ભારતીય ક્રિકેટર પૃથ્વી શો અને આકૃતિ અગ્રવાલના સંબંધોમાં ફરી નવો વળાંક આવ્યો છે. સગાઈ તૂટવાની જાહેરાતના 26 દિવસ બાદ બંને ફરી એકસાથે આવ્યાં છે. ઇન્સ્ટાગ્રામ સ્ટોરી દ્વારા આ અંગે જાણકારી આપી હતી. તેણે પોતાના નિર્ણય અંગે વાત કરતાં સ્વીકાર્યું કે નજીકના લોકોની સલાહને આધારે તેણે સગાઈ તોડવાનો નિર્ણય લીધો હતો. હવે બંનેએ પરસ્પર સંમતિ, વિશ્વાસ અને પ્રેમ સાથે આગળ વધવાનું નક્કી કર્યું છે.
પૃથ્વી શો અને આકૃતિ અગ્રવાલે માર્ચ 2026માં સગાઈ કરી હતી. 8 માર્ચે પૃથ્વીએ સોશિયલ મીડિયા પર સગાઈની તસવીરો શેર કરીને પોતાના સંબંધની જાહેરાત કરી હતી. જોકે, થોડા મહિના બાદ બંને વચ્ચે અણબનાવ હોવાની ચર્ચાઓ શરૂૂ થઈ હતી. 17 સપ્ટેમ્બરે આકૃતિએ સોશિયલ મીડિયા પર એક નિવેદન શેર કરીને બંને અલગ થઈ રહ્યાં હોવાની જાણકારી આપી હતી. તેણે જણાવ્યું હતું કે ભવિષ્યને લઈને બંનેના લક્ષ્યો અને પરિસ્થિતિઓ અલગ હોવાથી તેમણે અલગ થવાનો નિર્ણય કર્યો છે.
હવે 12 ઓક્ટોબરે પૃથ્વી શોએ ઇન્સ્ટાગ્રામ સ્ટોરી દ્વારા બંને ફરી સાથે હોવાની જાણકારી આપી છે. તેણે જણાવ્યું કે સંબંધ અંગે નિર્ણય લેતી વખતે તેણે નજીકના લોકોની સલાહને મહત્ત્વ આપ્યું હતું. પૃથ્વીના જણાવ્યા મુજબ, સંબંધ વિશે પોતાનાથી વધુ જાણતા હોય તેમ લાગતા લોકોના વિચારોને આધારે તેણે સગાઈ તોડવાનો નિર્ણય લીધો હતો. પૃથ્વીએ હવે પરસ્પર સંમતિ, વિશ્વાસ અને પ્રેમ સાથે ભવિષ્યમાં આગળ વધવાની ઇચ્છા વ્યક્ત કરી છે. સાથે જ તેણે લોકોને બંનેના નિર્ણયનું સન્માન કરવા વિનંતી કરી છે. જોકે, બંને વચ્ચે ફરી સમાધાન કેવી રીતે થયું અને આ નિર્ણય સુધી પહોંચવા પાછળ કઈ વાતચીત થઈ, તેની વિસ્તૃત વિગતો જાહેર કરવામાં આવી નથી.
