હાઇકોર્ટની ચેતવણી છતાં તંત્રના નાક નીચે નકલી કોર્ટ ધમધમતી રહી

2006-7 માં કોર્ટ ઓફ ક્ધટેમ્પ્ટ થયો’તો: પાલડીની જમીનના કેસની પ્રક્રિયા થતા વર્ષો બાદ બહાર આવેલું કૌભાંડ: આરોપી મોરિસ સેમ્યુઅલ ક્રિશ્ર્ચિયન સામે ગુના દાખલ કરવા આદેશ

ગુજરાતમાં બોગસ સરકારી કચેરીઓ, અધિકારીઓ પકડાઇ રહ્યા છે. નકલી કોર્ટ બાદ હવે નકલી જજ પણ અમદાવાદમાંથી ઝડપાયો હતો. કોર્ટમાં થયેલા દીવાની દરખાસ્તથી સમગ્ર કૌભાંડ સામે આવ્યું હતું. સિટી સિવિલ કોર્ટના રજિસ્ટ્રરે કારેજ પોલીસમાં ફરીયાદ કરતા આરોપી મોરિસ કિશ્ર્ચિયનની ધરપકડ કરવામાં આવી હતી. નકલી જજ દ્વારા અત્યાર સુધીમાં કરવામાં આવેલા તમામ ચુકાદા અને જજમેન્ટ અંગે પોલીસે તપાસ શરૂ કરી છે. અગાઉ આરોપી સામે 2006-07માં કોર્ટ ઓફ ક્ધટેમ્પટ અને 2015માં ફ્રોડનો ગુનો નોંધાય ચુકયો છે.

સિટી સિવિલ કોર્ટે કરેલા હુકમમાં નોધ્યું છે કે, પાલડી પાસે આવેલી સરકારી જમીન પચાવી પાડવા માટે ગુનાઈત કાવતરું રચીને ફ્રોડ એવોર્ડ ઊભો કરવામાં આવ્યો હતો. આ ફ્રોડ એવોર્ડ હુકમ બનાવવા માટે મોરિસ સેમ્યુઅલ ક્રિશ્વિયનને આર્બિટ્રેટર તરીકે નિમવામાં આવેલો ન હોવા છતાં પોતે આર્બિટ્રેટર-જજ તરીકે એકતરફી અને કાયદાના પ્રબંધો વગર ખોટી ટ્રિબ્યૂનલ એક પ્રકારની કોર્ટ બનાવી હતી. આરોપીએ ન્યાયની કોર્ટ હોય તેવું વાતાવરણ ઊભું કરી સ્ટાફ, વકીલો ઉભા કરી, જજની જેમ વર્તી જાતે જ ક્લેઈમ સ્ટેટમેન્ટ અરજી-દાવો તૈયાર કરી, પોતાની પાસે રજૂ કરાવ્યો હતો. દરખાસ્તમાં દર્શાવેલી જમીન વર્ષો પહેલાથી સરકારી માલિકીની કિંમતી જમીન હોવા છતાં ફ્રોડ એવોર્ડ હુકમના આધારે દરખાસ્તની ખાનગી માલિકીની જમીન ઠેરવવા ફ્રોડ એવોર્ડ હુકમ ઉભો કર્યો હતો. બનાવટી આર્બિટ્રેટર કોર્ટ ઊભી કરનાર સેમ્યુઅલ ક્રિશ્વિયન અને તેની સાથે સંકળાયેલા સામે રજિસ્ટ્રારે ફરિયાદ દાખલ કરવાની રહેશે.

મોરિસ સેમ્યુઅલ ક્રિશ્ચયન દ્વારા ફ્રોડથી ઊભો કરવામાં આવેલા એવોર્ડ હુકમની અસલ નકલ, દરખાસ્ત અરજી સહિતના સ્ટેટમેન્ટ પોલીસ ફરિયાદમાં સાથે સોંપવાની રહેશે. સિટી સિવિલ કોર્ટમાં દરખાસ્ત કરનાર બાબુજી છનાજી ઠાકોર અરજી નામંજૂર કરીને રૂૂ.50 હજાર દંડ કરવામાં આવે છે. આ કેસમાં સરકાર તરફે એડવોકેટ હરેશ શાહ અને વિજય શેઠે દલીલો કરી હતી.

નકલી જજે ગાંધીનગરના સેક્ટર-24 ખાતે આખીય નકલી કોર્ટ ઊભી કરી હતી. જ્યાં તેણે હાઇકોર્ટના જસ્ટિસ પાસે હોય તેવું ડાયસ બનાવ્યું હતું. એક ચોપદાર પણ રાખ્યો હતો. તે ડાયસ પર બેસીને જજ હોય તેમ બોગસ ઓર્ડરો કરતો હતો.

