2025 માં વિશ્વભરમાં કુલ 128 પત્રકારો અને મીડિયા કર્મચારીઓના મોત થયા છે. ઇન્ટરનેશનલ ફેડરેશન ઓફ જર્નાલિસ્ટ્સ (IFJ) ના તાજેતરના અહેવાલ મુજબ, મધ્ય પૂર્વ અને આરબ વિશ્વમાં પત્રકારોના મૃત્યુની સૌથી વધુ સંખ્યા જોવા મળી. IFJરિપોર્ટમાં જણાવાયું છે કે મધ્ય પૂર્વ અને આરબ વિશ્વમાં 74 પત્રકારોના મૃત્યુ થયા, જે કુલ મૃત્યુના લગભગ 58 ટકા છે.
અહેવાલમાં જણાવાયું છે કે, મધ્ય પૂર્વ અને આરબ વિશ્વમાં 2025માં પત્રકારોના મોતનો ભયાનક રેકોર્ડ છે, જેમાં 74 મૃત્યુ થયા છે. પેલેસ્ટિનિયન પત્રકારોએ સૌથી વધુ કિંમત ચૂકવી છે, જેમાં IFJએ ગાઝા યુદ્ધમાં 56 મૃત્યુ નોંધ્યા છે. સૌથી હાઇ-પ્રોફાઇલ ઘટના 10 ઓગસ્ટના રોજ બની હતી, જ્યારે અલ જઝીરાના પત્રકાર અનસ અલ-શરીફ પર હુમલો કરવામાં આવ્યો હતો.
તેઓ ગાઝા શહેરની અલ શિફા હોસ્પિટલની બહાર પત્રકારોના તંબુમાં હતા, જ્યાં તેમની સાથે પાંચ અન્ય પત્રકારો અને મીડિયા કર્મચારીઓનું મોત થયું હતું.
IFJએ તેનો અહેવાલ બહાર પાડ્યો હતો, જેમાં જણાવાયું હતું કે કુલ 128 મૃત્યુમાંથી, નવ આકસ્મિક હતા, અને મૃતકોમાંથી દસ મહિલાઓ હતી. અહેવાલમાં એ પણ પુષ્ટિ આપવામાં આવી છે કે 10 ડિસેમ્બર પછી 17 વધારાના કેસ નોંધાયા હતા, જે અગાઉના કામચલાઉ આંકડા 111 થી વધારીને 128 થયા હતા.
દરમિયાન, યમનમાં 13, યુક્રેનમાં 8 અને સુદાનમાં 6 પત્રકારોના મોત થયા હતા. ભારત અને પેરુમાં ચાર-ચાર મૃત્યુ નોંધાયા હતા. વધુમાં, પાકિસ્તાન, મેક્સિકો, ફિલિપાઇન્સ અને પેરુ સહિત અન્ય ઘણા દેશોમાં ત્રણ-ત્રણ મૃત્યુ નોંધાયા હતા.
1990માં તેની વાર્ષિક મૃત્યુ યાદી શરૂૂ કર્યા પછી, IFJએ વિશ્વભરમાં કુલ 3,173 પત્રકારોના મૃત્યુ નોંધ્યા છે. IFJના સેક્રેટરી જનરલ એન્થોની બેલેંગરે જણાવ્યું હતું કે આ આંકડા વૈશ્વિક કટોકટીને પ્રતિબિંબિત કરે છે અને સરકારોને આ મુદ્દા પર તાત્કાલિક પગલાં લેવા વિનંતી કરી છે. તેમણે કહ્યું, આ એક વૈશ્વિક કટોકટી છે. આ મૃત્યુ એ વાતની સ્પષ્ટ યાદ અપાવે છે કે પત્રકારોને તેમના કાર્ય માટે નિશાન બનાવવામાં આવી રહ્યા છે. સરકારોએ પત્રકારોનું રક્ષણ કરવા, હત્યારાઓને ન્યાય અપાવવા અને પ્રેસ સ્વતંત્રતાને જાળવી રાખવા માટે હવે પગલાં લેવા જોઈએ. દુનિયા વધુ રાહ જોવાનું પોસાય તેમ નથી.
