પશ્ચિમ બંગાળના મુખ્યમંત્રી શુભેન્દુ અધિકારીએ ગુરુવારે કૌશિકી અમાસના પવિત્ર અવસરે કોલકાતાના ઐતિહાસિક અને સદીઓ જૂના કાળીઘાટ મંદિરની મુલાકાત લીધી હતી. આ મુલાકાત દરમિયાન મુખ્યમંત્રીએ માતા કાળીની પૂજા અર્ચના કર્યા બાદ, જમીન પર બેસીને મંદિરનો પરંપરાગત ભોગ (પ્રસાદ) ગ્રહણ કર્યો હતો. આ પ્રસાદની થાળીમાં બાસંતી પુલાવની સાથે માછલીનું મોટું માથું અને ફ્રાઈડ ફિશ (તળેલી માછલી) સામેલ હતી. બંગાળના શાક્ત હિન્દુ ધર્મમાં દેવીને માછલી અને બકરાના માંસનો ભોગ ચઢાવવાની અને તેને પ્રસાદ રૂૂપે ભક્તોમાં વહેંચવાની વર્ષો જૂની પરંપરા છે.
કાળીઘાટ મંદિરના સત્તાવાળાઓના જણાવ્યા અનુસાર, કૌશિકી અમાસના દિવસે ભોગમાં માછલી, માંસ, પુલાવ અને પાયેશ (ખીર) ધરાવવાનો નિયમ છે, જેનું સંપૂર્ણ પાલન કરવામાં આવ્યું હતું.
શુભેન્દુ અધિકારીનું આ પગલું એવા સમયે સામે આવ્યું છે જ્યારે સમગ્ર પશ્ચિમ બંગાળમાં માંસાહાર અને ધાર્મિક પરંપરાઓને લઈને એક મોટો રાજકીય અને સાંસ્કૃતિક વિવાદ ચાલી રહ્યો છે. આ વિવાદની શરૂૂઆત તાજેતરમાં બાગેશ્વર ધામના પીઠાધીશ્વર ધીરેન્દ્ર કૃષ્ણ શાસ્ત્રી (બાગેશ્વર બાબા) ની બંગાળ મુલાકાત દરમિયાન થઈ હતી. હાવડામાં એક સભાને સંબોધતા ધીરેન્દ્ર શાસ્ત્રીએ બંગાળી હિન્દુઓને અપીલ કરી હતી કે તેઓ દુર્ગા પૂજા અને નવરાત્રીના તહેવારો દરમિયાન માંસાહારથી સંપૂર્ણપણે દૂર રહે. બાબાએ આક્રમક શૈલીમાં જણાવ્યું હતું કે નવરાત્રીમાં નોન-વેજ ખાનારા લોકો ’પાખંડી’ છે અને બંગાળના હિન્દુઓએ જાગીને માંસાહાર પીરસતા દુર્ગા પૂજા પંડાલોનો બહિષ્કાર કરવો જોઈએ. તેમણે દુર્ગા પૂજા દરમિયાન માંસ અને દારૂૂની દુકાનો બંધ રાખવાની પણ માંગ કરી હતી.
બાગેશ્વર બાબાના આ નિવેદનથી બંગાળમાં ભારે આક્રોશ ફાટી નીકળ્યો હતો, કારણ કે બંગાળી સંસ્કૃતિમાં દુર્ગા પૂજાના પવિત્ર દિવસોમાં પણ માછલી અને માંસાહાર લેવો એ એક અત્યંત સામાન્ય અને સ્વીકૃત બાબત છે. આ ટિપ્પણીઓ બાદ કોંગ્રેસ પક્ષે દક્ષિણ કોલકાતાના ભવાનીપુર પોલીસ સ્ટેશનમાં ધીરેન્દ્ર શાસ્ત્રી વિરુદ્ધ પોલીસ ફરિયાદ નોંધાવીને તેમની કાયદાકીય ધરપકડની માંગ કરી હતી. કોંગ્રેસનો આરોપ હતો કે આવા નિવેદનો સમાજમાં અશાંતિ અને ભાગલા પાડવાના ઈરાદાથી કરવામાં આવ્યા છે.
આ વિવાદમાં સ્થાનિક પરંપરાઓને ઠેસ પહોંચતી જોઈને ભારતીય જનતા પાર્ટીએ ત્વરિત ડેમેજ કંટ્રોલ શરૂૂ કર્યું હતું. બંગાળી મતદાતાઓને સ્પષ્ટ સંદેશ આપવા માટે જ મુખ્યમંત્રી શુભેન્દુ અધિકારીએ કાળીઘાટ મંદિરમાં માછલીનો પ્રસાદ લીધો હતો. આ અંગે પ્રતિક્રિયા આપતા શુભેન્દુ અધિકારીએ જણાવ્યું હતું કે એક પૂજનીય સંતે પોતાનો અંગત મત રજૂ કર્યો છે, લોકો તેને સ્વીકારી પણ શકે છે અને ન પણ સ્વીકારી શકે. તેમણે ઉમેર્યું કે તેઓ પોતે અષ્ટમીના દિવસે અને આખા કાર્તિક મહિનામાં સાત્વિક ભોજન લે છે, પરંતુ સાથે જ માતાજીને ધરાવાયેલો માછલી અને બકરાના બલિદાનનો પ્રસાદ પણ ગ્રહણ કરે છે.
