પ્રભાવશાળી પ્રચાર માટે કોંગ્રેસે 40 ધુરંધરોને મેદાને ઉતાર્યા

ગુજરાત મિરર,
રાજકોટ, તા. 17
ગુજરાતમાં એપ્રિલ 2026માં યોજાનારી સ્થાનિક સ્વરાજ્ય સંસ્થાઓની ચૂંટણીને લઈને રાજકીય હલચલ તેજ બની છે. આ ચૂંટણીને ધ્યાનમાં રાખીને કોંગ્રેસે પોતાની તૈયારીઓ ઝડપથી આગળ ધપાવી છે. રાજ્યમાં પ્રભાવશાળી પ્રચાર માટે ગુજરાત પ્રદેશ કોંગ્રેસ સમિતિએ 40 સ્ટાર પ્રચારકોની યાદી સત્તાવાર રીતે જાહેર કરી છે, જેનાથી ચૂંટણી જંગમાં પાર્ટીનું મજબૂત પ્રસ્તુતિ કરવાની વ્યૂહરચના સ્પષ્ટ થાય છે.
ગુજરાત પ્રદેશ કોંગ્રેસના પ્રમુખ અમિત ચાવડા દ્વારા રાજ્ય ચૂંટણી પંચને સોંપવામાં આવી છે. આ યાદીમાં પક્ષના વરિષ્ઠ નેતાઓ, સાંસદો, ધારાસભ્યો અને યુવા ચહેરાઓને સ્થાન આપવામાં આવ્યું છે. આ તમામ નેતાઓ રાજ્યના વિવિધ જિલ્લાઓ અને શહેરોમાં પ્રચાર અભિયાનની જવાબદારી સંભાળશે. કોંગ્રેસ દ્વારા જાહેર કરાયેલી આ યાદીમાં અનુભવ અને યુવાનીનો સંતુલિત સમન્વય જોવા મળે છે. મુખ્ય પ્રચારકોમાં મુકુલ વાસનિક, શક્તિસિંહ ગોહિલ, ભરતસિંહ સોલંકી અને જગદીશ ઠાકોર જેવા વરિષ્ઠ નેતાઓનો સમાવેશ થાય છે. તેઓ પાર્ટીના પરંપરાગત મતદારોને સંબોધશે અને સંગઠનને મજબૂત બનાવવાનો પ્રયાસ કરશે.
સાથે સાથે સાંસદ અને ધારાસભ્યોમાં ગેનીબેન ઠાકોર, જીજ્ઞેશ મેવાણી, શૈલેષ પરમાર, અનંત પટેલ અને ઈમરાન ખેડાવાલા જેવા નેતાઓને પણ મહત્વપૂર્ણ જવાબદારીઓ સોંપવામાં આવી છે. આ નેતાઓ સ્થાનિક મુદ્દાઓ પર મતદારો સાથે સીધો સંપર્ક સાધશે. તે ઉપરાંત પરેશ ધાનાણી, તુષાર ચૌધરી, સિદ્ધાર્થ પટેલ અને શ્રીનિવાસ બી.વી જેવા અગ્રણી અને યુવા નેતાઓને પણ યાદીમાં સ્થાન આપવામાં આવ્યું છે, જે યુવા મતદારોને આકર્ષવા માટે મહત્વપૂર્ણ સાબિત થઈ શકે છે.
આ યાદી પરથી સ્પષ્ટ થાય છે કે કોંગ્રેસ આ ચૂંટણીમાં માત્ર સ્થાનિક સમસ્યાઓને જ નહીં, પરંતુ સામાજિક અને જ્ઞાતિગત સમીકરણોને પણ ધ્યાનમાં રાખીને વ્યૂહરચના બનાવી રહી છે. વિવિધ વિસ્તારોમાં પ્રભાવ ધરાવતા નેતાઓને આગળ રાખીને પાર્ટી મતદારો સુધી વધુ અસરકારક રીતે પહોંચવાનો પ્રયાસ કરી રહી છે. આવતા દિવસોમાં આ સ્ટાર પ્રચારકો રાજ્યભરમાં પ્રચાર અભિયાનને ગતિ આપશે અને ચૂંટણીના પરિણામો પર તેનો કેટલો પ્રભાવ પડે છે તે જોવાનું મહત્વપૂર્ણ રહેશે.