચ બંદર વિસ્તારમાં દરિયાઈ ખાડી-કિનારે વિસર્જન અને સ્નાન દરમિયાન એક વ્યક્તિ ડૂબી ગયા. અગાઉ સાણંદ પાસે ગોધાવી કેનાલમાં વિસર્જન વેળા પગ લપસતાં 51 વર્ષીય ભાસ્કર અપ્પલાનું પણ મોત થયું હતું.
પોલીસે મોટાભાગની ઘટનાઓમાં આકસ્મિક મોતનો અહેવાલ નોંધ્યો છે. નિયત કુંડ અને સલામતીની સૂચનાઓ છતાં ઊંડા જળાશયો, નદી, ચેકડેમ અને દરિયાઈ કિનારે પ્રવેશ તથા નહાવાની ટેવને કારણે જાનહાની થઈ હોવાનું જણાય છે.