બોગસ આર્બિટ્રેશન કોર્ટ ઊભી કરનાર મોરિસ સેમ્યુઅલ ક્રિશ્વિયનની કોર્ટે સ્ટેટેમેન્ટ નોંધ્યું હતું. જેમાં તેને કોર્ટને જણાવ્યું હતું કે, ડો. મોરિસ સેમ્યુઅલ ક્રિશ્વિયન આર્બિટ્રેશન જજ તરીકે કામ કરું છું અને ગાંધીનગર રહું છું. કોર્ટમાં રજૂ થયેલી દરખાસ્ત સાથે આર્બિટ્રેટર કેસના ફાઈનલ એવોર્ડ બતાવીને ચુકાદો તમે આપ્યો છે તે સંદર્ભે મોરિસ સેમ્યુઅલે કોર્ટને જણાવ્યું હતું કે, ફાઈનલ એવોર્ડ મેં આ કામમાં આપેલો છે અને તેમાં મારી સહી છે. પાલડીમાં આવેલી રેવન્યૂ સર્વે નં 306ની ટીપી 6ના ફાઇનલ પ્લોટ 32ની સરકારી જમીન હોવા છતા મોરિસ સેમ્યુઅલ ક્રિશ્વિયને ઠાકોર બાબુજી છનાજીને ઊભા કર્યા હતા અને આર્બિટેશનમાં તે મિલકત તેમની હોવાનો આદેશ(એવોર્ડ) કર્યો હતો. તે એવોર્ડનું પાલન કરાવવા માટે બાબુજી ઠાકોરે દિવાની દરખાસ્ત સેશન્સ કોર્ટમાં દાખલ કરી હતી. જેમાં સામેવાળા પક્ષકાર તરીકે કલેક્ટરને દર્શાવવામાં આવ્યા હતા.

જેથી સરકાર તરફે એડવોકેટ હરેશ શાહ અને વિજય બી. શેઠ હાજર રહ્યા હતા. તેમણે મિલકત અંગે તપાસ કરતા જાણવા મળ્યું હતું કે, આ મામલે લવાદની નિમણૂક કરવામાં આવી છે, પરંતુ લવાદની નિમણૂક બન્ને પક્ષની સમંતિથી નિમવી પડે. આ કેસમાં સરકારે કોઇ જ સમંતિ આપી ન હતી. ઉપરાંત સરકાર ક્યારેય લવાદ નિમતી જ નથી. જેથી મોરિસ સેમ્યુઅલ ક્રિશ્વિયને ખોટા આદેશ કરી જાતે જ લવાદ નિમ્યા હોવાનો ખુલાસો થયો હતો અને પછી આખુંય કૌભાંડ પ્રકાશમાં આવ્યું હતું.

સરકારી જમીન હડપવા પોતે જ વકીલ રોકી આપતો હતો
સરકારી જમીન પચાવી પાડવા માટે મોરિસ સેમ્યુઅલ ક્રિશ્ચયન પોતે જ વકીલ રોકી આપતા હતા. જાતે કોર્ટ બનાવી(સામાન્ય લોકો ટ્રિબ્યૂનલ અને તેના માહોલને કોર્ટ જ માને) જાતે સ્ટાફ ઊભા કરીને પોતે આર્બિટ્રેટર જજ બની બેઠા હતા. પોતાને ત્યાં જાતે કેસ દાખલ કરાવી જાતે ચુકાદો આપી, કરોડોની જમીનના અરજદારને માલિક બનાવી દીધા હતા. ફ્રોડ હુકમના આધારે કાયદાથી અસ્તિત્ત્વમાં આવેલી સિટી સિવિલ કોર્ટમાં દરખાસ્ત દાખલ કરાવી હતી. આ ઉપરાંત કોર્ટમાં રજૂ થયેલા દરખાસ્તમાં એડવોકેટ પણ આર્બિટ્રેટર જજ મોરિસ સેમ્યુઅલએ જ રોકી આપ્યા હતા અને સતત દરખાસ્તનું મોનિટરીંગ કરી પોતે જાતે જ દરખાસ્તને માર્ગદર્શન આપતા હતા. મહત્ત્વની વાત એ છે કે, મોરિસ સેમ્યુઅલે દરખાસ્ત વતી દલીલો પણ કરી હતી અને દરેક સ્ટેજે કોર્ટને ગેરમાર્ગે દોરી સાચી હકીકતો રજૂ કરી નહોતી.

સરકારી મિલકત શોધી વ્યક્તિઓ ઊભા કરી મિટિંગ ગોઠવતો
નકલી જજ મોરિસ સેમ્યુઅલ ક્રિશ્ચિયન અમદાવાદ, ગાંધીનગરમાં આવેલી કરોડોની સરકારી જમીન શોધી કાઢતો હતો. તે વ્યક્તિઓ ઊભા કરતો હતો અને તેમની સાથે ચાની કિટલીઓ પર મીટિંગ કરતો હતો. ત્યારબાદ જે વ્યક્તિને તૈયાર કર્યા હોય તેમના મારફતે આર્બિટેશનમાં(પોતાની કોર્ટમાં જ) અરજી કરાવતો હતો અને ત્યારબાદ બે પાનાનો આદેશ કરી તે મિલકત તાત્કાલીક અસરથી જે તે વ્યક્તિને સોંપવા આદેશ કરતો હતો.

11 દીવાની દરખાસ્તમાં ફરિયાદ થવાની શક્યતા
નકલી જજ મોરિસ સેમ્યુઅલ ક્રિશ્વિયને 11થી વધુ મિલકતો ખોટા આદેશ કરી આપી દીધી છે. તમામ 11 મિલકતોનું એવોર્ડ કરાવવા કોર્ટમાં દિવાની દરખાસ્ત કરવામાં આવી છે. જેથી આ તમામ આદેશ બોગસ હોવાનું સામે આવ્યું છે. જેમ પાલડીની મિલકત મામલે કોર્ટે ફરિયાદ નોંધવા આદેશ કર્યો તેમ આ તમામ 11 કરોડોની મિલકતમાં ફરિયાદ નોંધવા આદેશ થવાની શક્યતા છે.