બોમ્બે હાઈકોર્ટે કેન્દ્રીય મંત્રી નીતિન ગડકરીની અરજી પર મહત્વપૂર્ણ ચુકાદો આપ્યો છે. કોર્ટે E20 ઇંધણ મુદ્દા સાથે ગડકરીને જોડતા ડીપફેક વિડિઓઝ અને નકલી અઈં-જનરેટેડ છબીઓને તાત્કાલિક દૂર કરવાનો આદેશ આપ્યો છે.
જસ્ટિસ આરિફ ડોક્ટરની આગેવાની હેઠળની બેન્ચે ગડકરીના વકીલ સંદીપ લદ્દાની દલીલો સાંભળ્યા બાદ આ વચગાળાનો આદેશ જારી કર્યો હતો. કોર્ટે સ્પષ્ટપણે જણાવ્યું હતું કે સામગ્રી ખૂબ જ વાંધાજનક અને અભદ્ર છે, અને તેને જાહેર પ્લેટફોર્મ પર રહેવાની મંજૂરી આપી શકાતી નથી.
આ કેસ કેન્દ્રીય માર્ગ પરિવહન મંત્રી નીતિન ગડકરીને લગતો છે. તેમણે આરોપ લગાવ્યો હતો કે સોશિયલ મીડિયા પર અમુક વ્યક્તિઓએ તેમના ડીપફેક વિડિઓઝ અને એઆઇ-જનરેટેડ છબીઓ બનાવી છે, જે તેમને E20 ઇંધણ વિવાદ સાથે જોડે છે. આમાંથી એક વીડિયો ઇન્સ્ટાગ્રામ રીલ તરીકે દેખાયો હતો.
કોર્ટે ટિપ્પણી કરી કે જે સામગ્રી દૂર કરવાની માંગ કરવામાં આવી છે તે સંપૂર્ણપણે અશ્ર્લીલ અને બદનક્ષીભરી છે. આવી સામગ્રીનું કોઈપણ જાહેર પ્લેટફોર્મ પર કોઈ સ્થાન નથી, કારણ કે તે બાળકો અને યુવાનો સહિત દરેક માટે સુલભ છે. કોર્ટે સ્વીકાર્યું કે અરજદારે વચગાળાની રાહત મેળવવા માટે મજબૂત આધાર સ્થાપિત કર્યા છે.
