રવિ કિશન ગોરખપુરના સાંસદ તરીકે પણ કાર્યરત છે
ઉત્તર પ્રદેશના ગોરખપુરના સાંસદ અને ફિલ્મ અભિનેતા રવિ કિશનને વધુ એક મોટી સિદ્ધિ હાંસલ કરી છે. તેમને 2025નો દાદા સાહેબ ફાળકે આંતરરાષ્ટ્રીય ફિલ્મ મહોત્સવ પુરસ્કાર પણ એનાયત કરવામાં આવ્યો છે. ચાહકોને આ વાતની જાણ થતાં જ તેમના હૃદયમાં ખુશીની લહેર છવાઈ ગઈ.
નોંધનીય છે કે રવિ કિશન ફિલ્મો અને રાજકારણ બંનેમાં સક્રિય છે. તેઓ હાલમાં ગોરખપુરથી બીજી વખત સંસદ સભ્ય તરીકે સેવા આપી રહ્યા છે. ગોરખપુરના સાંસદ અને ફિલ્મ અભિનેતા રવિ કિશન શુક્લા તેમના નિવેદનો અને એક્ટિવિટી માટે સમાચારમાં રહે છે.
જૌનપુર જિલ્લાના કેરાકટ ગામના રહેવાસી રવિ કિશન, ગોરખપુર સંસદીય મતવિસ્તારથી બીજી વખત ભાજપના સાંસદ તરીકે ચૂંટાયા ઉપરાંત, ભોજપુરી અને હિન્દી ફિલ્મોમાં પણ સક્રિય રીતે સામેલ છે. તેમના 33 વર્ષના લાંબા ફિલ્મી કારકિર્દી દરમિયાન, તેમણે અસંખ્ય ભોજપુરી અને હિન્દી ફિલ્મોમાં કામ કર્યું છે. તેમણે દક્ષિણ ભારતીય ફિલ્મોમાં પણ ઘણી નોંધપાત્ર ભૂમિકાઓ ભજવી છે. તાજેતરમાં, તેમને હિન્દી ફિલ્મ લાપતા લેડીઝ માટે ફિલ્મફેર એવોર્ડ એનાયત કરવામાં આવ્યો હતો.
રવિ કિશન અત્યાર સુધી વિવિધ ભાષાઓમાં લગભગ 200 ફિલ્મોમાં કામ કરી ચૂક્યા છે, જે ભોજપુરી સિનેમા માટે એક રેકોર્ડ છે. દાદાસાહેબ ફાળકે ઇન્ટરનેશનલ ફિલ્મ ફેસ્ટિવલ એવોર્ડથી સન્માનિત થયા બાદ રવિ કિશને કહ્યુ મારા પૂજ્ય માતા-પિતાના આશીર્વાદ, મારા સમર્થકોના પ્રેમ અને ગુરુ ગોરખનાથ બાબાના આશીર્વાદને કારણે મને આ બધું મળ્યું છે.
